Daniel 5 - Acoli Baibul

Coc ma gicoyo i kor ot

¹ Kabaka Belcajar otedo karama madit pi luditone me awora ma welgi romo alip acel, ci omato koŋo vino i nyimgi.

² I kare ma doŋ Belcajar obilo koŋo, ociko ni gikel kikopo jabu ki me ryal-gu ma yam wonne Nebukadnejar ocoko woko ki i ot pa Lubaŋa ma tye i Jerucalem-mi, wek en kabaka ki luditone me awora, kacel ki monne ki mon aŋecane ducu giti kwede me mato koŋo,

³ Ci gikelo jami magi me ryal ki me jabu ma yam giyakogi ki i ot pa Lubaŋa ma tye i Jerucalem; ci kabaka ki lwak luditone me awora, ki monne, ki mon aŋecane gumato kwede.

⁴ Gumato koŋo vino, kun gipako lwak lubaŋa me jabu ki me ryal, me mola, me nyonyo, me yat ki me got.

⁵ Cutcut gineno lwet cin dano mo ka tye ka coyo coc i kor ot ma i gaŋ kal pa kabaka, ma okemme ki okar mac; kabaka oneno ka ciŋ dano-nu tye ka coc.

⁶ Man omiyo wan kabaka olokke woko ki tamme bene omiyo cwinye opoto lilin; pyere otoŋŋe woko, ki coŋe aryo ducu gubedo ka gone kacel.

⁷ Omiyo kabaka okok ki dwan maloŋo ni gikel lukor tipo ki jo Kaldaya ki jo ma Jjiyo lok kom lakalatwe. Kabaka owaco bot luryeko ducu ma i Babilon ni, “ŋat mo ma bikwano coc man, ce ogonnya te lokke, gibiruko ki boŋo ma obedo lamar lamar, gibirwako nyor me jabu bene i ŋute, ci doŋ bibedo laloc me adek i te ker man.”

⁸ Ci luryeko pa kabaka ducu gubino gudonyo i ot bote, ento pe gutwero kwano coc ma i kor ot kadi ki gonyo te lokke bot kabaka bene oloyogi.

⁹ Man omiyo cwiny kabaka Belcajar opoto liliŋ, wa kome ducu oballe woko, ci luditone me awora guuro guŋeŋ woko ata.

¹⁰ I kare ma daker owinyo lok pa kabaka ki pa luditone me awora-gu ducu, obino odonyo i ot ka ma gitye iye ka camo karama; ci owaco ni, “Ai kabaka, bed kwo nakanaka! Pe myero iwek tammi omi cwinyi obed ka poto, dok pe iwek komi oballe.

¹¹ Tye dano mo i te kerri kany ma cwiny pa lubaŋa maleŋ-gu bedo i iye. I kare pa woru onoŋo yam ginanyuta me muŋ ducu ki niaŋ wa ryeko, macalo ryeko pa lubaŋa-gu ducu, ginoŋo ni en tye kwede, mumiyo woru, kabaka Nebukadnejar, okete me bedo dano ma loyo lutyet, lukor tipo, jo Kaldaya ki luryeko ducu ma ŋiyo lok i kom lakalatwe.

¹² Dano man Daniel, yam kabaka ocako nyiŋe ni Beltecajar, onoŋo tye ki cwiny maber makato, onoŋo bene tye ki ŋec wa ki niaŋ muromo me gonyo te lok me lek ducu, kun gonyo wa te lok macalo koc Lit-gu woko bene, dok cobo lok me peko mogo ma dano tye kwede. Kombeddi myero ilwoŋ Daniel obin, ci en aye bigonyo te lok man.”

¹³ Cutcut gikelo Daniel i nyim kabaka, Kabaka ocako lok ki Daniel kun penye ni, “In aye Daniel, ŋat acel i kin jo Juda ma yam wora omakogi ki i Juda ci okelogi kany-nyi?

¹⁴ Awinyo lok i komi ni cwiny pa lubaŋa maleŋ-gu tye i komi, dok bene ni it ye ki ryeko me nyuto muŋ mogo, ki niaŋ wa ki ryeko makato pa jo mukene.

