Daniel 6 - Acoli Baibul

Gibolo Daniel i kin lwak labwor

¹ Dario omoko tamme me keto luloyo madoŋo miya acel ki pyeraryo me bedo luloc i te kerre i kabedo ducu mapatpat.

² Ka dok oketo luloc madito adek me loyogi; i kin jo-nu onoŋo Daniel bene tye iye, dok luloyo madoŋo ducu myero guter lok ma mako ticgi bot luloc madito adek-ki, wek lim pa kabaka pe olannye ata.

³ Lacen ginoŋo ni Daniel dok kwiri mada makato luloc mukene madito aryo-ni woko, loyo wa rwodi-gu ducu, pien cwiny maber makato onoŋo tye i kome; doŋ omiyo kabaka obedo ki yub me keto en me loyo lobo ma i te kerre ducu.

⁴ Mumiyo luloc madito kacel ki rwodi gubedo ka yenyo yo ma myero ginoŋ ki bal i kom Daniel ma mako lok ker; ento pe gunoŋo ka cuŋo mo me dot kadi ki roc mo, pien Daniel onono obedo dano ma lagen, ma pe tye ki kit roc mo, dok lok mo me bal bene pe ginoŋo i kome.

⁵ Lacen jo meno guwacci, “Pe wabinono lok me doto Daniel nio ka wayenyo kit lok ma lubbe ki cik pa Lubaoŋne-ni.”

⁶ Ci luloc madito kacel ki rwodi magi guporo lok kacel ci guye woko lawaŋacel ka gua gubino bot kabaka guwacce ni, “Ai kabaka Dario, bed kwo nakanaka!

⁷ Luloc ducu madito me ker man, kacel ki ludito pa lwak, rwodi, lumitam ki luloc me dul lobo mapatpat guye lawaŋacel ni kabaka myero omok cik ki miyo twero ma pe gitwero lokone ni, ka ce gibinoŋo ŋat mo ka lego lubaŋa mo nyo ka woro dano mukene ma pe in kabaka, pinino pyeradekrdano macalo meno gibibolo woko i kin lwak labwor.

⁸ Pienno kombeddi in kabaka myero imok cik ci iket ciŋi i buk ma gicoyo iye cik ma pe giloko atata, kit macalo cik pa jo Medi ki Percia tye kwede, ma pe giloko atata-ni.”

⁹ Pi meno kabaka Dario oketo ciŋe i buk me cik kun moko cik man.

¹⁰ I kare ma doŋ Daniel oŋeyo ni giketo cin i buk me cik, oa ocito i ode odonyo i kicikane ma tye malo ma tye ki waŋ dirica, ci oyabo dirica ma okemo yo tuŋ Jerucalem; ci obedo ka rumo coŋe piny ka lega kun miyo pwoc bot Lubaŋane tyen adek nino ki nino, kit macalo yam con koŋ obedo ka timone-ni.

¹¹ Lacen jo-nu ‘gucako bino bot Daniel kit macalo onoŋo doŋ gutyeko yubone-ni, ci gunoŋo Daniel tye ka lega kun bako doge bot Lubaŋane.

¹² Ka gudok cen gucito i nyim kabaka, gunyiko cok ci gucako wacce lok ma dok i kom cik ma pe lokke-ni ni, “Ai kabaka, onoŋo mono pe iketo ciŋi i buk me cik ma pe lokke atata-ni, kun iciko ni ka ce gibinoŋo ŋat mo ka lego lubaŋa mo nyo ka woro dano mo mukene ma pe in kabaka, pi nino pyeradek, dano macalo meno gibibolo woko i kin lwak labwor?” Kabaka odok iye botgi ni, “Lok meno pud ocuŋ matek kit macalo cik pa jo Medi ki Percia tye kwede, ma pe gitwero lokone atata-ni.”

¹³ Ci gumedde ki tito lok bot kabaka ni, “Wanoŋo Daniel ma en ŋat acel i kin jo ma yam giyakogi ki i Juda, pe lubo cikki, ai kabaka, kadi wa cik ma pe lokke ma iketo iye ciŋi i buk-ki, ento bedo mere ka lego Lubaŋane tyen adek nino ki nino.”

