Amoc 5 - Acoli Baibul

Wuŋut wek wubed kwo

¹ Wuwiny lok man ma awero i komwu macalo wer kumo, wun jo me ot pa Icrael:

² “Otyeko poto, pe dok bia, en nyako Laicrael; gikwere woko i lobone, ŋat mo pe ma ile malo.”

³ Pien Rwot Lubaŋa owaco kuman ni, “Gaŋ ma otero jo alip i lweny bidoŋ ki dano miya keken; gaŋ ma otero jo miya bidoŋ ki dano apar keken, wun jo me ot pa Icrael.”

⁴ Rwot owaco bot jo me ot pa Icrael kuman ni, “Wubin bota, wek wubed kwo;

⁵ pe wubed ka wot i Betel, wuwek donyo i Gilgal, pe wukat wa i Beer-ceba; pien Gilgal gibitero woko i opii, ki Betel pe bibedo gin mo.”

⁶ Wubin bot Rwot, wek wubed kwo, wek pe omwoc i ot pa Yucepu calo mac, ci waŋogi woko, kun ŋat mo pe i Betel ma romo nekone,

⁷ wunjo ma ŋolo kop kikiniga, ma ka ŋolo kop atir, kun wubolo kit ma atir woko piny.

⁸ Ŋat ma otiyo lakalatwe, Yoggo ki Lyemyim, ŋat ma loko colpiny doko odiko, ma ci do dyeceŋ doko wor, ŋat ma lwoŋo pii me nam, ci coro woko i wi lobo, nyiŋe Rwot.

⁹ En balo gedo matek ŋinyo woko macalo lutkot, miyo gituro cel gogo gininyo woko.

¹⁰ Gin gidag ŋat ma jukogi i ka ŋolo kop, cwinygi kwero ŋat ma loko lok ada.

¹¹ Pien wunyono wi lucan kun wujogo kal ki botgi tektek, pi meno kadi bed wugero odiwu ki gweŋ apaya, pe wubibedo i igi; dok kadi bed wupito olok i pottiwu ma yomo cwinywu, pe wubimato koŋo vinone.

¹² Pien aŋeyo ni wutimo bal mapol, aŋeyo kit balwu madoŋo, kit ma wuyelo ki jo ma kitgi atir, kun wugamo lim lawilwu, ci wuryemo jo ma piny obwoyo ki i kabedo me ŋolo kop.

¹³ Pienno ŋat ma laryeko bilin aliŋa i kare ma kit meno, pien karene rac mada.

¹⁴ Wulub gin maber, pe gin marac, wek wubed kwo; kumeno Rwot, ma en aye Lubaŋa me mony, bibedo kwedwu, kit macalo doŋ wuwaco.

¹⁵ Wukwer gin marac, wumar gin maber, wumi giŋol kop atir i dog gaŋ; gwok nyo noŋo Rwot, ma Lubaŋa me mony, bibedo ki kica bot jo pa Yucepu ma gudoŋ,

¹⁶ Pi meno Rwot, Lubaŋa me mony ma en Rwot, owaco kuman ni, “Koko bibedo i dyekal ducu; i waŋa yo ducu dano bikok ni, ‘Aya! Aya!’ Gibilwoŋo lupur ni gubin ka kumo, ki jo ma ŋeyo wer lyel wek gubin, gukoki.

¹⁷ Koko bibedo wa i poto olok ducu, pien abikato awok ki i dyewu,” man Rwot aye owaco.

¹⁸ Wun jo ma wumito nino pa Rwot komwu kec! Piŋo wumito nino pa Rwot? Piny bibedo col i nino meno laboŋo leŋo mo.

¹⁹ Bibedo rom ki dano ma oriŋo labwor, dok orwatte ki kwac; nyo odonyo i ot ojeŋo bade i kom ‘kicika, ci twol dok okaye.

²⁰ I nino pa Rwot piny bibedo col aye, ma leŋo mo pe, piny bicido woko licuc, gin mo ma ryeny iye pe,

²¹ “Akwero ninowu madito, acayogi woko, cokkewu me wora pe yomo cwinya wacel.

²² Kadi bed wutyero bota gitum awaŋa ki gityer me moko kwon, pe abigamogi; gityer lakwecwinywu me lim mucwe pe abiciko iye waŋa.

²³ Woo me werwu wukwany woko ki bota; pe abiwinyo dwan naŋawu kadi mit.

²⁴ Ento wuwek ŋolo kop atir aye omol macalo pii, kitwu obed atir calo kulu ma mol nakanaka.

²⁵ “Yam wubedo ka kela bota gitum ki gityer i tim pi mwaka pyeraŋwen, wun jo me ot pa Icrael?

²⁶ Pe kumeno, ento koni doŋ wutibino Cakkut ma kabakawu, ki Kaiwan, lubaŋawu ma lakalatwe, ki cal jogiwu ducu ma wupayo piwu kenwu.

²⁷ Pi meno abikobowu woko i opii i ŋe Damaciko,” man Rwot aye