Acakki 6 - Acoli Baibul

Bal pa dano

¹ Ka dano gucako medde wi lobo, ci gunywalo anyira.

² Ka awobe pa Lubaŋa guneno anyira pa dano beco, gucako yero me anyoma ki i kingi.

³ Ci Rwot owacci, “Cwinya pe doŋ bibedo i dano matwal, pien en kom mamwa, ento kare me kwone bibedo mwaka miya acel ki pyeraryo.”

⁴ Jo Nepil onoŋo gitye i lobo i kare meno, ki lacen bene, i kare ma awobe pa Lubaŋa guyabo wi anyira pa dano, gunywalo kwedgi litino. Gin aye cog jo matego mukwoŋo i lobo, ma nyiŋgi ŋene matek.

⁵ Rwot oneno ni bal pa dano odoko dit woko i wi lobo, dok tam ducu ma cwinygi lwodo kare ducu kemo bal keken.

⁶ Rwot oŋut pi cweyo dano i lobo, ocwero cwinye matek.

⁷ Rwot owacci, “Abijwero dano woko ma yam aketo-ni ki wi lobo, dano ki lee ki gin ma lak alaka ki winyo me polo, pien doŋ atyeko ŋut pi cweyogi.”

⁸ Ento Nua aye onoŋo yomo cwiny Rwot.

Nua opayo yeya

⁹ Man aye tekwaro pa Nua, Nua yam obedo dano ma kite atir, ma pe ki bal mo i kin yalwakke; Nua obedo ka wot kacel ki Lubaŋa,

¹⁰ Nua onoŋo tye ki awobene adek, Cem, Kam ki Yafeci.

¹¹ Lobo oballe woko ki i nyim Lubaŋa, onoŋo doŋ opoŋ ki bwami.

¹² Ka Lubaŋa oneno lobo, oneno oballe woko, pien dano ducu gutyeko balle woko i kit bedogi i wi lobo.

¹³ Ci Lubaŋa owaco ki Nua ni, “Agik pa dano ducu doŋ obino i nyima, pien gupoŋo lobo woko ki bwami; nen, abityekogi woko, kacel ki lobo bene.

¹⁴ Pa yeya meri ki yat gofer; ci ipok kicika i yeya, ka imwon iye ki ŋeye ki odok.abic

¹⁵ Ibitiyone kit man: yeya borre biromo yadi miya acel ki pyerabic,wiye abic, borre tuŋ malo yadi abic.

¹⁶ Tuc waŋ dirica i yeya, kun iweko danne malo doŋ futi acel ki nucu; ka iket doggola i but yeya, ci ipok iye obed kabedo adek, ma pinnye, me aryone ki me adekke ma malone.

¹⁷ Pien nen, abicoro nii aluka madwoŋ i wi lobo, wek otyek kom gin ducu ma tye ki kwo, i te polo, wek gin ducu ma gitye i wi lobo oto woko.

¹⁸ Ento in aye abimoko gicikkena kwedi; ibidonyo i yeya, in kacel ki ‘litinoni, ki dakoni, ki mon pa awobeni ducu.

¹⁹ Kwany gin makwo ducu ma gitye ki kom ki aryo aryo ki i kit kwagi acel acel, ci ipikgi i yeya, wek gubed kwo kacel ki in; gubed co ki mon.

²⁰ Winyo macalo kit kwagi tye, lee macalo kit kwagi tye, gin ma lak alaka i ŋom macalo kit kwagi tye, gin bibino boti ki aryo aryo ki i kit kwagi acel acel wek gubed kwo.

²¹ Dok iter kit kwa cam ducu ma gicamo, ci ikangi; wek gubed me acamagi bene.

²² Nua otimo kumeno; ocobo ducu macalo Lubaŋa ocike.