Daniel 2 - Acoli Baibul

Daniel ogonyo te lek pa kabaka Nebukadnejar

¹ I mwaka-me aryo me loc pa kabaka Nebukadnejar, Nebukadnejar oleko lek; obedo ka yelo cwinye mada ma nino bene pe mako waŋe,

² Ci kabaka ociko ni gilwoŋ lutyet, lukoi tipo-gu ki lutal ducu kacel ki jo Kaldaya ka gonyo te lekke. Ci gubino gudonyo i ot gucuŋ i nyim kabaka.

³ Kabaka ocako waco botgi ni, “Aleko lek, ento cwinya obedo ka yelle mada ma amito ni aŋe te lekke.”

⁴ Cutcut jo Kaldaya guwaco ki kabaka ni, “In kabaka bed kwo nakanaka! Doŋ itit lek meno botwa wan luticci ci wabigonyo tere boti.”

⁵ Kabaka odok iye bot jo Kaldaya ni, “Lok ma aloko bedo me ada. Ka ce pe wumiyo aŋeyo lek man, kacel ki tyen lokke, ci gibinidowu woko matitino, dok bene gibimuko odiwu wo ko ducu doko wi obur.

⁶ Ento ka wumiyo aŋeyo lek man kacel ki tyen lokke, ci wubigamo mot ki bakacic ki bota kun wulimo bene woro madwoŋ, Pi meno myero wunyutta lek man ki tyen lokke.”

⁷ Gudok iye tyen me aryone ni, “Wek kabaka koŋ onyut botwa lekke wan luticce, ci wabinyuto tyen lok me lekke bene.”

⁸ Kabaka ogamo ni, “Aŋeyo adada ma pe akalo akala ni wun wumito medo kare ameda, pien wuneno atir lok ma aloko bedo me ada.

⁹ Ka pe wumiyo aŋeyo lek man, tye mere cik acel keken mumakowu. Wun doŋ wutyeko ye me loko bota lok goba ma nyayo tim me bal keken nio wan ma kare olokke. Pi meno wutitta lek man, ci miyo abiŋeyo ni wun kara wutwero nyutta tyen lok me lekke.”

¹⁰ Jo Kaldaya gudok iye ki kabaka ni, “Pe tye dano mo kadi ki acel i lobo ma twero co bo miti pa kabaka; dok bene pe tye kabaka mo madit nyo matek twatwal ma openyo lutyet, lukor tipo nyo jo Kaldaya mo ki kit peny macalo meno.

¹¹ Lok ma kabaka openyo-ni lokke tek, pe tye nar mo ma twero nyuto bot kabaka kono lubaŋa-gu ma kabedogi pat ki pa dano.”

¹² Lok man omiyo kiniga omako kabaka, odoko ger marac; cutcut ociko ni ginek co maryek ma gibedo i Babilon woko liweŋ.

¹³ Ci gitito pi cik man oromo i lobo ducu ni myero ginek co maryek woko, guyenyo Daniel ki lureme bene wek ginekgi woko,

¹⁴ Lacen Daniel oloko lok ki ryeko ki tam maber bot Ariok, ma onoŋo en aye ladit ma loyo askari ma gigwoko kabaka, ma onoŋo okato woko ocita ka neko luryeko ma i Babilon,

¹⁵ Daniel openyo Ariok ni, “Piŋo cik pa kabaka bedo magwa kit man?’ Ci Ariok otito lok meno bot Daniel.

¹⁶ Lacen Daniel ocito odonyo bot kabaka olege me miye kare mo, wek enyut te lok me lek meno bot kabaka.

¹⁷ Lacen Daniel odok cen i ode ci ocako tito lokke bot luwote Anania, Micael ki Ajaria,

¹⁸ Otito botgi ni guleg kica ki bot Lubaŋa me poloma mako lok me muŋ man, wek en Daniel ki luwote-gu pe ginekgi woko kacel ki luryeko mu kene me Babilon.

¹⁹ Lacen ginyuto lok me muŋ man bot Daniel i ginanyuta i dyewor. Mumiyo Daniel opwoyo Lubaŋa me polo mada.

