Amoc 7 - Acoli Baibul

Lok adek ma Lubaŋa onyuto ma bipoto i kom Icrael

¹ Rwot Lubaŋa onyutta man: nen, en cen rye ka cweyo lwak bonyo i kare ma bel ma gicoyo me aryo ocako twi, en bel ma gicoyo ka doŋ gikayo pa kabaka.

² I kare ma doŋ gutyeko camo lum woko ki i lobo, awacci, “Ai Rwot Lubaŋa, timgi kica do! Yakobo twero cuŋ niŋniŋ, ma kun en tidi kumeno!”

³ Ci Rwot oŋut i kom lok man kun wacci, “Man pe doŋ bitimme.”

⁴ Rwot Lubaŋa dok onyutta man: nen, Rwot Lubaŋa onoŋo tye ka ciko ni giŋol kop i kom jone ki mac; ci mac owaŋo kut matut otyeko woko, obedo ka waŋo lobo-ni.

⁵ Ci awacci, “Ai Rwot Lubaŋa, doŋ iwek do! Yakobo twero cuŋ niŋniŋ, ma kun en tidi kumeno?”

⁶ Ci Rwot Lubaŋa oŋut i kom man kun wacci, “Man bene pe doŋ bitimme.”

⁷ Dok onyutta man: nen, Rwot yam ocuŋ i ŋet cel me gaŋ ma gigero kun gipimo ki birigi,” kun omako birigi i ciŋe.

⁸ Ci Rwot owacca ni, “Amoc, ineno gin aŋo?” Ci agamo ni, “Birigi.” Dok Rwot awacca ni, “Nen, aeketo birigi i dye jona jo Icrael, pe dok abikato ki ka ŋetgi,

⁹ Kabedo pa Icaka ma yam giwora iye i wi godi gibidoŋ noŋo, ki kabedo pa jo Icrael maleŋ gibidoŋ obur; ci abipoto i kom ot pa Jeroboam ki pala lucwan.”

Amoc ki Amajia

¹⁰ Ci doŋ Amajia, ajwaka me Betel, ocwalo lok bot Jeroboam, kabaka me Icrael, ni, “Amoc opiro lok i komi i dye jo me ot pa Icrael; lobo-ni pe twero ciro lwak lok ducu ma en owaco.

¹¹ Pien Amoc doŋ owaco kumeno ni, ‘Jeroboam gibineko ki pala lucwan, jo Icrael gibikwanyogi ki i lobogi giterogi i opii.’ ”

¹² Ci Amajia owaco bot Amoc ni, “In lanen, citi iriŋ woko i lobo Juda, icam kwonni kunnu, it yet lok lanebi lanebi ki kunnu.

¹³ Ento pe dok it yet lok i Betel, pien kany kabedo maleŋ pa kabaka, man ot woro Lubaŋa me ker man.”

¹⁴ Amoc odok iye ki Amajia ni, “An pe lanebi, an bene pe latin pa lanebi mo; ento yam an lakwat, ki layub nyig olam me acama.

¹⁵ Ci Rwot okwanya ki ka lubo kor romi, ci owacca ni, ‘Cit itit lokka boŋonajo Icrael.’

¹⁶ “Pi meno, koni doŋ iwiny lok pa Rwot. In iwacci, ‘Pe it it lok pa Lubaŋa i kom Icrael,’ dok ni, ‘Pe ibed ka lok i kom ot pa Icaka.’

¹⁷ Pi meno, Rwot owaco kuman ni, ‘Dakoni bibedo malaya i gaŋ, awobe ki anyirani gibinekogi ki pala lucwan, pottiwu gibipoko woko kun gipimo ki tol; in kikomi ibito i lobo ma keni, ci jo Icrael gibikwanyogi woko ki i lobogi, giterogi i opii ada.’ ”