Amoc 3 - Acoli Baibul

Tic pa lunebi

¹ Wuwiny lok ma Rwot doŋ oloko i komwu, wun jo Icrael, i kom kaka ducu ma yam akwanyogi woko ki i lobo Ejipt:

² “Wun keken aye aŋeyowu i kin kaka ducu ma wi lobo; pi meno abiketo can i komwu pi balwu ducu.

³ “Jo aryo giwoto kacel, ka pe gucikke?

⁴ Labwor kok i buŋa, ka pe omako lee? Latin labwor kok ki i boro, ka pe ocamo gin mo?

⁵ Winyo pye moko ki tol i ŋom, ka pe gitero owic pire? Owic tuk noŋo ki i Bom, ka pe omako gin mo?

⁶ Obute ka gikuto i gaŋ, lworo pe mako dano? Gin marac poto i gaŋ, ma Rwot aye pe otiyo?

⁷ Adada Rwot Lubaŋa pe timo gin mo, laboŋo yabo muŋŋe bot luticce ma lunebi.

⁸ Labwor doŋ okok; aŋa ma lworo pe mako? Rwot Lubaŋa doŋ oloko; aŋa ma pe tito lokke?”

Can ma bipoto i kom Camaria

⁹ Wutuc lok bot odi madoŋo ma i Aciria, ki odi madoŋo ma i lobo Ejipt. Wuwac ni, “Wugurre kacel i wi godi me Camaria, wunen arubaruba madwoŋ ma iye, ki kit ma giuno kwede-dano i gaŋ meno.”

¹⁰ “Pe giŋeyo timo gin ma atir,” man lok pa Rwot kikome, “jo meno gikano ‘gero ki yak i odigi madoŋo.”

¹¹ Pi meno Rwot Lubaŋa owaco kuman ni, “Lakwor birumo lobowu, bidwoko tekwu woko piny; odiwu madoŋo gibiyako woko.”

¹² Rwot owaco kuman ni, “Macalo lakwat laro tyen romo aryo, nyo dul it, ki i dog labwor, jo Icrael ma gibedo i Camaria gibilarogi kit meno, kacel ki but kom mo ki dul kitanda.’

¹³ “Wuwiny, ci wubed caden i kom ot pa Yakobo,” Rwot Lubaŋa ma owaco, Lubaŋa me mony.

¹⁴ “I kom nino ma amiyo can ki Icrael pi balgi, abiketo can i kom keno tyer me Betel, Ten keno me keno tyer gibiturogi woko ci poto piny i ŋom.

¹⁵ Abigoyo ot cwir wa ki ot oro; odi ma gideyo ki lak lyec gibityekogi woko, odi madoŋo bigik.” Man lok pa Rwot kikome.