²⁰ Daniel owacci, “Gipwo Lubaŋa ki nyiŋe nakanaka, pien ryeko ki tek tye bote.

²¹ En aye ma loko cawa ki kare me cwir nyo me oro, en aye ma kwanyo luker woko ki i kergi ci keto luker manyen me leyo ka tyengi; en miyo ryeko bot jo maryek dok miyo ŋec bot jo ma twero niaŋ maber.

²² En nyuto gin ma tye ka matut’ ki gin mukanne i muŋ en nyuto woko ka maleŋ; dok ŋeyo gin ma tye i colpiny, ki leŋo bene bedo bote.

²³ Ai Lubaŋa pa kwarowa, amiyo pwoc ki pak boti, pien in aye ma imiya ryeko ki tekkom, kombeddi doŋ imiyo waŋeyo gin ma onoŋo wapenyo pire bati, pien doŋ imiyo waŋeyo lok pa kabaka.”

²⁴ Mumiyo Daniel ocito bot Ariok, ma en dano ma kabaka oyero ni onek luryeko me Babilon otyek woko ducuni; ci owaco bo te ni, “Pe inek luryeko me Babilon ityekgi woko; tera i ot i nyim kabaka, ci abinyuto bot kabaka te lok me lekke.”

²⁵ Ariok orune oyotoyot ki myelkom otero Daniel i ot i nyim kabaka, ci owaco bot kabaka ni, “Anoŋo dano mo ki i kin opii ma gikelogi ki i Juda ma twero gonyo te lok me lekki-ni.”

²⁶ Kabaka openyo Daniel ma gilwoŋo bene ni Beltecajar ni, “Itwero nyutta gin ma aneno i lekke, dok itwero gonyo te lok me lekka-ni?”

²⁷ Daniel odok iye ki kabaka ni, “Pe tye luryeko mo, lukor tipo, nyo lutyet kadi ki wa jo ma niyo lok kom lakalatwe ma gitwero nyuto kit muŋ mukanne macalo man bot kabaka ma onoŋo kabaka openyo pire-ni.

²⁸ Ento tye Lubaŋa mo i polo ma nyuto kit muŋ ducu mukanne, en aye mumiyo kabaka oneyo lok ducu ma bitimme i kare ma pud tye anyim. Doŋ lek ma ileko-ni ki ginanyuta ma obino i wii i kare ma ibuto piny i wi ki tanda gin ene:

²⁹ I kare ma ibuto i wi kitanda, ai kabaka, tam obino i wii ma nyutti gin ma bitimme i kare me anyim, doŋ en ŋat ma yabo muŋ ducu mukanne woko ka maleŋ-ŋi, onyuto boti omiyo iŋeyo gin ma bitimme.

³⁰ Ento ki tuŋ bota ginyutta muŋ man mukanne, pe te lokke ni an aryek akato gin makwo ducu, ento wek agony te lok me lek man wek in kabaka iŋe, ki dok bene wek iŋe tam ma tye i cwinyi.

³¹ “Ai kabaka, yam ineno cal mo ma gitiyo ki cin. Cal man dit dok ryeny matek mukato kare, Ocuŋ i nyimi; doŋ kit ma nen kwede mi yo lworo ma ko dano.

³² Wi cal man gitiyo ki jabu ma giliyo maberre, kore ki bade ducu gitiyo ki ryal, ki doŋ iye ki eme gitiyo ki mola.

³³ Ooto tyene gitiyo ki nyonyo, ki’ tyene ma gicibo kwede piny gitiyo dulle mogo ki nyonyo ki mogo gicweyo ki lobo.

³⁴ I kare ma ineno, got obar ci otyer woko kekene ma pe dano aye otyero ki ciŋe, ci cutcut ocelo cal meno woko i tyene ka ma gitiyo ki nyonyo ki ma gicweyo ki lobo, ci oŋidogi woko matitino.

³⁵ Meno omiyo nyonyo, lobo, mola, ryal ki jabu ducu guŋinnye woko matitino, ci gudoko calo cun kai ma i laro moyo me oro, ma yamo doŋ otinogi oterogi woko, ma pe dok gitwero yenyo yogi ginoŋo. Ento got meno ma ocelo cal-li olokke odoko twon got madit mada ma poŋo lobo woko ducu.

