Aggai 1 - Acoli Baibul

Aggai ocuko cwiny jo Icrael me gero ot pa Lubaŋa

¹ I mwaka me aryo me loc pa kabaka Dario, i nino dwe acel me dwe me abicel, lok pa Rwot obino bot Aggai, ma myero en otit bot Jerubabel wod pa Cealtiel, ma onoŋo laloc pa jo Juda, ki bot Yocwa wod pa Yekojadak, ma en ajwaka madit, ni,

² “Rwot me mony owaco kuman ni, Rok man giwacci, kare peya oromo me gero ot pa Rwot odoco.”

³ Lok pa Rwot obino kun owok ki i dog lanebi Aggai, ma wacci,

⁴ “Man aye kare ma myero wubed i odiwu ma wugero wigi mabeconi, ma kun wuneno ot man oket woko?

⁵ Pi meno omiyo, Rwot me mony owaco kuman ni, Koŋ wutam pi kit kwowu.

⁶ Wucoyo kodi madwoŋ, ento wukayo manok; wucamo cam, ento pe wuyeŋ; wumato mat-gu, ento pe romowu; dok wurukke, ento ŋat mo ma kome bedo lyet bene pe; dok ŋat ma camo mucara camo mucara me aketa i kicaa ma tere otuc.

⁷ “Rwot me mony owaco kuman ni, Koŋ wutam pi kit kwowu.

⁸ Wuit i wi godi, wukel yadi me gedo, wek wuger ki ot ma yomo cwinya, wek anyut deyona iye, man Rwot aye owaco.

⁹ Wubedo ka geno ni wunoŋ cam mabup, ento wucoko manok; dok ka wukelo paco, amiyo rwenyo woko. Piŋo? Man Rwot me mony aye ma openyo, kun dok gamo ni, Pien oda tye ma oket woko, kun ki tuŋ botwu, ŋat acel acel tye ka bolle abola i tic ode.

¹⁰ Meno aye gin mumi yo polo ki malo okwero miyo toyo, dok lobo bene okwero ceko cam.

¹¹ An bene aciko ni can pii myero obed tye i lobo, ki i kom godi, i kom kal, i kom koŋo vino manyen, i kom moo, ki i kom ginapita ducu ma doŋo i lobo, i kom dano, ki i kom dyaŋi, ki i kom ticgi ducu ma gitiyo,”

¹² Meno omiyo Jerubabel wod pa Cealtiel, ki Yocwa wod pa Yekojadak, ajwaka madit pa Lubaŋa, kacel ki jo ducu ma gudoŋ, guwinyo lok pa Rwot Lubaŋagi, ki lok pa lanebi Aggai, kit macalo Rwot Lubaŋagi oore kwede; lwak gucako bedo ki lworo i nyim Rwot.

¹³ Lacen Aggai, lakwena pa Rwot, otito lok pa Rwot bot lwak ni, “An atye kwedwu, man lok pa Rwot kikome.”

¹⁴ Rwot otugo cwiny Jerubabel wod pa Ceahiel, laloc me Juda, ki cwiny Yocwa wod pa Yekojadak, ajwaka madit, ki cwiny jo ducu ma gudoŋ; cut gubino ci gucako tic i kom ot pa Rwot me mony, ma Lubaŋagi.

¹⁵ Gin gucako tic i nino dwe pyeraryo wiye aŋwen me dwe me abicel.