Acakki 9 - Acoli Baibul

Lubaŋa omoko gicikkene ki Nua

¹ Lubaŋa omiyo gum i kom Nua ki litino awo bene kun waco ni, “Wunywal, wunya, wek wupoŋ lobo.

² Lee tim ducu bilworowu ki myelkom, wa winyo bene ducu me polo, ki gin ma lak alaka i ŋom, ki rec ducu ma i nam bene; gityeko miyogi ducu i ciŋwu,

³ Gin ducu ma woto, ma kwo, gibibedo cam mewu; kit ma yam amiyowu pot dek-ki, doŋ amiyowu jami ducu.

⁴ Ento pe wubicamo riŋo kacel ki kwone, ma en aye remone.

⁵ Atikane abipido pi remo kwowu; abipido pire bot lee ducu, wa ki bot dano bene; ki tuŋ bot dano acel acel abipido pi kwo pa ominne.

⁶ Ka ŋatti mo ooyo remo pa dano mo, ci dano meno gibioyo remone bene; pien Lubaŋa ocweyo dano i calle kikome.

⁷ Wun wunywal, wunya wumedde madwoŋ i wi lobo, wunya iye.”

⁸ Lubaŋa dok owaco bot Nua ki awobene ma onoŋo gitye kacel kwede ni,

⁹ “Nen, amoko gicikkena kwedwu ki likwayowu ma bilubowu,

¹⁰ ki gin makwo ducu ma gitye kwedwu, winyo ki lee ma paco ki lee tim ducu ma gitye kacel kwedwu, gin ducu ma gukato woko ki i yeya.

¹¹ Amoko gicikkena kwedwu ni, pii aluka pe dok bineko gin makwo, dok pe bibedo aluka ma bityeko lobo.”

¹² Lubaŋa dok owacci, “Man aye lanyut me gicikke ma aketo i kin an ki wun ki gin makwo ducu ma gitye kwedwu, ma bibedo matwal i yalwak ducu.

¹³ Aketo danyu mera i pol, ma bibedo lanyut me gicikkena i kin an ki lobo.

¹⁴ Ka amiyo pol oyuŋŋe i wi lobo, ci danyu binen i pol,

¹⁵ abipo gicikke ma tye i kin an kwedwu ki gin makwo ducu ma gitye ki kom; dok pii bene pe dok bidoko aluka ma romo tyeko gin makwo ducu.

¹⁶ Ka danyu tye i pol, ci abineno, ci abipo gicikkena ma bedo matwal i kin Lubaŋa ki gin makwo ducu ma gitye ki kom i wi lobo.”

¹⁷ Lubaŋa owaco bot Nua ni, “Man doŋ lanyut me gicikkena ma doŋ amoko i kin an ki gin makwo ducu ma tye i wi lobo.”

Nua ki litino awobene

¹⁸ Awobe pa Nua ma yam gukatti woko ki i yeya-ni gin Cem, Kam ki Yafeci. Kam en aye won Kanaan.

¹⁹ Litino awobe pa Nua adek-ki aye lwak ducu ma i wi lobo gua i komgi.

²⁰ Nua aye yam obedo lapur mukwo-ŋo. Ci opito olok i potone,

²¹ omato koŋo vinone, ci omer woko, obuto i kemane ma pe oumo kome.

²² Ci Kam, won Kanaan, ka oneno wonne pe oumo kome, otito ki omegine aryo ma gitye woko-ni.

²³ Ci Cem ki Yafeci gutiŋo boŋo i wi gwokgi gin aryo, ka gucako wot kun gijer ki yo ŋegi, ci guumo ki kom wongi ma onoŋo tye nono, kun wangi neno cen, ci pe guneno kom wongi ma tye nono-ni.

²⁴ Ka Nua oco ki i waŋ mero koŋo vinone, ci oŋeyo gin ma wode matidine otiyo i kome,

²⁵ ci owacci, “Gicen Kanaan; en bibedo opii i kin lwak opii pa omege.”

²⁶ Dok owaco bene ni. “Gipwo Rwot Lubaŋa pa Cem; wek Kanaan obed opiine.

²⁷ Lubaŋa oyab lobo pa Yafeci obed malac, wek en obed i kema pa Cem; ka dok Kanaan obed opiine bene.”

²⁸ Nua ori mwaka miya adek ki pyerabic nia i kare ma pii aluka ocorre i wi lobo.

²⁹ Kare me kwo pa Nua ducu oromo mwaka miya aboŋwen ki pyerabic; ka doŋ oto.