Amoc 1 - Acoli Baibul

Kop ma Lubaŋa oŋolo i kom jo ma cok ki Icrael

¹ Man aye lok pa Amoc, ma en yam ŋat acel i kin lukwat romi me Tekoa, gin ma en oneno i kom Icrael i kare pa Ujia kabaka me Juda, ki i kare pa Jeroboam wod pa Y oaci kabaka me Icrael, ma odoŋ mwaka aryo ma peya oyeŋyeŋ oyeŋo lobo.

² Amoc owacci, “Rwot mor ki i Cion, dwane winnye ki i Jerucalem; olet pa lukwat otwo woko, got Karmel bene wiye oner.”

³ Rwot owaco kuman ni, “Pi lwak bal mapol pa jo Damaciko, pe abidwoko cwinya cen i can ma abimiyogi, pien gudiŋo Gilead ki nyonyo ladin bel.

⁴ Kumeno abicwalo mac i kom ot pa Kajael, biwaŋo odi madoŋo i gaŋ pa Benadad.

⁵ Abituro larii doggaŋ me Damaciko, abityeko jo ma bedo i nota Awen, ki lamak odoo ker ma i Bet-eden; jo Ciria gibiterogi i opii i lobo Kir,” man Rwot aye owaco.

⁶ Rwot owaco kuman ni, “Pi lwak bal mapol pa jo Gaja, pe abidwoko cwinya cen i can ma abimiyogi; pien gutero rok woko kulu i opii, gumiyo i ciŋ Edom.

⁷ Kumeno abicwalo mac i kom cel me Gaja, biwaŋo odine madoŋo ducu,

⁸ Abityeko jo ma bedo i Acidod woko, ki lamak odoo ker ma i Acikelon; abitiŋo ciŋa i kom Ekron, jo Piliciti mudou gibitum,” man Rwot Lubaŋa aye owaco.

⁹ Rwot owaco kuman ni, “Pi lwak bal mapol pa jo Turo, pe abidwoko cwinya ceŋ i can ma abimiyogi; pien gin gumiyo rok woko kulu i cin jo Edom, wigi pe opo i kom gicikke me omego,

¹⁰ Kumeno abicwalo mac i kom cel me Turo, biwaŋo odine madoŋo ducu.”

¹¹ Rwot owaco kuman ni, “Pi lwak bal mapol pa jo Edom, pe abidwoko cwinya cen i can ma abimiyogi; pien oryemo kor ominne ki pala lucwan, obolo kica woko ducu, kinigane obedo lyet nakanaka, en kano akemone bedo matwal.

¹² Kumene abicwalo mac i kom Teman, biwaŋo odi madoŋo me Bojra.”

¹³ Rwot owaco kuman ni, “Pi lwak bal mapol pa jo Ammon, pe abidwoko cwinya cen i can ma abimiyogi; pien gubaro i mon Gilead ma gitye ki ic, pi medo wan lobogi.

¹⁴ Kumeno abicwinyo mac i kom cel me Raba, biwaŋo odine madoŋo ducu, ki woo madwoŋ i kare me lweny, dok ki yamo mager i kare pa lapiru;

¹⁵ kabakagi gibitero i opii, en kacel ki lukalle bene,” man Rwot aye ma owaco.