Carolok 9 - Acoli Baibul

Lwoŋo pa ryeko ki miŋo pa dako ma lamiŋ

¹ Ryeko otyeko gero ode, ocibo iye wir ma romo abiro.

² En oneko lee pi karama me donyo iye, oonyo koŋo vinone, dok oyubo jami ducu oketo i wi meja.

³ Doŋ ocwalo aŋecane ma gucito ka lwoŋo dano ki i kabedo ma tye malo twatwal ma i gaŋ madit, kun giwacci,

⁴ “Wubin kany, wun lumiŋ!” Bot ŋat ma wiye odiŋ en wacci,

⁵ “Bin icam kwonna, dok imat koŋo vino ma aonyo-ni.

⁶ Wek miŋ obedi, ci ibibedo kwo, dok bene ibibedo ki niaŋ matut.”

⁷ Dano ma mito ni ejuk laŋala, laŋala nywaro woko anywara, ki ŋat ma mito ni ejuk latim marac, ci latim marac dok keto ret i kome.

⁸ Pe myero ijuk ŋat ma laŋala, pien miyo bikweri woko; juk dano maryek, ci bimari.

⁹ Pwony dano maryek, ci ryekone bimedde ameda; pwony dano ma kite tye atir ci en bimedde ameda ki pwony meno.

¹⁰ Ka dano lworo Rwot, ci cako noŋo ryeko; dano ma ŋeyo Ŋat Maleŋ bibedo ki niaŋ matut.

¹¹ Ryeko bimiyo nino me kwoni nya doko mapol; dok bimedo mwaka me kwoni, miyo iri i lobo.

¹² Ka ce iryek, ci in kikomi aye ma ibinoŋo berre; ento ka ibedo laŋala, ci meno bene biketo peko i komi keni.

Dako ma latarwaŋ

¹³ Dako ma lamiŋ nino ducu wo twatwal; dok en ŋat ma waŋe tar ma pe lewic mako.

¹⁴ En bedo i doggolane, nyo i kabedo ma malo ma tye i gaŋ madit,

¹⁵ ci cako lwoŋo jo ducu ma gikato ki kenyo, ma noŋo gitye ka wot me cito anyim i yo wotgi, ni,

¹⁶ “Ŋat ma lamiŋ myero olokke obin kany!” Bot ŋat ma wiye odiŋ en waco ni,

¹⁷ “Pii akwala lim matek, ki kwon ma icamo i muŋ bene yomo cwinyi mada.”

¹⁸ Ento laco meno pe ŋeyo ni jo ducu ma gicito bot dako-nu gito woko, jo ma gucito bot dako-nu ducu guto giyikogi i lyel.