Acakki 8 - Acoli Baibul

Pii alŋka otwo woko

¹ Lubaŋa opo kom Nua ki lee tim ducu, ki lee ma paco ducu ma yam tye kacel kwede i yeya. Lubaŋa omiyo yamo okodo wi lobo, ci pii ocako dwon.

² Waŋ it me kut matut oculle woko, ki polo bene ocegge woko, ki kot ma corre a ki i polo bene ocok woko,

³ pii omedde ki dwon woko i wi lobo jwijwi. Ka nino okato miya acel ki pyerabic, pii onoŋo odwon woko.

⁴ I dwe me abiro, i nino dwe apar wiye abirone, yeya ogem i wi got Ararat.

⁵ Pii omedde ki dwon woko nio kwede i dwe me apar; i dwe me apar, i nino dwe acel, wi godi maboco gucako nen.

⁶ Ka nino pyeraŋwen okato, Nua oyabo waŋ dirica ma yam otuco i yeya-ni,

⁷ ocwalo agak woko; ci obedo ka tuk, kun wirre kwede tuŋŋi ki tuŋŋi, nio ka piny otwo woko.

⁸ Dok ocwalo amam woko nia ki bote, wek enen ka pii doŋ otyeko dwon woko ki i lobo ada.

⁹ Ento amam pe omedo ki noŋo ka ma opye iye ki tyene, ci odok bote cen i yeya, pien onoŋo pii pud omwonyo wi lobo woko ducu. Ci Nua oryeyo bade, omake, odwoke i yeya bote.

¹⁰ Dok okuro pi nino abiro mukene, ka dok ocwalo amam woko nia ki i yeya.

¹¹ Amam dok odok bote i yeya ma onoŋo piny doŋ oyuto; nen, en otino pot yat jeituni ma opwono madyak i doge. Kit meno Nua oniaŋ ni pii doŋ otyeko dwon woko ki i wi lobo.

¹² Dok omedde ki kuro pi nino abiro mukene, dok ocwalo amam woko; ci doŋ pe odok bote matwal.

¹³ I mwaka me miya abicel ki acel me dit pa Nua, i dwe mukwoŋo, i nino dwe acel, en aye pii otwo iye woko liweŋ wi lobo. Nua ocako puto wi yeya woko, ci oneno wi lobo otwo woko.

¹⁴ I dwe me aryo, i nino dwe pyeraryo wiye abiro, onoŋo lobo doŋ otwo woko.

¹⁵ Lubaŋa owaco bot Nua ni,

¹⁶ “Doŋ ikat woko ki i yeya, in ki dakoni, ki awobeni ki mongi kacel kwedi.

¹⁷ Kel woko gin makwo ducu ma gitye kwedi, wa kit kom ducu, winyo ki lee ki gin ducu ma lak alaka wi lobo, wek gucorre i wi lobo, kun ginywal, ginya i wi lobo.”

¹⁸ Kit meno Nua okato woko, ki awobene ki dakone, ki mon pa awobene kacel kwede.

¹⁹ Ki lee ducu ki gin ducu ma lak alaka, ki winyo ducu, gin ducu ma giwoto wi lobo, gucako mol, gukato woko ki i yeya, ma oporo kit kwagi ducu.

²⁰ Nua ocano keno tyer pi Rwot, ci oyero lee ma gicamo ki i kit kwagi acel acel, ki winyo ma gicamo ki i kit kwagi acel acel, otyero gitum awaŋa i wi keno tyer.

²¹ Ka Rwot oŋweyo gin ma ŋwece kur ma yomo cwiny, Rwot oloko i cwinye kekene ni, “An pe dok abiceno lobo pi dano, kadi bed tam ducu ma i cwinye kemo bal keken nia wa i tinone; pe doŋ abineko gin makwo ducu kit ma yam atimo.

²² Ka lobo pud tye, ci kare me coc ki kac, wa koyo ki lyeto, ki oro ki cwir, dyeceŋ ki dyewor, pe bigik matwal.”