³⁶ “Meno aye lekke; kombeddi doŋ wabigonyo te lek bot kabaka,

³⁷ Doŋ in kabaka, in aye kabaka ma loyo luker ducu, dok Lubaŋa me polo aye mumiyo icamo ker, en mumiyi twero ki tek, wa ki deyo bene,

³⁸ dok omiyo dano ducu, lee tim ki winyo me polo ducu i ciŋi, ka ma gibedo iye ducu; omii twero me loyogi liweŋ, in aye ibedo latel wic me jabu,

³⁹ Lacen i ne locci, ker mo matidi twatwal bicakke, ma kabakane tidi in iloyo ki dit, ka lacen bibedo ker me adek me mola, ma biloyo lobo ducu.

⁴⁰ Ka dok ker me aŋwenne bicakke ma bibedo matek calo nyonyo, pien nyonyo turo jami ducu, dok nidogi woko matitino, ci tyekogi woko liweŋ; kit macalo nyonyo ŋinyo kwede jami, en bene bituro ci ŋinyo ker mukwoŋo-gu woko ducu.

⁴¹ Kit macalo ibedo ka neno dul tyene ki lwet mogo gitiyo ki lobo pa lacwe agulu, ki dulle mogo gitiyo ki nyonyo, meno ker mupokke; ento nyonyo mogo ma miyo cuŋ matek bibedo i kine, kit macalo wuneno nyonyo ma orubbe ki lobo daba-ni.

⁴² Kit macalo Lwet tyene dulle mukene gitiyo ki nyonyo ki mukene gitiyo ki lobo, kit meno bene ker man bibedo matek i kare mogo ki dok bibedo goro adada ci tur woko i kare mukene.

⁴³ Kit macalo ineno nyonyo orubbe woko ki lobo daba-ni, gibirubbe woko bene kit meno kun ginyomme i kingi kekengi, ento bedo maber kacel pe bibedo tye i kingi, kit macalo nyonyo bene pe rubbe ki lobo-ni.

⁴⁴ Dok i kare pa luker meno Lubaŋa me polo biketo ker mukene ma ri nakanaka ma pe gitwero balone, kadi dit me locce bene pe gibiweko i ciŋ rok mukene. Ker meno manyen-ni bituro ker magi ducu ŋidogi woko matitino, ci tyekogi woko ducu, en aye doŋ bicuŋ bedo matwal,

⁴⁵ kit macalo ineno maca obar otyer woko ki i kom got madit ma pe dano aye otyero ki cine, ci oturo nyonyo, mola, lobo, ryal ki jabu oŋidogi woko ducu matitino. Lubaŋa madit doŋ otyeko nyuto bot kabaka gin ma bitimme i kare me anyim. Lekke obedo alfu ki te lokke bene tye atir.’ ”

⁴⁶ Cutcut kabaka Nebukadnejar oryebbe piny, omiyo woro bot Daniel, ka doŋ ociko ni myero gikel gityer ki odok eceta gibed ka tyerone bot Daniel.

⁴⁷ Kabaka owaco bot Daniel ni, “Ada, Lubaŋani-ni aye Lubaŋa ma loyo lwak lubaŋa-gu ducu, dok en bene Rwot ma loyo luker ducu, en ŋat ma nyuto muŋ ducu mukanne woko ka maleŋ, pien in bene ibedo ki twer me nyuto muŋ man mukanne-ni.”

⁴⁸ Lacen kabaka omiyo deyo mamalo ki mot madwoŋ bot Daniel, ka okete me bedo laloc i lobo ducu me Babilon, dok bene me bedo ladit ma loyo luryeko ducu ma tye i Babilon.

⁴⁹ Daniel olego kabaka, ci kabaka bene oye legane omiyo en oyero Cadrak, Mecak ki Abednego, oketogi me bedo ludito ma loyo lwak ki ne no lok ducu ma timme i lobo Babilon. Ento Daniel obedo mere i gaŋ kal pa kabaka.