¹⁴ I kare ma doŋ kabaka owinyo lok magi ducu, cwinye ocwer mada, obedo ki tam pi laro Daniel; ci obedo ka yelle matek ki tam i cwinye nio ka cen opoto, pi yenyo kit yo ma myero el are kwede.

¹⁵ Lacen jo magi dok gubino kacel bot kabaka, kit macalo onoŋo doŋ guyubo kwede, ci guwaco bot kabaka ni, “Ai kabaka, myero iŋe ni, man aye cik pa jo Medi ki jo Percia ni, cik mo ma kabaka doŋ omoko pe twero lokke.”

¹⁶ Cutcut kabaka omiyo twero, gicito gikelo Daniel ci gibolo woko i kin lwak labwor. Ci kabaka owaco bot Daniel ni, “Myero Lubaŋani ma iworo jwijwi-ni tin koŋ olari ba!”

¹⁷ Gikelo got acel madit ci giloro ki dog boro pa lwak labwor-ri woko, ka kabaka bene odiyo agit cine i odok ma gimwono ki got meno kacel ki agit ciŋ pa luditone me awora, ma moko ni myero pe gilok gin mo pi lok kom Daniel.

¹⁸ Lacen kabaka ocako dok i gaŋ kalle, obedo ka ri kec dyewor benebene; gin mo pe ma gitero bote me yomo cwinye, nino bene okwero mako waŋe woko.

¹⁹ I kare ma piny doŋ oyabbe odiko, kabaka oa malo ci okato woko ocito oyotoyot twatwal i dog boro pa labwor.

²⁰ Ka doŋ oo cok ki boro ka ma onoŋo Daniel tye iye-ni, ci odaŋŋe kun kok matek pi remcwiny, ci owaco bot Daniel ni, “Ai Daniel, latic pa Lubaŋa makwo, en Lubaŋani ma iworo jwijwi-ni mono doŋ otwero lari ki i dog lwak labwor magi?”

²¹ Daniel odok ki kabaka ni, “Ai kabaka, bed kwo nakanaka!

²² Lubaŋana ocwalo Lamalaika otweyo dog lwak labwor magi woko, mumiyo pe gumwoda woko, pien ginoŋo ni pe atye ki bal mo i nyime, kadi wa i nyimi bene, ai kabaka, pe atimo gin mo marac kadi ki acel.”

²³ Lok meno omiyo kabaka obedo ki yomcwiny matek, ci omiyo twero ni gikwany Daniel woko Kii boro pa labwor gikel woko ka maleŋ. Pe ginoŋo kadi latin ret mo i kome wacel, pien onoŋo en obedo ka geno Lubaŋane.

²⁴ Cutcut kabaka ociko ni gikel jo ma gudoto Daniel-li, ci gibologi woko i boro i kin lwak labwor, gin ducu kacel ki mongi wa ki litinogi. Doŋ ma pud peya gupoto piny i te boro, labwor ogamogi woko lamal likapkap ci gumwodogi gutyero ocogogi woko lipwacpwac.

²⁵ Lacen kabaka Dario ocoyo waraga bot lwak me rok ducu, ki rok mapatpat, kadi wa bot jo ma loko leb mapatpat ma gibedo i lobo ducu kun wacci, “Kuc myero onya omedde botwu.

²⁶ Aketo kombeddi cik ni, i kabedo ducu ma i te locca madit-ti dano ducu myero komgi omyel dok gubed ki lworo i nyim Lubaŋa pa Daniel, pien en aye Lubaŋa makwo, ma bedo nakanaka; kerre bene pe gituro, locce bene pe bigik.

²⁷ Lubaŋane laro dano dok konyogi bene, tiyo lanyut ki tano-gu i polo ki i lobo, en aye ma olaro Daniel ki i teko pa lwak labwor.”

²⁸ Mumiyo Daniel olimo gum ki lonyo madwoŋ i kare me loc pa Dario ki i kare me loc pa Ciro ma jo Percia.