Carolok 16 - Acoli Baibul

Carolok ma mako kwo ki kit pa dano

¹ Yub ma tye i tam, meno yub pa dano; ento Rwot aye ma loyo lok ma dano loko.

² Dano neno ni gin ducu ma etimo tye atir ki tun bote, ento Rwot aye neno cwinye ka leŋ.

³ Leg Rwot okonyi i ticci ducu ma itiyo, ci yub ducu ma it ye kwede bicobbe maber dok kakare.

⁴ Kit jami acel acel ma “Rwot oketo tye ki tyen lokke, doŋ agikki pa jo maraco aye to.

⁵ Rwot dag jo ma luwakke; en pe biweko gibwot ma pe koŋ noŋo opwodogi.

⁶ Bed ki mar me ada dok ki gen ci Lubaŋa biweko balli; lwor Rwot ci gin mo marac pe bitimme i komi.

⁷ Ka inen kit pa dano yomo cwiny Rwot, ci Rwot bene cako miyo kuc bedo i kin dano meno ki lumonene.

⁸ Gin matidi ma inoŋo ki yo ma atir ber kato lim madwoŋ ma ilimo i yo me bwami.

⁹ Dano yubo yubbe ki i cwinye, Rwot aye ma telo en miyo cobo maber.

¹⁰ Kabaka loko lok kit ma noŋo Rwot omiye ni oloki; miyo doge bene pe cer ka ŋolo kop pa dano.

¹¹ Rwot cwinye yom i kom jo ma gitye ki mijan ma pimo jami kakare; kidi lapim jami-me acata ducu en mutiyogi.

¹² Luker pe gitwero ciro jo ma gitiyo gin marac, pien bedo ki kit ma atir aye miyo komker cuŋ matek.

¹³ Kabaka bedo ki yomcwiny i kom dano ma loko lok ki gen, dok en maro ŋat ma loko lok ada.

¹⁴ Dano maryek twero kweyo akemo pa kabaka; ka kiniga omako rwot, ci dano mo to woko.

¹⁵ Yomcwiny ma kabaka tye kwede nen wa i tur waŋe dok miyo kwo, ki kicane bene tye macalo pol ma miyo kot cwer i cwir.

¹⁶ Bedo ki ryeko ber kato lonyo ma dano tye kwede; dok bedo ki niaŋ matut ber kato noŋo lim,

¹⁷ Jo ma cwinygi atir giwoto i yo ma pe terogi ka timo gin marac; ŋat ma gwoko kite bilaro kwone bene.

¹⁸ Wakke tero dano i can, ki cwiny me nyatte miyo dano poto i can.

¹⁹ Bedo kacel ki lucan ki cwiny me mwolo ber kato poko jami ayaka ki jo ma luwakke.

²⁰ Ŋat ma winyo lok me pwony ma gipwonye kwede bibedo ki kwo maber, dok ŋat ma geno Rwot bedo ki yomcwiny.

²¹ Dano maryek ki i cwinye giŋeyo ni tye bene ki niaŋ matut; en loko lok mamit ma bito ki tam pa dano.

²² Ryeko miyo kwo bot ŋat ma tye kwede, ento miŋo kelo can keken i kom lumiŋ.

²³ Tam pa dano maryek miyo en loko lok maber ma nyuto niaŋ matut, dok gin ma en waco ducu bedo lok me pwony ma bito jo mukene.

²⁴ Lok ma giloko ki kica lim calo moo kic, lim mada ma yomo cwiny dok miyo yotkom.

²⁵ Tye gin ma dano tamo ni en aye yo ma atir, kun noŋo yo ma kit enu tero en i to.

²⁶ Miti ma latic tye kwede miyo en tiyo matek; pien mito ni ecam eyeŋ kare ducu wek kec pe obed ka neke.

²⁷ Dano ma latim bwami piro lok me neko jo mukene woko, dok lok ma en loko noŋo lyet calo mac,

²⁸ Dano ma cwinye rac bedo kun keto lok ma nyayo mone i kin dano, ki ŋat ma maro kwoto dano, keyo larem pa jo mapol.

²⁹ Dano ma labwami bwolo lawote, miyo lawote lubo yo ma pe ber ci poto woko i can.

³⁰ Ŋat ma gayo lawote ki waŋe noŋo tye ki yub me limo gin marac ikome; dano ma miyo doge likiŋ bikelo gin marac.

³¹ Lwar wic aye lalukana me deyo pa ludoŋo, ka ce obino pi kwo ma tye atir.

³² Ŋat ma kiniga pe mako oyot ber loyo twon oteka, ŋat ma loyo tam ma i cwinye kene loyo ŋat ma omayo gaŋ kulu.

³³ Kadi bed gibol kwir, ento Rwot aye ma ŋolo kop.