Carolok 6 - Acoli Baibul

Lok me juko wackom ki goba

¹ Latinna, ka in iye me cuŋ pi lawoti, dok ijeno jamini pi dano mo ata,

² lokki ma iloko odoko owic piri, pien noŋo gimako lok ki i dogi.

³ Pi meno, latinna, tim kuman, ci ibilaro kwoni, pien kombeddi doŋ ipoto i ciŋ lawoti; cit oyotoyot ibak dogi bote.

⁴ Pe myero iniŋ, pe myero waŋi omak nino ma miyi yweyo matek;

⁵ lar komi macalo til ma riŋo laro kome ki bot ladwar, macalo winyo ma tuk woko ki i owic pa ladwar,

⁶ In lawackom, nen kit ma ŋiniŋini tiyo kwede; mito koŋ ibed ki ryeko me neno kite.

⁷ Pe gitye ki rwot mo, kadi ladit nyo laloc mo;

⁸ giyubo cam me akana i kare me oro, dok gicoko wit cam mapatpat i kare me kac.

⁹ In lawackom mono, ibibedo ka buto abuta pi kare ma Tom mene? Ibico awene ki i waŋ nino?

¹⁰ Ka ibuto inino manok, dok idolo ciŋi woko omiyi yweyo,

¹¹ man bimiyo can maki kit macalo layak mako kwede dano, ma noŋo orukke woko ki jami lweny.

¹² Dano marac, ma konnye pe, woto mere atata ki lok me bwola keken,

¹³ kun gayo dano ki waŋe, dok gwelo ki tyene, ka doŋ cimo piny atata ki lwete,

¹⁴ ma noŋo en tye ki cwiny muŋak mupoŋ ki tam maraco keken, dok miyo en tubo dano teretere.

¹⁵ Pi meno can bipoto i kome atura; pi kare manok keken ret bimake ma pe doŋ bicaŋ.

¹⁶ Rwot dag jami ma romo abicel, tye jami abiro kulu ma gin ducu gin me kwer ki tuŋ bote:

¹⁷ en dag dano ma tamo ni eryek pire kene, ma loko lok goba, en bene dag jo ma gioyo remo pa jo ma pe ki bal.

¹⁸ Rwot dag dano ma cwinye opoŋ ki yub me timo gin marac, ki jo ma giriŋo oyotoyot ka tiyo gin marac,

¹⁹ en dag bene caden ma loko lok goba, ki ŋat ma tubo omegine.

Lok ma juko timo abor

²⁰ Latinna, myero ilub gin ma woru otito boti, dok pe ibwot pwony pa menni.

²¹ Ket lok magi ducu i cwinyi kare ducu; gwok lok magi macalo igwoko gin mo ma itweyo i ŋuti.

²² Lok magi gibiteli i wotti; kadi ka ibuto piny bene gibikuri i kom gin marac; dok ka ico ki i waŋ nino gibipwonyi kit ma myero ibed kwede.

²³ Cik tye macalo tara, ki pwony bene tye macalo ceŋ ma ryeny, doŋ pwony me yubo kit pa dano en aye yo me kwo,

²⁴ Lok magi gibimiyo igwokke ma pe ibedo ki dako ma kite rac, man bimiyo iloyo tam pa dako ma lakwele.

²⁵ Pe myero cwinyi opar pi berre-ni, dok pe iwek waŋe ma en neni kwede oywa tammi.

²⁶ Laco mo keken twero wilo dako ma lakwele ki mugati acel ci bedo kwede, ento tim me abor twero balo kwo pa laco ma bedo ki dako pa ŋat mukene.

²⁷ Dano twero kwanyo mac keto i kore, ci mac pe waŋo boŋone woko?

²⁸ Aŋa ma twero wot i lodi mac ma tyene pe biwaŋ woko?

²⁹ ŋat ma cito bedo ki dako pa lawote bene limo-can kit meno; pe tye ŋat mo ma bwot ma pe giketo can i kome, ka obedo ki dako pa lawote.

³⁰ Dano pe gicayo lakwo ka okwalo cam ma noŋo kec neke kun mito eyeŋ?

³¹ ka ce gimako en lakwo-nu, en biculo cul ma romo wan abiro kulu; dok bimiyo jami ma i ode woko ducu pi cul.

³² Dano ma timo abor noŋo pe ryek; ŋat ma tiyo gin macalo meno kelo can i kome kene,

³³ Dano gibiketo ret i kome dok gibicaye, dok cwercwiny me can ma en bilimo pe biwany ki i cwinye.

³⁴ Dano ma tye ki nyeko bedo ki kiniga madwoŋ, ma ka oero lweny ci neko dano cut, noŋo pe ye juk.

³⁵ En pe biye kit cul mo kadi ki acel, dok kadi gimiye lwak mot mapol, magi ducu pe twero juko kinigane.