Daniel 1 - Acoli Baibul

Pwonnye pa Daniel ki pa lureme

¹ I mwaka me adekke me loc pa Yekoyakim kabaka me Juda, Nebukadnejar kabaka me Babilon obino i Jerucalem ci orumo woko,

² Rwot omiyo Yekoyakim kabaka me Juda i ciŋe, ci Nebukadnejar okwanyo jami mo go ma gitiyo kwedgi i ot pa Lubaŋa, oterogi woko i lobo Cinar, oketogi i ot pa lubaŋane, ka oketo jami magi i ot kano lim pa lubaŋane,

³ Cutcut kabaka ociko Acipenaj ma en ladit ma loyo jo ma gikologi, me kelo dano mogo ki i kom jo Icrael, jo ma gin litino ker kacel ki litino pa jo ma gin luye,

⁴ awobe ma komgi pe ki mwonyo, jo mabeco ma gupwonnye i kit ryeko ducu, dok ma gikwiri, ki jo ma tye ki ŋec muromo, ma gitwero tic i gaŋ kal pa kabaka, ki me pwonyogi ki nukuta ki leb pa jo Kaldaya,

⁵ Kabaka omiyogi ca mo cam maheco nino ducu, kit cam ma en ecamo-ni, ki mato koŋo yiŋo ma yam en mato-ni, Myero gibed ka pwonyogi pi mwaka adek; i agikki mwaka meno ka doŋ gikelgi gucuŋ i nyim kabaka.

⁶ I kin jo magi onoŋo tye iye Daniel, Anania, Micael, ki Ajaria ma gin ducu dano me kaka pa Juda.

⁷ Ci ladit ma loyo jo ma gikolo ocako nyiŋgi kit man: Daniel olwoŋo ni Beltecajar, Anania en olwoŋo ni Cadrak, Micael olwoŋo ni Mecak, ki Ajaria doŋ en olwoŋo ni Abednego.

⁸ Ento Daniel omoko tamme pe me camo gin me kwer me cam mabeco pa kabaka-ni, kadi ki me balo kome ki koŋo viŋo ma kabaka mato-ni; pi meno openyo ladit ma loyo jo ma gikologi ni oye tamme-ni wek pe ebal kome kekene,

⁹ Ci Lubaŋa omiyo gum ki kica bot Daniel i nyim ladit ma loyo jo ma gikolo,

¹⁰ Ento ladit ma loyo jo ma gikolo owaco ki Daniel ni, “Alworo rwoda kabaka, ma oyero cam ma myero wucam ki ginamata-gu; ka oneno ni komwu pe yot ma rom ki kom awobe wadiwu ma mwaka me ditogi bene rom ki mewu, ci wubimiyo kabaka neka woko,”

¹¹ Lacen Daniel owaco ki lakan jami ma onoŋo ladit ma loyo jo ma gikolo oyero me gwoko Daniel, Anania Micael ki Ajaria ni,

¹² “Koŋ itemwa pi nino apar, ladit, wek gibed ka miyowa dek ŋor aye wacam ki pii amata keken,

¹³ Ka wek lacen doŋ inen komwa ci ipor ki kom awobe ma gicamo cam mabeco ma kabaka bene camo-ni, ka doŋ iti giri kwedwa kit macalo ineno,”

¹⁴ Ladit ma loyo jo ma gikolo owinyo lok meno ma gititte-ni, ci otemogi kumeno pi nino apar.

¹⁵ I agikki me nino apar gineno ni komgi leŋ dok gucwe bene makato awobe ma ca ma gicamo cam pa kabaka mabeco-ni,

¹⁶ Cutcut lakan jami okwanyo cam mabeco-gu ki koŋo vino ki botgi, ci omiyo dek ŋor botgi wek gucam.

¹⁷ Lubaŋa omiyo pwonnye ma malo bot awobe magi aŋwen, i kit kwa nukuta ducu, omiyo gubedo kwiri i lok ducu ki i ryeko ducu, kun Daniel onoŋo niaŋ i ginanyuta ki lek-gu ducu,

¹⁸ I agikki me kare meno, ma kabaka doŋ ociko ni gikelgi i nyime, ci ladit ma loyo jo ma gikolo okelogi i nyim kabaka Nebukadnejar.

¹⁹ Gubino gucuŋ i nyim kabaka, ci kabaka oloko kwedgi; i kingi ducu pe ginoŋo ŋat mo kadi ki acel ma rom ki Daniel, Anania, Micael ki Ajaria.

²⁰ Doŋ i kwa lok ducu ma kabaka openyogi kwede, onoŋo ni gikato lutyet ki lukor tipo ducu ma tye i te kerre tyen apar kulu.

²¹ Ci Daniel omedde ki bedo kunnu nio wa i mwaka mukwoŋo me loc pa Ciro.