Carolok 7 - Acoli Baibul

Lok bwola pa dako ma lakwele

¹ Latinna, mak lokka, dok ikan gin ma an aciki kwede ducu macalo lonyo madit.

² Lub cikka wek ibed kwo, gwok lok ma apwonyi kwede kit macalo igwoko kwede waŋi,

³ Gwokgi maber kare ducu, cogi woko ducu i cwinyi.

⁴ Myero iwac ki ryeko ni, “In lamera”, ki niaŋ matut bene myero ilwoŋ ni laremi ma imaro adada.

⁵ Man bigwoki me bedo ki tam i kom dako ma lakwele, man bimiyo iloyo tam pa dako ma lalak ata, kadi bed noŋ loko lok mamit calo gin aŋo.

⁶ I kare ma ayabo waŋ dirica me oda, ci aneno piny wa ki i waŋ dirica me kicikana.

⁷ Aneno lwak jo matino ma pe gitye ki ŋec mo wacel; aneno i kin jo magi matino, awobi mo ma lamiŋ atika.

⁸ En obedo ka wot ki i yo kun kato ki i twok ot pa dako ma lakwele, kun lubo yo ma cito i ot pa dako meno,

⁹ wi otyeno, ma piny aŋa kato-ni, i dyewor ma onoŋo piny doŋ col.

¹⁰ Nen, dako mo orwatte kwede, ma orukke calo lakwele kikome ma cwinye opoŋ ki lok me bwola.

¹¹ En dano ma lewic pe make, lawot ata, kome pe ye bedo gaŋ kacel;

¹² ka pud ineno tye ka wot i gudo koni dok ineno noŋo opille wa i cuk, i twok yo ducu buto kuro piny.

¹³ Ka oneno laco ci mwomme mako woko likiŋ, noto leme, kun nenowaŋe atir laboŋo lewic mo, ka wacce ni,

¹⁴ “Atyeko tyero gitum tin, dok tin acobo kwoŋŋa;

¹⁵ kombeddi an abino ka rwatte kwedi, ayenyi ki cwinya ducu, ci doŋ anoŋi.

¹⁶ Atyeko peto cuka i wi kitandana, boŋo cuka ma raŋigi patpat ma gikelogi ki i Ejipt;

¹⁷ dok atyeko kiro moo murra I kom kitandana, akiro bene moo ma ŋwece kur ki cinamon mamit.

¹⁸ Bin, wek wabed kacel nio odiko ki mar keken; wek wabed ki yomcwiny pi mar ma watye kwede.

¹⁹ Cwara tin pe paco; ocito woko welo i wot mabor.

²⁰ Omako lim ki kicaane ducu ocito kwede; en bidwogo paco kany ka dwe ogudo got.”

²¹ Dako-nu obedo ka bito nyer-ri ki lwak lok gobagoba mapol ata; olo twal odiyo laco meno ki lokke mapwot-ti.

²² Cutcut nyer-ri otuggi lubo kor dako-nu, calo twon ma gipeyo gitero ka nekone,

²³ nyo macalo til ma omoko i owic, nio ka atero ocelo cin iye otuco woko pil. Bedo calo winyo ma riŋo laro i owic; en pe ŋeyo ni tim macalo meno bimiyo erwenyo kwone kulu.

²⁴ Kombeddi wun litino, wuwiny lokka, wucik itwu maber ka winyo lok ducu ma katti ki i doga.

²⁵ Pe myero iwek cwinyi obiti me lubo kit kwo pa dako-nu, pe iŋak ilub kore

²⁶ Dako-nu oneko lwak co mapol ata; ada, jo ma en onekogi welgi pe kwanne.

²⁷ Ode ma en bedo iye-ni meno mere lyel, meno aye yo ma tero dano i to.