Carolok 2 - Acoli Baibul

¹ Latinna, ka ce iketo lokka i cwinyi, ma igwoko bene cikka i tammi,

² kun itero iti ka winyo lok me ryeko, iketo cwinyi bene me niaŋ,

³ iyo, kok pi gin ma ineno ki i cwinyi, dok ikok ki dwan maloŋo pi niaŋ.

⁴ Ka ce iyenyo macalo iyenyo lim, kun iyenyo bene macalo it ye ka yenyo lonyo ma gikano;

⁵ ka itimo meno, ci ibiniaŋ i kit me lworo Rwot dok ibibedo ki ŋec i kom Lubaŋa,

⁶ Rwot aye ma miyo ryeko; ŋec ki niaŋ bene gia hote.

⁷ En kano ryeko maber twatwal pi jo ma cwinygi atir; en kwot ma gwoko jo ma cwinygi leŋ,

⁸ dok gwoko jo ma giŋolo kop atir, gwoko bene jo ma gumiyo kwogi bote.

⁹ Ibiniaŋ gin ma tye atir ki ŋolo kop ma atir, ci ibilubo yo ma tye atir keken;

¹⁰ pi meno cwinyi bipoŋ ki ryeko, ki ŋec ma ibilimo bimiyo ibedo ki yomcwiny.

¹¹ Tut cwinyi bigwoki, niaŋ maberri bikuri;

¹² bilari ki i yo me gin marac, dok bilari ki i ciŋ dano ma gikelo ayelayela, pi lok ma giwaco.

¹³ Gin jo ma gibwoto bedo ki kwo ma tye atir, ma gimito wot i piny macol,

¹⁴ kun cwinygi yom i timo gin marac dok ginoŋo yomcwinygi i gin marac ma kelo ayelayela:

¹⁵ gin jo ma yogi ogom, dok kitgi pe atir, gimaro timo gin maraco,

¹⁶ Bimiyo iloyo tam pa dako ma lakwele, ma noŋo biti ki lok mapwot me ywayo tammi.

¹⁷ En dako ma bwoto cware ma onyome ka tinone, kun pe gwoko gicikke ma Lubaŋane oketo;

¹⁸ ma ka idonyo i ode ilwiny piny i to, yo pa dako-nu teri mere i lobo pa jo muto;

¹⁹ pe tye ŋat mo ma donyo bote ma twero noŋo yone me dwogo cen, pe bene gitwero noŋo yo ma tero dano i kwo.

²⁰ Myero ilub yo pa jo ma kitgi beco, kun ilubo yo pa jo ma kitgi atir.

²¹ Jo ma cwinygi atir gibibedo i lobo ki jo ma gin lugen ma pe gitye ki bal mo gibibedo iye matwal;

²² ento jo maraco gibityekogi woko ki i lobo meno, ki jo ma guŋayo waŋ Rwot pi bal me nek bene gibipujogi macalo giputo doo.