Carolok 23 - Acoli Baibul

¹ Ka ibedo ka cam kacel ki rwot, myero itemme twatwal me keto woro i kome;

² ka ce ineno ni in lacam madwoŋ, ci kwany pala iŋol ŋuti woko.

³ Pe myero imwony laa pi camme makur, meno cam ma bwolo dano noŋo.

⁴ Pe myero ibed ka tiyo tic matek ni wek inoŋ lonyo; bed ki ryeko muromo ci iwek kit tam macalo meno obedi.

⁵ I kare ma iloko waŋi ineno en lonyoni-ni, inoŋo ni otyeko cito con; pien bwome twi woko oyotoyot, ci tuk malo calo ocur ma kemo polo.

⁶ Pe myero icam kwon pa dano ma ladur; pe iket cwinyi i kom camme makur-ri.

⁷ En obedo calo ŋat ma lwodo lok ki i cwinye. En wacci, “Cam dok imat ba!” kun noŋo cwinye pe i komi.

⁸ Ibiŋoko kwon ma icamo-ni woko liweŋ, dok bibalo lokki mamit ma iloko bote-gu ducu.

⁹ Pe myero ilok lok me ryeko bot ŋat ma lamiŋ, pien en pe twero niaŋ ber pa lok ma iloko bote, cayo mere acaya keken.

¹⁰ Pe ikob got macon ma poko waŋ lobo nyo kadi donyo i potti pa jo ma wongi pe;

¹¹ pien Lacunudwargi tek; en bipido pigi kwedi, ci miyo lok loyi,

¹² Ket cwinyi me winyo pwony ma gipwonyi kwede, cik, iti bene me winyo lok me ŋec.

¹³ Pe ikal akala me pwonyo latin wek obed ki kit maber; ka igoye ki odeo pe bito.

¹⁴ Ka ce ipwonye kun igoye ki odoo kit meno, ci ibilaro kwone wek pe odony ilye!.

¹⁵ Latinna, ka ce ibedo ki ryeko icwinyi, an bene cwinya bibedo yom.

¹⁶ Abibedo ki yomcwiny ki tipo koma ducu, ka onoŋo iloko gin ma atir.

¹⁷ Pe myero ibed ki mone i cwinyi ‘i kom lubalo, ento medde ki lworo Rwot nino ki niŋo.

¹⁸ Adada kwoni ma tye anyim bibedo maber, dok genni bene pe gibibalo woko.

¹⁹ Latinna winy lokka, wek ibed ryek,’ dok iket tammi pi lubo yo ma mitte.

²⁰ Pe ibed i kin jo ma gin lumero ki koŋo vino, kadi bedo i kin jo ma luworo ma gin lucam riŋo;

²¹ pien lumero kacel ki luworo gibidoko lucan, nino bimako waŋgi woko miyo giruko boŋo muketoket.

²² Winy lok pa woru munywali, dok pe myero ica meni ka doŋ oti.

²³ Wil ada, ento pe icat woko aye; dok iwil ryeko, pwony, ki niaŋ maber.

²⁴ Latin ma kite atir miyo wonne hedo ki yomcwiny madwoŋ; ŋat ma nywalo tatin maryek bedo ki yomcwiny pire.

²⁵ Wek woru kacel ki meni gubed ma cwinygi yom, wek meni munywali obed ki yomcwiny.

²⁶ Latinna, ket cwinyi ka mako lok ma awacci, dok inen kit kwona ducu wek obed lanyut ma biteli.

²⁷ Dako ma lakwele obedo calo bur matut; en tye calo waŋ it madiŋ,

²⁸ Dako-nu kanne woko pi libo dano calo layak, dok en medo wel jo ma guŋayo waŋ Rwot doko dwoŋ i kin dano.

²⁹ Aŋa ma tye ki can? Aŋa ma tye ki cwercwiny? Aŋa ma tye ka da? Aŋa ma tye ka ŋur? Aŋa mulimo ret laboŋo gin mo mutimme? Aŋa ma waŋe ocek makwar?

³⁰ Jo ma giri ka mato koŋo vino pi kare malac, jo ma cito ka mato koŋo vino ma girubo mamit.

³¹ Pe imat koŋo vino ka doŋ odoko kwar, ma noŋo tye ka ryeny aryenya i kikopo, dok donyo mapwot i i ŋat ma tye ka matone,

³² I agikkine kayo i dano calo twol, kayo calo twol ororo ma tye ki kwir marac.

³³ Ibineno jami mapat ma yam peya inenogi, dok pe ibitwero tamo kadi ki loko gin mo ma atir.

³⁴ Ibibedo calo ŋat ma obuto piny idye nam, calo ŋat ma oito malo i wi wir me mel.

³⁵ Ibiwaco ni, “Gigoya, ento pe alimo ret mo; gigoya, ento pe awinyo arem mo wacel. Abico awene? Abicito ka mato kono yino mukene doki.’