Daniel 8 - Acoli Baibul

Daniel oneno nyok romo ki nyok dyel i waŋ lek

¹ I mwaka me adek me loc pa kabaka Belcajar, an Daniel aneno ginanyuta i waŋ lek, i ŋe ginanyuta mukwoŋo ca.

² I kare ma aneno ginanyuta ki i waŋ lek anoŋo ni doŋ atye wa i gaŋ kal madit me Cuca, ma tye i lobo Elam; dok bene aneno ni atye wa i dog kulu Ulai.

³ Ailo waŋa malo ci aneno nyok romo ocuŋ i wi tera i dog kulu. Nyok romo-nu onoŋo tuŋe tye aryo; tuŋe aryo-ni ducu giboco, ento acel onoŋo dok bor kato lawote; en me aryone-ni otwi lacen.

⁴ Aneno nyok romo ka witte ki tek kun loko tuŋe tuŋ potoceŋ ki yo tuŋ acam, ka lokke yo tuŋ acuc bene, ma lee tim mo onoŋo pe twero cuŋ i nyime. Onoŋo ŋat mo bene pe ma twero larogi ki i tekone; en yam otimo gin ma iye mito kun dworre kekene bene.

⁵ I kare ma abedo ka lwodo lok cutcut aneno nyok dyel obino kun oa ki yo tuŋ potoceŋ ma ŋolo dye lobo ducu arii, ma tyene pe gudo ŋom; nyok dyel-lu onoŋo tye ki tuŋe i kin waŋe ma nen wa ki cen.

⁶ Nyok dyel oa obino bot nyok romo ma tye ki tune aryo-ni, ma onoŋo aneno Ocuŋ i wi tera i dog kulu ca, ci ocako riŋo ka lweny i kom nyok romo ki akemo madit adada.

⁷ Aneno obino odirre cok twatwal ki nyok romo, ci kolo ocako mako i kom nyok romo ci otwomo nyok romo oturo oputo tuŋe aryo ca woko; nyok romo onoŋo pe tye ki teko mo liweŋ me cuŋ i nyim nyok dyel, ci orete woko piny i ŋom ka onyone ki tyene; onoŋo pe tye ŋat ma twero laro nyok romo ki i teko pa nyok dyel.

⁸ Meno omiyo nyok dyel odworre kekerie mukato kare; ento i kare ma onoŋo en pud tek-ki, tuŋe madit-ti otur woko. Cutcut dok aneno tuŋe aŋwen mukene gutwi ma ginen ki cen ma gukemo yamo aŋwen me polo.

⁹ Dok aneno tuŋe mo matidi otwi okatti ki i kom tuŋe acel ki i kingi, olot mabor okemo yo tuŋ acuc, ki yo tuŋ wokceŋ, ma okemo kwede lobo me deyo.

¹⁰ Odoŋo madit oo wa i kom mony me polo; ento obolo lakalatwe mogo woko piny i ŋom, ci onyonogi woko ki tyene.

¹¹ Ocako dworre kekene o kwede wa i kom Laker me mony meno; ci okwanyo gitum awaŋa me nino ducu-ni woko ki bote, ka ojwero ode maleŋ-ŋi obalo woko.

¹² Gitiŋo mony kacel ki gitum awaŋa me nino ducu gimiyo i ciŋe pi bal; ci gibolo lok ada woko piny i ŋom, ci tuŋe obedo ka tic omedde matek twatwal.

¹³ Cutcut awinyo ŋat maleŋ tye ka loko ki ŋat maleŋ mukene owaco bote ni. “Ginanyuta ma aneno i wan lek ma okemo gitum awaŋa me nino ducu biri pi kare ma rom mene, ma okemo bene bal ma nyayo gin malik, ki ma okemo miyo ot pa Lubaŋa ki mony me polo me anyona woko ki tyen-ni?”

¹⁴ Ci ŋat maleŋ ma obedo ka lok-ki owacce ni, “Biri pi nino alip, acel ki miya acel ki pyerabic ma pe gibityero iye gitum me odiko ki otyeno, ka lacen gibiroco ot pa Lubaŋa gidwoko i kit ma myero.”

Lamalaika ogonyo te lok me ginanyuta

¹⁵ I kare ma onoŋo an Daniel aneno ginanyuta, abedo ka yenyo yo me niaŋ iye; ci cutcut aneno ŋat mo ma ocuŋ i nyima ma nen calo dano.

¹⁶ Ci awinyo dwan dano ma lok oa ki i kin kulu Ulai, ci olwoŋo ni, “Gabriel, mi danonu one te lok me ginanyuta ma en oneno-ni.”

¹⁷ Ci ocako bino cok ki ka ma onoŋo acuŋ iye; i kare ma obino abedo ki lworo ci apoto aryebbe woko piny, Ento en owacca ni, “In wod pa dano doŋ iniaŋ ni, ginanyuta ma inenoni nyuto gin ma bitimme kale me agik.”

¹⁸ I kare ma en tye ka lok kweda, nino omako waŋa woko acako nino nino matut kun akulu waŋa i ŋom; ento en oguda ci ociba acuŋ ki tyena.

¹⁹ Owaco bota ni, “Nen, abinyutti gin ma bitimme lacen i kare me agik me akemo pa Lubaŋa; pien lokke kemo nino me agik ma yam giciko pire con.

²⁰ Doŋ lok ma dok i kom nyok romo ma ineno ma tuŋe tye aryo-ni, magi gin aye luker me Media ki me Percia.

²¹ Ento nyok dyel meno kabaka pa jo Grik; doŋ tune madit ma i kin wane-ni meno aye kabaka mukwoŋo,

²² Doŋ tuŋe ma gituro-ni, ma tune aŋwen mukene otwi kakare ca, meno ker aŋwen ma bia ki rokke, ento tekogi pe bibedo rom ki mere.

²³ Ento lacen ki i ŋe locgi, i kare ma noŋo lubalo welgi onya omedde, ci kabaka mo ma waŋe ocwiny bia cako loc, ŋat ma niaŋ i lok me koc lit-gu,

²⁴ Tekone bibedo dit twatwal, en bitiyo gin ma tyeko piny woko ma miyo lworo, gin ma en bitiyo ducu biwoto maber, bineko jo ma gin twoni oteka kacel ki rok pa jo maleŋ.

²⁵ Pi ryekone marac, miyo bwola bimedde ameda i ciŋe, dok bibedo ka dworre ke kene ki i tamme. En bineko jo mapol tyekogi woko atura; dok bene bia lwenyo kadi wa i kom Laloc madit ma loyo luker ducu; ento gibiture woko laboŋo ciŋ dano mo ma ogudo kome.

²⁶ Pi meno ginanyuta ma loko i kom gitum me odiko ki otyeno gire obedo ada; doŋ imwon ginanyuta meno ikan woko, pien pud kare tye bor.”

²⁷ Dok an Daniel, ryeko onoŋo orwenyo woko ki bota, omiyo two omaka abuto kwede pi nino mapol manoknok; ka lacen aa acito ka tiyo tic pa kabaka; ento abedo ka uro ginanyuta meno ma aneno i waŋ lek-ki, dok pe amedo ki niaŋ iye wacel.