Carolok 26 - Acoli Baibul

¹ Woro dano ma lamiŋ, cal ki pee i kare me oro nyo kot ma cwer i kare me kac.

² Lok ma giceni kwede pe twero timo gin mo i komi ka ce pe ibalo, obedo calo winyo lakalagwec ma tuk yeŋŋe atata, dok calo aliboro ma tuk twarre cito woko.

³ Gigoyo aguragura ki del, gitweyo dog kana ki ogwil, odoo aye gigoyo ki ŋe dano ma Lamiŋ.

⁴ Pe idok i peny pa dano ma miŋ ma rom ki miŋone, miyo in bene ilokke idoko lamiŋ calo eno

⁵ Dok i peny pa dano ma miŋ ma rom ki miŋone, wek pe otam pire kene ni eryek.

⁶ Ŋat ma oro lamiŋ me cwalo lok ka mo meno rom ma oŋuno tyene kekene dok tye ka yenyo ayela ni obin ikome.

⁷ Carolok ma lumiŋ giloko, cal ki tyen dano ma lanol ma lyero alyera ma konnye doŋ pe.

⁸ Ŋat ma woro lamiŋ rom ki dano ma otweyo gweŋ i latandiyo.

⁹ Carolok ma lumiŋ giloko, rom ki okuto ma cobo ciŋ dano ma lamero.

¹⁰ Won tic ma coyo lamiŋ nyo lamero me tic bote rom ki won atero ma bayo aterone ci celo dano ducu.

¹¹ Ŋat ma lamiŋ ma nwoyo tim miŋone rom ki gwok ma lokke dok ka nano nokke kekene.

¹² Ineno dano ma tamo ki i cwinye ni eryek pire kene? Itwero bedo ki gen i kom ŋat ma lamiŋ makato eno

¹³ Dano ma lawackom wacci, “Labwor tye i waŋa yo! Labwor tye i dye gudo!”

¹⁴ Dano ma lawackom bedo ka lokke aloka i wi kitandane, macalo kika ma wirre i kom pete.

¹⁵ Lawackom luto ciŋe i atabo; ento kwanyo ciŋe me tero cam i doge loye.

¹⁶ Dano ma lawackom nenne kekene ni eryek ekato kadi wa dano abiro ma gitwero dok i peny ki ryeko.

¹⁷ Ŋat ma donyo i lok daa ma pe okemo en rom ki ŋat ma mako gwok ma tye ka kato akata ki ite,

¹⁸ Calo dano ma lapoya ma cwinyo mac i wi ot, nyo ma bayo atero ci neko dano,

¹⁹ en aye ŋat ma bwolo lawote kun waco ni, “An atye ka loko lok oree keken!”

²⁰ Pi nok pa yen miyo mac pe lyel maber, to woko; ka ma ŋat ma maro kwoto dano pe iye, daa bene gik woko cut.

²¹ Macalo bilo kano lodi mac, yen bene miyo mac lyel, dano ma maro daa bene tye kit meno, miyo daa medde ‘ameda.

²² Lok pa ŋat ma lakwot dano mit calo kwon ma gitedo makur atika, ma gimwonyo cito i ic kikome.

²³ Dano ma loko lok mamit ki doge ma kun noŋo tve ki tam marac i cwinye rom ki atabo lobo ma gidero ki libi ma ryeny aryenya.

²⁴ Ŋat ma lakworri twero loko boti lok mamit ki doge noŋo kun noŋo tye ki adagadaga i cwinye;

²⁵ kadi ka loko lok mamit niŋo, pe iye lokke, pien cwinye opoŋ ki jami abiro ma gin ducu gin me kwer.

²⁶ En twero umo adagadaga ma etye kwede i cwinye ki bwola, ento lwak ka ocokke gibineno gin marac ma en otiyo.

²⁷ Ŋat ma kwinyo bur bipoto iye; ki ŋat ma cako loro got, got bipoto i kome.

²⁸ Ŋat ma lagoba kwero jo ma en tye ka unogi, dok dano ma bwolo dano ki lok mamit kelo can keken.