Carolok 18 - Acoli Baibul

¹ Ŋat ma pe ribbe ki jo mukene yenyo tyen lok mogo, kun kwero lubo tam pa jo ma ticgi nyuto ryekogi,

² Lamiŋ pe paro pi niaŋ jami mo-ni; gin ma en mito aye me nyuto ka tamme kene.

³ Bal ki lewic giwoto kacel; ka woro orwenyo, ci yet bene cakke.

⁴ Lok ma dano loko cal ki pii matut; ryeko cal ki wan it ma gunnye doko kulu.

⁵ Dworo kor dano marac pe ber; ŋolo kop me loyo dano ma pe ki bal bene rac.

⁶ Lamiŋ loko gin ma nyayo daa ki pyem; pi lok maraco ma en loko aye miyo gigoye.

⁷ Lamiŋ kelo can i kome kene ki lok ma en loko, dok gin ma en loko ducu tye macalo owic ma twero mako en kekene.

⁸ Lok pa ŋat ma lakwot dano mit calo kwon ma gitedo makur atika, ma gimwonyo cito i ic kikome.

⁹ Dano ma kome wac ka tiyo ticce rom ki dano ma balo jami abala.

¹⁰ Nyiŋ Rwot obedo calo cel matek ka ma dano ma kite atir rio iye ci laro kwone,

¹¹ Lonyo bedo calo gaŋ matek bot lalonyo, dok macalo cel ma gigero ocudo malo likuŋ me gwoko en:

¹² Ka can pud pe, dano bedo ki cwiny me lyerre; bedo ki mwolo aye yo me limo woro,

¹³ Myero koŋ iwiny lok ma noŋo peya igamo lok mo; ka pe, ci inyuto miŋŋi dok myayo yet i komi.

¹⁴ Dano twero ciro arem matek i kare ma noŋo en two, ento aŋa ma twero ciro ka cwinye odoko nyap?

¹⁵ Tam pa ŋat ma tye ki niaŋ matut tye me yenyo ŋec, jo maryek bene gimito giwiny lok ma medo ŋecgi.

¹⁶ Mol ma dano miyo twero yabo yobote, dok miyo en o wa i nyim jo madito.

¹⁷ Dano ma kwoŋo tito lok i lukiko nen calo lokke tye atir, nio ka lawote ma gipido kwede openye ki peny madwoŋ.

¹⁸ Ka jo aryo ma gitego gitye ka pyem i lukiko, ci ka gibolo kwir tyeko daa ma i kingi.

¹⁹ Kony omeru ci en bigwoki macalo ibedo i cel me gaŋ matek, ento ka ibedo ka da kwede ci en lorri doggola woko.

²⁰ Dano noŋo gin maber nyo marac pi lok ma en oloko; lok ma oa ki i doge tye ki adwoggine.

²¹ Lok ma iloko twero gwoko kwoni, nyo twero neki woko aneka; jo ma gimaro loko lok maraco gibineno can.

²² Ŋat munoŋo dako, meno onoŋo gin maber; en biniaŋ atir ni Rwot kara pwoye.

²³ Dano ma lacan ka loko, bako doge ki mwolo; ento ŋat ma lalonyo gamo mere lok ki gero cut.

²⁴ Tye jo mogo ma giporo bedo lurem apora, ento tye dano ma moko mere i kom lareme likiŋ ma loyo ominne kikome.