Acakki 46 - Acoli Baibul

Yakobo ocito i Ejipt kacel ki jo me ode

¹ Icrael ocako wot ki jami ma yam en tye kwedgi ducu; ka obino i Beer-ceba, ci otyero gitum bot Lubaŋa pa wonne Icaka.

² Lubaŋa oloko ki Icrael i waŋ lek dyewor kun lwoŋe ni, “Yakobo, Yakobo.” En ogamo ni, “An a ene.”

³ Owacce ni, “An Lubaŋa, Lubaŋa pa woru; pe ilwor cito i Ejipt, pien abimiyi idoko rok madit kunnu.

⁴ Abicito kwedi wa i Ejipt, abidwoki cen bene; doki i kare ma ibito, ciŋ Yucepu biumo waŋi.”

⁵ Yakobo ocako wot ki i Beer-ceba, kun awobene gutiŋe, kacel ki litinogi matino, ki mongi, i gadigadi ma Parao ocwalo me tinogi.

⁶ Gutero limgi makwo ki jamigi ma yam gulimo ki i lobo Kanaan, gucito kwede i Ejipt; gutero Yakobo ki litinone ki likwaye ducu.

⁷ En owoto i Ejipt ki awobene ki anyirane ducu, wa ki likwaye ma co ki ma anyira.

⁸ Man aye nyiŋ likwayo pa Icrael ma gucito i Ejipt: Yakobo ki awobene. Reuben, latin kayo pa Yakobo,

⁹ ki awobe pa Reuben, aye Kanok, Pallu, Kejeron ki Karmi.

¹⁰ Awobe pa Cimeon aye Jemuel, Jamin, Okad, Jakin, Jokar ki Caul, ma awobi pa dako Lakanaan,

¹¹ Awobe pa Levi aye Gercon, Kokat ki Merari.

¹² Awobe pa Juda aye Er, Onan, Cela, Perej ki Jera, ento Er ki Onan guto woko i lobo Kanaan; awobe pa Perej aye Kejeron ki Kamul.

¹³ Awobe pa Icakar aye Tola, Puwa, Iob, ki Cimron.

¹⁴ Awobe pa Jabulon aye Cered, Elon ki Jaleel.

¹⁵ Meno aye awobe pa Lea ma en onywalo ki Yakobo i Paddan-aram, kacel ki nyare Dina; wel litino awobene ki anyirane giromo pyeradek wiye adek.

¹⁶ Awobe pa Gad aye Jipion, Kagi, Cuni, Ejibon, Eri, Arodi ki Areli.

¹⁷ Awobe pa Acer aye Imna, Iciva, Icivi, Beria ki Cera ma lamingi. Awobe pa Beria aye Keber ki Malkiel.

¹⁸ Meno aye litino awobe pa Jilpa, ma Laban omiyo bot Lea; en onywalo ki Yakobo litino apar wiye abicel.

¹⁹ Awobe pa Lakeri dako pa Yakobo aye Yucepu ki Benjamin.

²⁰ Yucepu onywalo Manace ki Epraim ki i lobo Ejipt, ma Acenaci, nya, pa Potipera ajwaka me On aye onywalogi.

²¹ Awobe pa Benjamin aye Bela, Beker, Acibel, Gera, Naaman, Eki, Roc, Mupim, Kupim ki Arud.

²² Meno aye awobe pa Lakeri ma en onywalo ki Yakobo, litino ducu apar wiye aŋwen.

²³ Awobi pa Dan aye Kucim.

²⁴ Awobe pa Naputali aye Jajeel, Guni, Jejer ki Cilem.

²⁵ Meno aye likwayo pa Bila ma Laban yam omiyo ki nyare Lakeri; en onywalo ki Yakobo litino ducu abiro.

²⁶ Jo ducu ma tuŋ bot Yakobo ma yam ocito kwedgi i Ejipt, ma gin yam litinone ki likwaye kikome, ma pe gikwano iye mon pa litino awobene onoŋo giromo jo pyerabicel wiye abicel;

²⁷ ki litino awobe ma nene Yucepu onywalogi ki i Ejipt, nene gin awobe aryo; pienno jo ducu ma tuŋ bot Yakobo ma gucito i Ejipt giromo pyerabiro.

Yakobo ki jo ma i ode i Ejipt

²⁸ Yakobo ocwalo Juda anyim bot Yucepu, wek onyuttigi yo ma cito i Gocen; ci guo i lobo Gocen,

²⁹ Yucepu oyubo gadigadine me cito ka rwatte ki wonne Icrael i Gocen; ka ocito, onyutte kekene bote, ka opoto i ŋute kun kok kwede pi kare mo malac.

³⁰ Icrael owaco bot Yucepu ni, “Tin to doŋ obin, pien doŋ aneno waŋi, aniaŋ ni pud ikwo ada.”

³¹ Yucepu owaco ki omegine ki jo ma i ot pa wonne ni, “Abidok ka tito ki Parao, abiwacce ni, ‘Omega ki jo ma i ot pa wora, ma yam gitye i lobo Kanaan, doŋ gutyeko bino bota;

³² gin lukwat, pien gin yam lukwat dyaŋi; dok gin gubino ki dyegigi ki dyani-gu, ki gin ducu ma gitye kwede.’

³³ Ka ce Parao olwoŋowu, ka openyowu ni, ‘Wun wutiyo tic aŋo?’

³⁴ wun wudok iye ni, ‘Wan luticci wan lukwat dyaŋi nia ka tinowa nio kwede wa onyoo, wan kacel ki kwarowa’, wek wubed i Gocen, pien bedo me kwer bot Luejipt me bedo ki lakwat mo.”