¹⁵ Kombeddi onoŋo gikelo luryeko ki lukor tipo-gu i nyima ni gukwan coc man dok gumiya aŋe te lokke; ento pe gutwero nyutta te lokke.

¹⁶ Ento onoŋo awinyo ni itwero gonyo te lok mapol, dok bene icobo lok me peko ma dano tye kwede. Doŋ kombeddi ka ce itwero kwano coc man ki gonyo te lokke wek aŋe, ci gibiruki ki boŋo ma lamar lamar, gibirwako nyor me jabu bene i ŋuti, dok bene ibibedo laloc me adek i te ker man.”

¹⁷ Ci Daniel odok iye ki kabaka ni, “Gwok motti ducu obed piri giri, dok imi bakacic ma imito miya bot ŋat mukene; kadi bed pe agamo gin mo ma imiya pud abikwano coc man boti, kabaka, dok bene abigonyo te lokke iŋeyo.

¹⁸ Ai kabaka, Lubaŋa ma En Ŋat Mamalo Twal yam omiyo woru obedo kabaka ma loyo lobo, omiye bene dit ki deyo wa ki twero ducu.

¹⁹ Pi dit ma yam gimiye, oweko lwak me rok ducu ki rok mapatpat ducu ki jo ma loko leb mapatpat komgi omyel dok gubedo ki lworo i nyime. Ka yam cwinye omito ni enek dano mo ci neko mere aneka, ka omito ni ewek dano mo-ni obed kwo, ci weko bedo kwo; ka omito ni emi dit bot ŋat mo ci miyo, ka omito ni edwok rwom pa dano mo-ni piny ci dwoko bene.

²⁰ Ento i kare ma doŋ en ocako kette malo kekene ki i cwinye, omiyo cwinye odoko nwaŋ ci ocako loc ki wakke marac, omiyo gikwanye woko ki i wi komkerre, wa ki deyone bene gikwanyo woko ki i kome.

²¹ Giryeme woko ki i kin dano ci giloko tamme odoko macalo tam pa lee me tim, obedo ka camo lum calo twon, toyo ma a ki i po lo obedo ka dyako kome, nio ka oneyo ni Lubaŋa Mamalo Twal aye ma loyo ker pa dano, dok en bene aye ma keto ŋat ma cwinye mito me bedo laloc iye.

²² Doŋ in Belcajar, in wode kikome, ento pe ibedo mwol i cwinyi, kadi bed onoŋo iŋeyo lok man ducu.

²³ Ento ikette malo kekeni ci iette giri i kom Rwot me polo; dok jami ma yam gitiyo kwede i ode ducu gikelogi giketogi i nyimi, ci in kacel ki ludito me aworani, monni, ki mon aŋecani ducu wutiyo kwede me mato koŋo vino. Wubedo bene ka pako lwak lubaŋa me jabu, me ryal, me mola, me nyonyo, me yat ki me godi-gu, ma pe gineno piny, pe giwinyo lok, dok ma pe giŋeyo gin mo-ni. Ento in pe ibedo ka woro Lubaŋa ma omiyo kwo ki yweyo boti-ni, kun en bene aye ma gwoki i kit bedoni ducu.

²⁴ “Doŋ gicwalo ciŋ dano ki i nyime, ci ocoyo coc man.

²⁵ Coc ma gicoyo-ni onoŋo tye kit man: MENE MENE TEKEL PARCIN.

²⁶ Doŋ te lok man tye kit man: MENE, Lubaŋa doŋ otyeko kwano wel nino me kerri woko, dok onyuto bene ni agikkine doŋ cok.

²⁷ TEKEL, doŋ gipimi i mijan, ci ginoŋo ni pud iyot;

²⁸ PEREC, kerri gipoko iye woko ci gimiyo bot jo Medi ki bot jo Percia.”

²⁹ Cutcut Belcajar omiyo twero, ci giruko Daniel ki boŋo ma lamar lamar, ka girwako nyor me jabu i ŋute, ci gitito lok i kome oromo piny ducu ni en aye doŋ bibedo laloc me adekke i te ker me Babilon.

³⁰ I dyewor me nino meno kikome gineko kabaka Belcajar woko.

³¹ Ci Dario ma jo Medi oleyo ker, ma doŋ mwaka me ditte romo pyerabicel wiye aryo.