Carolok 22 - Acoli Baibul

¹ Yer bedo ki nyiŋ maber, pien en aye ber kato lonyo madwoŋ, dok pwoc ma dano gipwoyi kwede ber loyo ryal nyo jabu.

² Pe tye apokapoka i kin lalonyo ki lacan, pien Rwot aye muketo gin aryo-nu ducu.

³ Dano ma wiye tiyo ka oneno gin marac bino i kome, kanne woko; ento lakwiya piny medde mere ameda, ci neno can ada.

⁴ Bakacic ma dano limo pi bedo ki mwolo ki pi lworo Rwot, en aye lwak lonyo mapol, woro kacel ki kwo.

⁵ Okuto ki owic tye i yo pa jo muŋak: ento ŋat ma gwoko kome pe biwok i yo meno.

⁶ Pwony latin con ma noŋo en pud tidi kit yo ma myero en obed kwede, ci ka en odoŋo pe biweko lubone.

⁷ Ŋat ma lacan bedo i te loc pa dano mulony, ki ŋat ma deno lim bedo opii pa won limo

⁸ Ŋat ma timo tim bwami limo can keken, agikki me ticce bibedo odoo ma konnye pe.

⁹ Ŋat ma waŋe leŋ i kom dano bilimo gum ma a bot Rwot, pien en poko camme mogo ki lucan.

¹⁰ Ryem ŋat ma lacac woko, ci lweny bene bibedo pe boti, dok daa kacel ki anywar bene bigik.

¹¹ Ŋat ma bedo ki leŋcwiny, ma loko lok maber me kica, bimako kabaka bedo lareme.

¹² Rwot tye ka neno ni lok me ŋec gigwoko maber, ento en bolo lok pa jo ma guŋayo waŋe woko.

¹³ Ŋat ma lawackom wacci, “Labwor tye woko! Ka akato woko miyo bineka woko i dye gudo!”

¹⁴ Lok pa dako ma lakwele obedo calo bur matut; ŋat ma kiniga omako Rwot i kome bipoto woko i bur meno.

¹⁵ Miŋo aye gin ma tye i cwiny latin matidi, ento ka ipwonye ki odoo, ci miŋo a woko ki bote.

¹⁶ Ŋat ma diyo lucan ni wek lonyone omedde, nyo ma miyo jamine bot lulonyo keken, bidoko lacan. Gwoko cik ki gin ma luryeko yam guwaco

¹⁷ Cik iti iwiny lok ma luryeko guwaco, dok myero iket cwinyi i kom ŋec ma apwonyi kwede.

¹⁸ Ka igwoku lok magi i cwinyi, ci bedo ber matek; ka ce ibipo i komgi ci ibibolo lok i komgi i kare ma mitte.

¹⁹ Doŋ amito igen Rwot, en aye gin mumiyo atito lok magi boti tin-ni.

²⁰ Atyeko coyo lok ma romo pyeradek kun amiyi tam mabeco kacel ki ŋec muromo,

²¹ pi nyuto boti gin ma atir dok ada, wek in bene idwok lok ada bot jo mucwali.

²² Pe myero iyak jami pa lacan ni pien en lacan mamwa, nyo kadi me nyono jo ma gitye ki can woko i kabedo me ŋolo kop;

²³ pien Rwot bi pi do pigi, bineko jo ma guyakogi woko.

²⁴ Pe myero imak larem ki dano ma kiniga mako oyotoyot; dok pe myero iwot kacel ki dano ma cwinye opoŋ ki akemo twatwal,

²⁵ weko ibilubo kite ducu ci imoko i owic.

²⁶ Pe myero ibed ŋat acel i kom jo ma gijeŋo jamigi, ma gicuŋ pi jo ma lubanya.

²⁷ Ka ce pe it ye ki gin mo ma myero icul kwede banya, ci gimayo kitandani ma ibuto iye-ni woko,

²⁸ Pe myero ikob got macon ma poko waŋ lobo ma yam kwarowu doŋ gutyeko ketone.

²⁹ It ye ka neno dano makwiri i ticce? En bibedo ka tic wa i nyim luker: pe bitic i nyim dano ata-gu,