Acakki 5 - Acoli Baibul

Likwayo pa Adam

¹ Man aye buk me tekwaro pa Adam. I kare ma Lubaŋa oketo dano, ocweyo i kit calle kikome.

² Yam oketo laco ki dako, omiyogi gum, ocako nyiŋgi ni Dano i nino ma con oketogi iye-ni.

³ Ka Adam doŋ otyeko ri mwaka miya acel ki pyeradek, en onywalo awobi ma calo en kikome, ci ocako nyiŋe Ceji.

⁴ Mwaka pa Adam ma onoŋo doŋ otyeko nywalo Ceji romo miya aboro, dok omedde ki nywalo awobe ki anyira bene.

⁵ Kit meno nino me kwo pa Adam ducu oromo mwaka miya aboŋwen ki pyeradek; ka doŋ oto.

⁶ Ka Ceji doŋ otyeko ri mwaka miya acel ki abic, ci onywalo Enoci.

⁷ Ceji ori i ŋe nywalo Enoci mwaka miya aboro ki abiro, dok omedde ki nywalo awobe ki anyira bene.

⁸ Kit meno nino me kwo pa Ceji ducu oromo mwaka miya aboŋwen ki apar wiye aryo; ka doŋ oto.

⁹ Ka Enoci doŋ otyeko ri mwaka pyeraboŋwen, ci onywalo Kenan.

¹⁰ Enoci ori i ŋe nywalo Kenan mwaka miya aboro ki apar wiye abic, dok omedde ki nywalo awobe ki anyira bene.

¹¹ Kit meno nino me kwo pa Enoci ducu oromo mwaka miya aboŋwen ki abic; ka doŋ oto.

¹² Ka Kenan doŋ otyeko ri mwaka pyerabiro, ci onywalo Maalalel.

¹³ Kenan ori i ŋe nywalo Maalalel mwaka miya aboro ki pyeraŋwen, dok omedde ki nywalo awobe ki anyira bene.

¹⁴ Kit meno nino me kwo pa Kenan ducu oromo mwaka miya aboŋwen ki apar; ka doŋ oto.

¹⁵ Ka Maalalel doŋ otyeko ri mwaka pyerabicel wiye abic, ci onywalo Jared.

¹⁶ Maalalel ori i ŋe nywalo Jared mwaka miya aboro ki pyeradek, dok omedde ki nywalo awobe ki anyira bene.

¹⁷ Kit meno nino me kwo pa Maalalel ducu oromo mwaka miya aboro ki pyeraboŋwen wiye abic; ka doŋ oto.

¹⁸ Ka Jared doŋ otyeko ri mwaka miya acel ki pyerabicel wiye aryo, ci onywalo Enoka.

¹⁹ Jared ori i ŋe nywalo Enoka mwaka miya aboro, dok omedde ki nywalo awobe ki anyira bene.

²⁰ Kit meno nino me kwo pa Jared ducu oromo mwaka miya aboŋwen ki pyerabicel wiye aryo; ka doŋ oto.

²¹ Ka Enoka doŋ otyeko ri mwaka pyerabicel wiye abic, ci onywalo Metucela.

²² Enoka obedo ka wot kacel ki Lubaŋa i ŋe nywalo Metucela mwaka miya adek, dok omedde ki nywalo awobe ki anyira bene.

²³ Kit meno nino me kwo pa Enoka ducu oromo mwaka miya adek ki pyerabicel wiye abic.

²⁴ Enoka obedo ka wot kacel ki Lubaŋa; ci orwenyo woko matwal, pien Lubaŋa otere woko.

²⁵ Ka Metucela doŋ otyeko ri mwaka miya acel ki pyeraboro wiye abiro, ci onywalo Lamek.

²⁶ Metucela ori i ŋe nywalo Lamek mwaka miya abiro ki pyeraboro wiye aryo, dok omedde ki nywalo awobe ki anyira bene.

²⁷ Kit meno nino me kwo pa Metucela ducu oromo mwaka miya aboŋwen ki pyerabicel wiye aboŋwen; ka doŋ oto.

²⁸ Ka Lamek doŋ ori mwaka miya acel ki pyeraboro wiye aryo, ci onywalo wode,

²⁹ ma ocako nyiŋe Nua, kun wacci, “I lobo ma yam Rwot oceno-ni, latin man aye bimiyo waywe ki aroma tic me ciŋwa.”

³⁰ Lamek ori i ŋe nywalo awobe mukene ki anyira bene.

³¹ Kit meno nino me kwo pa Lamek ducu oromo mwaka miya abiro ki pyerabiro wiye abiro; ka doŋ oto.

³² Nua ka otyeko mwaka me ditte, miya abic, ci onywalo Cem, Kam ki Yafeci.