Carolok 3 - Acoli Baibul

¹ Latinna, pe myero wii owil i kom pwony ma apwonyi kwede, ento gwok cikka i cwinyi;

² pwonnya ducu bimiyi iri i lobo pi kare malac, pi mwaka mapol, ki dok bimiyo ibedo ki kuc ki lonyo madwoŋ.

³ Pe ibwot ada ki gen ma itye kwede; twegi gubed i ŋuti, dok icogi i cwinyi macalo icoyo i kom got.

⁴ Kit meno ibinoŋo gum ki kit maber i waŋ Lubaŋa kacel ki i waŋ dano.

⁵ Gen Rwot ki cwinyi ducu, pe ibed ka jeŋŋe i kom niaŋ ma itye kwede.

⁶ I kit kwoni ducu wii myero opo i kom Rwot, ci en bitiro yo ma iwoto iye bedo atir.

⁷ Pe myero ibed ka tamo kekeni ni iryek; lwor Rwot, ci ilokke iwek timo gin marac.

⁸ Meno aye yat ma bicano two ki i komi, dok bimiyo cogoni gibedo matek,

⁹ Wor Rwot ki lonyoni ma itye kwede ducu, dok ityer cam mukwono cek i potoni me wi mwaka;

¹⁰ ci deroni bipoŋ ki cam madwoŋ, ki koŋo vino ma ipiko i opoko bityero opoko ci mol woko liweŋ.

¹¹ Latinna, pe myero ica juk pa Rwot, myero imak lok ma en yubi kwede macalo lok me poyo wii,

¹² pien Rwot pwonyo dok yubo ŋat ma en maro, en tye macalo wego ma pwodo latin ma cwinye maro adada.

¹³ Dano ma doŋ onoŋo ryeko tye ki yomcwiny, ki dano ma doŋ olimo niaŋ matut bedo kit meno,

¹⁴ pien kelo gin maber makato lonyo me ryal, ki magoba me lonyone bene kato me jabu,

¹⁵ Ryeko ber kato jami me wel-gu, pe tye gin mo ma imito ma gitwero poro kwede.

¹⁶ Ryeko tye ki kwo ma ri nakanaka i ciŋe tuŋ acuc; lonyo kacel ki deyo gitye i ciŋe tuŋ acam,

¹⁷ Yone yo ma miyo yomcwiny madwoŋ,’ ka iwoto i yone ducu inoŋo kuc keken,

¹⁸ Ryeko tye macalo yat me kwo bot, jo ma gumako matek likiŋ; Jo ma gumake matek likiŋ gilwonogi jo ma cwinygi yom.

¹⁹ Rwot oketo lobo ki ryekone; dok pi ŋecce omiyo en oketo polo i kabedone;

²⁰ pii ma tye i te lobo ogunnye pi ŋecce, ki toyo bene oa ki i pol ocwer obino piny i lobo.

²¹ Latinna, gwok ryekoni kacel ki niaŋ matut ma it ye kwede; pe iwek gurweny woko ki i waŋi;

²² gibimiyo ibedo ki kwo i cwinyi, dok gibibedo macalo gin mo ma iruko i nuti me deyo.

²³ Doŋ ibiwoto i yoni ma cwinyi tek ma pe iparo gin mo, tyeni bene pe bigwamje atata.

²⁴ Ka ce ibedo piny, pe ibilworo gin mo liweŋ; ka doŋ ibuto piny, ci ibinino nino mamit atika.

²⁵ Pe myero ilwor ka ineno can opoto i kom jo maraco macalo yamo kot, kadi bed ka can opoto i kom jo maraco otyekogi woko liweŋ:

²⁶ pien Rwot aye bibedo ŋat ma igeno; dok en bigwoki, miyo owic pe mako tyeni.

²⁷ Pe ikwer tiyo gin maber bot dano ma mito ni ikonye, ma noŋo it ye ki twero me tiyone,

²⁸ Pe iwac ki lawoti ni, “Koŋ iciti, ka dok idwog kany aye, abimiyi diki,” ma kun noŋo tye boti en gin ma en mito-ni.

²⁹ Pe myero ipir lok me timo gin marac i kom lawoti, ma kun noŋo en bedo ki gen i komi nino ducu,

³⁰ Pe myero ipyem ki dano mo laboŋo tyen lok mo, ma kun noŋo en pe otimo gin mo marac i komi.

³¹ Pe iwek nyeko omaki i kom jo ma gin lubwami, dok pe ilub kitgi mo kadi ki acel;

³² pien Rwot dag jo ma gitimo gin marac akaka, ento en tye ki gen i kom jo ma kitgi atir,

³³ Rwot ceno gaŋi pa jo maraco, ento en miyo gum i kom gaŋi pa jo ma kitgr atir.

³⁴ Rwot cayo jo ma luŋala, en nyuto kicane bot jo mawmol.

³⁵ Jo ma gin luryeko giketo deyo madit i komgi, ento lumiŋ ginoŋo megi can keken,