Carolok 14 - Acoli Baibul

¹ Mon maryek miyo pacogi bedo maber ki kuc, mon ma lumiŋ aye giketo gaŋ woko aketa ki ciŋgi kengi.

² Dano ma kwone tye atir aye lworo Rwot, ŋat ma yone ogom ma maro timo gin marac cayo Rwot acaya.

³ Lok pa lamiŋ calo odoo ma gigoye kwede, ento jo maryek lok ma giloko twero gwokogi.

⁴ Ka ma pe gipuro iye ki twoni dyaŋ, inoŋo bel pe, ento ka ma gipuro iye ki twoni dyaŋ inoŋo cam cek madwoŋ ata.

⁵ Ŋat ma lagen tito lok me caden ma tye ada, caden ma lagoba tito mere lok goba me bwola keken,

⁶ Laŋala pe twero doko ryek wacel, ŋat ma tye ki niaŋ matut twero noŋo ŋec oyotoyot.

⁷ A woko ki bot lamiŋ, pien pe tye lok mo me ŋec ma en romo pwonyi kwede,

⁸ Dano maryek tye ki niaŋ matut me noŋo kit ma myero ebed kwede, ento lumiŋ minogi telogi i yo marac miyo gibwolle abwola kengi.

⁹ Lubaŋa cayo jo maraco, ento timo kica ki jo ma cwinygi atir,

¹⁰ Yomcwiny ma itye kwede bedo meri keni; ki keccwiny bene meri; pe tye dano mo ma twero nywako gin-gu ducu kwedi,

¹¹ Gibibalo ot pa dano marac woko, ento ot pa ŋat ma cwinye atir bicuŋ mere kakare.

¹² Tye gin ma dano tamo ni en aye yo ma atir, kun noŋo yo ma kit ennu tero en i to.

¹³ Kadi bed ineno dano nyero nyero, noŋo cwinye bene tye ka cwer; ka yomcwiny doŋ otum, ci i ŋeye bino cwercwiny madit.

¹⁴ Dano ma cwinye odoko nyap poto i can pi gin marac ma en timo, ento dano maber limo mere bakacic maber pi gin maber ma en otiyo.

¹⁵ Dano ma lamiŋ ye jami ducu ayeya, ento ŋat maryek koŋ ŋiyo ka kwene ma en ecito iye.

¹⁶ Dano maryek wiye po lokke, kwero timo gin marac, ento dano ma lamiŋ ma lawackom, tiyo oyotoyot laboŋo par ma romo juke.

¹⁷ Dano ma kinigane lyetti oyotoyot timo gin me miŋo, ento dano ma tye ki ryeko diyo cwinye.

¹⁸ Lukwiya piny gilubo yo me miŋo, ento jo maryek ŋecgi miyo gibedo ki deyo madit.

¹⁹ Jo ma lutim maraco giryebbe piny i nyim jo ma kitgi beco, ki jo maraco giryebbe piny i dog gaŋ pa jo ma kitgi atir.

²⁰ Pe tye ŋat mo ma mito dano ma lacan, kadi lawote kikome, ento jo ma lulonyo gitye ki lurem mapol.

²¹ Ŋat ma cayo lawote en labal; ŋat ma kica mako i kom lacan bedo ki yomcwiny.

²² Pe jo ma gibedo ki tam me timo gin marac aye giŋak woko adada? Ento jo ma gitye ki tam me tiyo gin maber gibedo ki mar me ada ki gen,

²³ Kit tic ducu ma dano tiyo magoba tye iye, lok aloka keken ki dog kelo can.

²⁴ Deyo pa jo maryek aye ryeko ma gitye kwede, ento jo ma lumiŋ gicayogi pi tim miŋogi.

²⁵ Caden me ada laro kwo pa jo mapol, ento caden ma loko lok goba noŋo laroro.

²⁶ Dano ma lworo Rwot bedo ma cwinye opye, dok litinone bene ginoŋo ka ma gilarre iye.

²⁷ Lworo Rwot miyo kwo bot dano, miyo dano bwot ki i owic pa to.

²⁸ Kabaka bedo ki deyo pi lwak dano mapol ma en loyogi; laboŋo dano rwot pe gin mo.

²⁹ Ŋat ma kiniga pe mako oyot tye ki niaŋ matut, ento ŋat ma kiniga mako oyot nyuto miŋone keken.

³⁰ Ka dano bedo ma cwinye opye, miyo kome bene bedo yot; ento nyeko tye macalo bur adola mudet ma ogudo cogo.

³¹ Ŋat ma uno dano ma lacan meno yeto Lubaŋama ocweyo dano-nu; ŋat ma bedo ki kica i kom jo ma piny obwoyogi noŋo woro Lubaŋa.

³² Dano marac can poto i kome pi timme marac, kun dano ma kite atir noŋo ka larre pien bal mo pe i kome.

³³ Ryeko bedo i tam pa dano ma tye ki niaŋ, ento pe tye i cwiny lumiŋ.

³⁴ Bedo ki kit ma atir miyo rok mo-ni nyiŋe ywek matek, ento bal kelo lewic bot lwak mo keken ma gibedo i wi lobo.

³⁵ Kabaka bedo ki yomcwiny i kom latic ma tiyo ticce ki ryeko: kiniga make i kom latic ma tiyo tic ma miyo lewic bote.