Amoc 9 - Acoli Baibul

Lubaŋa

¹ Yam aneno Rwot ocuŋ i ŋet keno tyer, owacci, “Go lalukana wi wir, wek larii doggo la oyeŋŋe, turgi woko wek guŋinnye i wi jo-nu ducu. Jo mudoŋ i komgi abinekogi kipala lucwan, ŋat acel mo pe biriŋo, ŋat acel mo pe bibwot.

² “Kadi bed gukwiny piny wa i Lyel, abikwanyogi ki kunnu ki ciŋa; kadi bed guito malo i polo, abiomogi woko ki kunnu adwokogi piny;

³ kadi bed gukanne i wi got Karmel, abiyenyogi ki kunnu, amakogi woko; kadi bed gukanne ki ka waŋa wa i te nam, abiciko twol ki kunnu toŋogi,

⁴ Kadi bed giterogi i opii i nyim lukworgi, abiciko ginekogi woko ki kunnu ki pala lucwan, ci abiciko waŋa i komgi pi timo gin marac, pe pi timo gin maber.”

⁵ Rwot Lubaŋa me mony, ka ogudo lobo, ci leny woko, jo ducu ma gibedo iye gikok; lobo ducu iile woko calo kulu Nailka opoŋ, ci dok piny calo kulu Nail ma i Ejipt.

⁶ En gero kicikane ma malo i polo, kun miyo daŋŋe gulle i wi lobo; en lwoŋo pii me nam, ci coro woko i wi lobo; nyiŋe Rwot.

⁷ “Wun pe wurom ki jo Etiopia ki tuŋ bota, wun jo Icrael?” Man lok pa Rwot kikome. “Yam pe akwanyo jo Icrael ki i lobo Ejipt, ki Lupiliciti ki i Kaptor, ki jo Ciria ki i Kir bene?

⁸ Nen, Rwot Lubaŋa tye ka neno ker ma tye ki bal, ci abijwero woko ki i wi lobo; kono ot pa Yakobo pe abityeko ducu.” Man lok pa Rwot kikome.

⁹ “Pien nen, abiciko, ci abiyeŋo ot pa Icrael i kin rok mukene ducu, calo ŋat ma kiyo moko ki keikei, ento nyig gweŋ acel mo pe bipoto i ŋom.

¹⁰ Lubalo ducu ma i kin jona gibinekogi ki pala lucwan, gin jo ma giwacci, ‘Gin marac mo pe bipoto i komwa, ariya mo pe binen i nyimwa.’

Rwot bidwoko gum pa jo Icrael botgi

¹¹ “I nino meno abigero aduc pa Daudi ma yam opoto, abiyubo guti ma yam omuk, ka ma yam oballe abiilo malo, abiroco odoco bedo kit macalo yam con;

¹² wek gucam lobo pa jo Edom ma yam odoŋ, ki rok ducu ma yam gilwonogi ki nyiŋa.’ Man lok pa Rwot kikome ma bitimo man.

¹³ Man lok pa Rwot kikome, ni, “Kare oebino ma kare me kac bilubo kare me pur oyot, kare me nyono olok bilubo kare me coyo kodi oyot; koŋo vino manyen bicwer ki i wi godi, bimol i wi litino godi ducu.

¹⁴ Abidwoko gum pa jona jo Icrael botgi, ci gibigero gaŋi ma yam oballe odoco, gibedo iye, gibipito olok, ci gibimato koŋo vinone, gibipuro potti, ci gicamo cam ma ocek iye.

¹⁵ Abipitogi i lobogi, gimoko calo yat, ci pe dok gibiputogi woko ki i lobo ma doŋ amiyo botgi.” Man lok pa Rwot Lubaŋawu kikome.