Carolok 13 - Acoli Baibul

¹ Latin maryek winyo pwony ki juk pa wonne, ento latin ma Laŋala pe winyo lok ma gijuke kwede.

² Jo ma kitgi beco gibilimo bakacic pi lok mabeco ma noŋo giwaco; miti pa jo ma lubal tye mere me timo tim bwami keken.

³ Ŋat ma gwekke i lok ma en loko gigwoko kwone; ento ŋat ma loko lok ata, can poto i kome cut.

⁴ Ŋat ma lawackom kadi bed cwinye omito jami mo-ni ma rom mene pe twero noŋone, kun dano ma omiyo kwone me tiyo tic matek gimedo bote lonyo ameda.

⁵ Dano ma kite atir dag goba, ento dano marac timo tim me lewic ki cac me bwola keken.

⁶ Kit ma atir gwoko ŋat ma pe ki bal mo, ento bal tyeko jo maraco woko at yeka ducu.

⁷ Jo mogo giporo bedo ki lonyo, ma noŋo pe gitye ki gin mo kadi ki acel; ki jo mukene giporo bedo lucan ma kun noŋo gitye ki lwak lonyo madit ata.

⁸ Dano ma lalonyo twero koko kwone ki lonyone; ŋat ma lacan, ma gire mo pe, pe tye ki yo mo me laro kwone,

⁹ Jo ma kitgi atir gimeny calo mac tara ma lyel maleŋ, jo maraco gibedo calo mac tara ma gineko woko.

¹⁰ Wakke kelo ayelayela keken, ento jo ma giwinyo lok me tam ma gimiyo botgi gibedo maryek.

¹¹ Lonyo ma ginoŋo oyotoyot rwenyo woko, ŋat ma noŋo lonyo manoknok lonyone bimedde.

¹² Gen ma pe gicobo miyo two i cwiny dano, doŋ mit ka ocobbe kakare tye macalo yat me kwo.

¹³ Ŋat ma cayo lok ma giwacce lwoŋo to i kome kene, ŋat ma lubo gin ma giciko bilimo bakacic.

¹⁴ Pwony ma jo maryek gipwonyo ki dano miyo kwo, miyo dano bene gibwot ki i owic pa to.

¹⁵ Ŋec ma dano tye kwede miyo jo mapol gipwonye, ento jo ma pe genne gilimo megi can keken.

¹⁶ Dano ma wiye tiyo cobo ticce ki ŋec muromo, ŋat ma lamiŋ bedo ka nyuto miŋone ka maleŋ,

¹⁷ Lakwena marac miyo dano gilimo peko, ento lakwena ma genne kelo kuc.

¹⁸ Dano ma kwero juk noŋo can ki cwercwiny; ento ŋat ma ye juk dano giworo.

¹⁹ Ka dano onoŋo gin ma en mito yomo cwinye mada; ento jo ma lumiŋ gidag bwoto tiyo gin marac.

²⁰ Ŋat ma bedo kacel ki jo maryek pwonnye doko ryek bene, ento ŋat ma mako lurem ki lumiŋ kite biballe woko.

²¹ Gin marac lubo lubalo i kabedo ducu ma giwoto iye, jo ma kitgi atir gibimiyogi jami mabeco macalo bakacicgi,

²² Dano ma kite ber weko lonyone bot likwaye macalo ginaleyagi, kun noŋo ŋat ma labal kano mere lonyone pi ŋat ma kite at ir.

²³ Poto okaŋ pa lacan ceko cam mabup, ento dano balo camme woko ki tim ma pe atir.

²⁴ Dano ma pe pwodo latinne ki odoo noŋo pe mare, ŋat ma maro latinne keto cwinye me pwode ka noŋo abalo.

²⁵ Ŋat ma kite atir bedo ki cam muromo, ento dano marac kec neko kare ducu.