Carolok 1 - Acoli Baibul

Kony pa carolok

¹ Carolok pa Solomon, wod pa Daudi, kabaka me Icrael.

² Carolok magi konyo dano me ŋeyo ryeko ki pwony maber, ki me niaŋ lok ma miyo niaŋ matut,

³ dok gipwonyo dano me bedo ki ryeko i gin ducu ma en tiyo, bedo ki kit ma tye atir, ŋolo kop atir, kun tiyo ki dano ducu maromrom.

⁴ Gipwonyo dano ma pe tye ki kit ŋec mo, ci doko ryek; dok miyo ŋec bot jo matino me moko lok maber pigi kengi.

⁵ Carolok magi bene medo ŋec bot ŋat maryek, telo dano ma tye ki niaŋ matut i ticce,

⁶ miyo giniaŋ tyen lok me carolok ki cal gin ma giloko i kome, ki lok pa luryeko, ki ododo ma giboko.

⁷ Ka dano lworo Rwot, ci en cako noŋo ŋec; jo mamiŋ gicayo ryeko dok gikwero pwonnye woko.

Lokme atita ki me poyo wic

⁸ Latin, winy lok ma woru pwonyi kwede, pe ikwer winyo pwony pa meni bene’

⁹ pien pwonygi twero yubo kiti maber, tye calo tok maber me aketa i wii, dok calo gi-ŋut ma iketo i ŋuti miyo inen mwonya.

¹⁰ Latinna, ka lubalo giomo cwinyi ki lok mo, pe myero iye.

¹¹ Gwok nyo gibiwacci, “Bin kacel kwedwa, wek waki dano mo wanek woko, wakur dano ma pe tye ki bal wanek woko;

¹² wek wamwonygi woko ducu makwo macalo lyel, gubed macalo jo ma donyo piny i bur.

¹³ Lonyo mapatpat ducu bidoko mewa, odiwa bipoŋ ki jami ma wayako;

¹⁴ bin iribbe kwedwa, wan ducu wabitic ki kicaa, lim acel.”

¹⁵ Latinna, pe iribbe ka wot ki jo macalo meno, gwokke pe ilub korgi;

¹⁶ tyengi lyet me ŋwec ka timo bal, gin nino ducu gitye ma guyubbe me oyo remo pa dano.

¹⁷ Ciko obwo konyo aŋo ka winyo tye ka neni?

¹⁸ Ento jo macalo meno giciko owic pigi kengi, gin gibito i owicgi kengi.

¹⁹ Meno aye can ma mako jo ma gin lubwami, meno aye gin ma neko lakwo.

Koko pa ryeko

²⁰ Wuwiny, ryeko tye ka lwoŋo i yo gudo-gu; en kok ma lwoŋo lwoŋo i cuk ki dwane maloŋo;

²¹ en tye ka lwoŋo matek ki i wi cel; wa i dog gan-gu en bedo ka lok aloka ni,

²² “Wun jo ma lumiŋ, wumito wubed miŋ pi kare ma rom mene? Luŋala mono gibibedo ki yomcwiny pi kare ma rom mene ki ŋalagi-ni? Lumiŋ, wun wudag pwonnye ma miyowu ŋec?

²³ Wuwiny lok ma an awaco botwu; nen, abinyuto tamma ducu botwu; abimiyo wuŋeyo lokka.

²⁴ Abedo ka lwoŋowu ni wubin, ento wun wukwero winyo lwoŋona; aryeyo ciŋa, ento pe tye ŋat mo ma oketo iye cwinye.

²⁵ Wucayo tamma ducu ma amiyo botwu, wun pe wuye ni ayubwu.

²⁶ Pi meno ka can opoto i komwu an abinyerowu anyera; abiŋalowu bene aŋala ka gin ma kelo lworo opoto i komwu ma obaŋowu woko.

²⁷ I kare ma can man bibaŋowu woko macalo yamo me nam, can ma poto i komwu bene bino macalo yamo lapiru, en aye i kare meno wubibedo ki arem ki cwercwiny madwoŋ.

²⁸ I kare meno aye gibicako lwona kwede, ento an pe abigamo doggi; gibiyenya ki cwinygi ducu ento pe gibinona.

²⁹ Gukwero ŋec ma miyo gipwormye dok bene pe guye lworo Rwot,

³⁰ pien gukwero winyo tamma, dok gucayo yub ma mera pi gin;

³¹ pi meno gibikoko aŋee pi gin marac ma gutimo dok gibikumo pi timgi maraco,

³² Jo ma pe gitye ki ŋec gito pien gukwero yenyo ryeko, ki yomcwiny ma lumiŋ gitye kwede en aye tyekogi,

³³ Ento ŋat ma biwinyo lokka bibedo ma ocuŋ matek; en bibedo ma pe lworo gin marac, laboŋo par mo.”