Carolok 4 - Acoli Baibul

Gin maber ma ryeko kelo

¹ Litino, wuwiny pwony ma wonwu pwonyowu kwede, wuket cwinywu ka winyone, miyo wubibedo ki niaŋ matut.

² Gin ma atye ka pwonyowu kwede en gin maber mada; pe myero wubwoti, ento wiwu opo iye.

³ I kare ma onoŋo an pud latin matidi, ma pud abedo latin acel keken bot maa,

⁴ wora obedo ka pwonya, kun wacca ni, “Ket lok ma apwonyi kwede-gu ducu i cwinyi; lub cikka wek ibed kwo.

⁵ Wii pe owil, dok bene pe myero ibwot lok ma apwonyi kwede. Noŋ ryeko kacel ki niaŋ matut.

⁶ Myero imar ryeko, pe ikwer; pien en bigwoki miyo ibedo maber laboŋo ayela mo,

⁷ Kit ma itwero doko ryek kwede ene: Noŋ ryeko, ket cwinyi wek ibed ki cwiny me niaŋ makato jami mukene ducu.

⁸ Mar ryeko, ci en bimiyo idoko dit; ka ce imako maber, ci bimiyi deyo.

⁹ Ryeko bikelo deyo boti, bimiyo dano giwori.”

¹⁰ Latin, koŋ iwiny lokka dok iket bene i cwinyi, ci ibiri i lobo pi mwaka mapol.

¹¹ Doŋ atyeko pwonyi ki yo me ryeko, atyeko nyuto boti bene kit yo me bedo ki kwo ma tye atir.

¹² Gin mo pe ma birine i nyimi ka ce it ye ka wot ki ryeko; ka ibinwec, ci pe ibitwomme atata.

¹³ Mak pwony ma gimiyoni-ni matek, pe iwek obwoti; gwok maber, pien meno aye kwoni.

¹⁴ Pe ilub yo pa jo maraco, pe ilub kit kwo pa jo ma gin lutim maraco.

¹⁵ Gwokke, pe iwot ki i yogi; lokke iwek timo gin marac, ci iwot meri anyim.

¹⁶ Jo maraco pe gitwero nino ka peya gutimo tim marac; dok pe gitwero nino ka ce peya gumiyo dano mo opoto i can.

¹⁷ Timo tim maraco odoko calo cam ki botgi ki timo bwami bene odoko calo koŋo vino ma gimato-ni.

¹⁸ Ento yo pa jo ma kitgi atir calo dero me rupiny, ma ryeny nio waŋ ma piny doŋ leŋ.

¹⁹ Yo pa jo maraco col calo dyewor; ka gupoto bene ci pe giniaŋ gin ma noŋo oyokogi.

²⁰ Latinna, ket cwinyi i lokka; winy gin ma an awaco,

²¹ Pe myero iwek orweny woko ki boti; myero igwok i cwinyi.

²² Lok magi gimiyo kwo bot ŋat ma owinyogi, dok caŋo two ma i kome woko ducu.

²³ Gwokke i kom tam ma itamo ki i cwinyi ducu; pien kwoni ducu a ki i lok ma icwinyi.

²⁴ Pe myero ibed ka loko lok mugom, wek loko lok goba bene obedi.

²⁵ Myero inen anyim atir, dok icik waŋi me neno jami ducu ma tye anyim.

²⁶ Myero iŋi gin ma ilubo, ci bimiyo gin ma itiyo ducu bedo atir.

²⁷ Pe iŋak idok tuŋ acuc nyo tuŋ acam; lokke, pe imar timo gin marac.