Carolok 5 - Acoli Baibul

Lok me juko tim me abor

¹ Latinna, ket cwinyi ka winyo lok me ryekona, cik iti bene ka winyo kit ma niaŋŋa tye kwede;

² miyo ibiŋeyo kit kwo ma mitte, dok lok ducu ma ibiloko binyuto ada ni, kara it ye ki ŋec,

³ Dako ma lakwele mere kite enu, lok doge lim calo kic, noŋo lokke bene pwot kato moo woko;

⁴ ento i agikkine inoŋo doko kec macalo yat roka, ma noŋo bit ryoryo calo pala lucwan.

⁵ Dako-nu biteri wa i lyel; yo ma en woto ki iye cito i to keken.

⁶ En pe tye ka lubo yo ma tero dano ikwo; tye ka cabbe atata kwone kun en bene pe ŋeyo.

⁷ Litino, kombeddi doŋ wuwiny lokka; pe myero wuweki, dok wiwu pe owil i lok ma awaco,

⁸ Pe icit bot dako ma lakwele-ni, pe icit cok ki doggolane.

⁹ Ka itimo kumeno, ci woro ma yam gimiyo boti bidoko pa jo mukene, dok jo ma pe gin lukica gibineki woko ma noŋo mwaka me toni peya oromo.

¹⁰ Ji ata gibiyako lonyoni woko ducu, gin ma ibedo ka tic pire matek larok bitero woko ducu;

¹¹ meno bimiyo icur i kare ma noŋo doŋ icok to, ma noŋo riŋo komi kacel ki cogoni gibijuŋŋe woko.

¹² Doŋ ibiwacci, “Piŋo akwero winyo lok me pwony, dok abedo ka cayo lok me juk ki i cwinya?

¹³ Pe abedo ka winyo lok ma lupwonnya gubedo ka pwonya kwede, ada pe awinyo lokgi.

¹⁴ Cutcut anoŋo ni nyiŋa doŋ oballe woko, dok lwak ma gucokke ducu gicayo an acaya.”

Gum ma ibilimo pi bedo ki dakoni keni

¹⁵ Mat pii ma a ki i taŋi meri kikomi, ki pii ma mol bene ma a ki i waŋ it meri kikome.

¹⁶ Pe myero iwek pii ma tye i waŋ it meri ducu omol oket woko ata, ma piine mol poŋ wa i yo-gu ducu.

¹⁷ Wek piine obed meri keken me konyi, ento pe obed me konyo ji ata.

¹⁸ Gum obed i kom dakoni ma inyomo ka tinoni ma en waŋ it meri, dok cwinyi myero obed yom i kome,

¹⁹ en dako ma nen mwonya mada, ma yomo cwinyi atika, Nen berre wek oyomcwinyi i kare ducu, kare ducu wek mar mere olo kwoni.

²⁰ Latinna, piŋo imiyo gibwoli kun imaro dako ma malaya? Piŋo ikwako kor dako ma lakwele?

²¹ Rwot ŋeyo kit kwo pa dano acel acel, dok neno ka ma en cito iye ducu.

²² Bal pa ŋat marac tye macalo owic ma mako tyene, bal ma en timo-ni aye mako en,

²³ En to pien pe twero jukke kene, doŋ en rwenyo woko ki miŋo madit ma en tye kwede.