Acakki 49 - Acoli Baibul

Yakobo olamo gum i kom awobene

¹ Yakobo olwoŋo awobene, ci owacogi ni, “Wucokke kacel, wek atittiwu gin ma bitimme i komwu i kare ma anyim.

² Wugurre wek wuwiny, wun litino awobe pa Yakobo, wuwiny wonwu Icrael.

³ “Reuben, in aye latin kayona, in i kerona, ma akwoŋo nywalo ki tekona, in aye iloyo omegini ki wakke ki tek kom.

⁴ Icorre macalo pii, pe ibiloyogi matwal, pien iito wa i wi kitanda pa woru; ipyedde iye, iito i wi kabutona!

⁵ “Cimeon ki Levi gin omego; pala lucwangi aye gi-lwenygi magwa.

⁶ Tipona, pe icit i kacokkegi; in, cwinya, pe iribbe kwedgi i gurregi; pien guneko lwak dano ki kiniga dok gitoŋo odon twoni dyaŋi akaka.

⁷ Gicen kinigagi, pien ger; gicen akemogi, pien gwa! Abipoko kingi aketogi i kin jo pa Yakobo abikeyogi woko i dye Icrael.

⁸ “Juda, omegini gibipaki; ciŋi bimako ŋut lukworri: litino pa woru gibiryebbe piny i nyimi.

⁹ Juda en latin labwor: ia ki ka mwodo lee, latinna, ci iito malo. En onyono piny, obuto calo labwor, macalo min labwor; aŋa ma bituge?

¹⁰ Odoo-ker pe bia ki bot Juda, tal-ker bene pe bia ki ka tyene, nio ka rwode kikome bibino: en aye rok ducu biworo doge.

¹¹ En tweyo latin kanane i kom yat olok, tweyo wod kana i kom olok maberre, en lwoko ginarukane ki koŋo vino ki boŋone i pig olok;

¹² koŋo vino bimiyo waŋe lokke doko makwar, cak biloko lake doko matar.

¹³ “Jabulon bibedo i dog nam en bibedo waŋ wat me mel, waŋ lobone bibedo wa i Cidon.

¹⁴ “Icakar en kana matek, buto i dye anok romi;

¹⁵ oneno ka yweyone tye maber, ki lobone bene tye maber; onyoco gwoke piny ka tiŋo yec, odoko opii ma gidiyo i tic matek.

¹⁶ “Dan biŋolo kop i kom jone macalo ŋat acel i kin kaka me Icrael.

¹⁷ Dan bibedo twol ma i ŋet yo lacocodo ma iyo,’ ma bitoŋo opuny aguragura miyo labed i wiye poto ataro.

¹⁸ Akuro lar meri, ai Rwot.

¹⁹ “Gad mony bipoto i kome ento en binyono opuny tyengi.

²⁰ “Acer camme bibedo moo, en bikelo cam mamit muporo cam pa luker.

²¹ “Naputali en labwo til ma gituko, ma iye olil ki lok

²² “Yucepu en jaŋ yat ma nyak, jaŋe ginyak madwoŋ i ŋet waŋ it; jaŋe gilak i kom cel.

²³ Wegi atero gilwenyo i kome ki gero, gibaye, giruce matek;

²⁴ ento atumme cuŋ mot lilin, ciŋe odoko mit pi ciŋ Twon Oteka pa Yakobo, pi nyiŋ Lakwat, en Got pa Icrael,

²⁵ pi Lubaŋa pa woru ma bikonyi, pi Lubaŋa Matwero-ducu ma bi miyi gum; gum ma a malo i polo, gum ma a i kut matut muyarre i te lobo, gum ma a i tuno ki gum ma a i mego.

²⁶ Gum pa abani dwoŋ, loyo gum pa godi ma ri nakanaka, ki jami mabeco ma i wi cere ma bedo matwal; gubed i wi Yucepu, ki i tur nyime, en ma yam opokke woko ki i kin omegine.

²⁷ “Benjamin en orudi mager, camo lee ma oneko odiko, dok poko lim ma en oyako otyeno.”

²⁸ Magi aye kaka pa Icrael apar wiye aryo; man aye lok ma wongi oloko kwedgi i kare ma en lamo gum i komgi, kun lamo gum i kom ŋat acel acel kit macalo gumme tye kwede.

To pa Yakobo ki yikke

²⁹ Ci doŋ ocikogi kun waco botgi ni “An doŋ abito adok bot jona; be; wubiyika bot kwarina i boro ma tye i poto pa Epron Lakit,

³⁰ i boro meno ma tye i Makpela, tuŋ wokceŋ me Mamre, i lobo Kanaan, ma yam Abraim owilo kacel ki poto, ki bot Epron Lakit, odoko mere me kabedo me yik.

³¹ Kunnu yam giyiko iye Abraim ki dakone Cara; kunnu bene giyiko iye Icaka ki dakone Labeka; an bene dok ayiko Lea kunnu;

³² poto meno ki boro ma tye iye yam giwilo ki bot jo Kit.”

³³ Ka Yakobo otyeko ciko litino awobene, ci odolo tyene malo i wi kitanda, oomo cwinye me agikkine, oto odok bot lutugi.