Amoc 6 - Acoli Baibul

Ker me lobo Icrael bitum woko

¹ “Gibineno can, jo meno ma komgi okwe i Cion, ki gin ma gitamo ni gitye ki kuc i wi got me Camaria, jo-nu jo me rok madit ma ginene i kin rok ducu, ma jo me ot pa lerael gibedo ka bino botgi.

² Wukat wa i Kalne, ci wunen; wua ki kunnu, wuwok wa i Kamat, ma en gaŋ madit-ti; ka dok wucit piny i Gat pa jo Piliciti, Gin gibeco makato kerwu woko ce? Nyo lobogi lac makato lobowu ‘?

³ Wun wumito diro nino marac cen, ento wutye ka kelo loc magwa cok:

⁴ “Can i wi jo ma gibuto i wi ki tanda ma gidero ki lak lyec! Wuryene i wi komwu mayom, wucamo litino romi, ki roci ma gipito i dwol;

⁵ wuwero werwu kun wulubo dwan naŋa, wuroto gin-wer manyen me agoya calo Daudi;

⁶ wumato koŋo vino ki becen me keno tyer, wuwiro komwu ki moo mabecone, ento cwinywu pe cwer pi waŋ ret pa Yucepu.

⁷ Pienno koni wun jo ma gibikwoŋo terogi i opii, karama pa jo ma ryene i kom bitum woko.”

⁸ Rwot Lubaŋa doŋ okwoŋŋe ki nyiŋe kene ni. “Iya okwero wakke pa Yakobo, akwero odine madoŋo; abimiyo gaŋŋe bot lukwor, kacel ki gin ducu ma tye iye.” Man lok pa Rwot kikome, Lubaŋa me mony.

⁹ Ci ka jo apar gudoŋ i ot acel gibito.

¹⁰ Lacen wat pa dano mo-ni, ma en dano ma myero owaŋ kome, bitiŋo kome pi kelo cogone woko ki i ot, ci en biwaco bot ŋat ma tye i tyelo ni, “Pud odoŋ ŋat acel mo boti kenyo?” Ci en bigamo ni, “Pe.” Dok biwacci, “Liŋ! Pe myero walok nyiŋ Rwot.”

¹¹ Pien nen, Rwot biciko ci gibitwomo ot madit gituro woko, ot matidi gibiŋinyo matitino.

¹² Aguragura giriŋo i kom pata? Gipuro nam apura ki kweri dyaŋ? Ento wun wuloko ŋolo kop atir odoko kwir, adwoggi me tim ma atir wumiyo odoko yat makec,

¹³ wun jo ma wutye ka um pi Lodebar, ki ma waco ni, “Wamako Kamaim pi tekowa kenwa keken.”

¹⁴ Pien nen, abiilo rok mukene i komwu, wun jo me ot pa Icrael ci gibiunowu nia ki i yo me donyo i Kamat nio kwede wa i kulu ma i Araba. Man lok pa Rwot kikome, Lubaŋa me mony.