Acakki 45 - Acoli Baibul

Yucepu onyutte kekene bot omegine

¹ Yucepu diyo cwinye doŋ oloye woko ki i nyim lwak ducu ma gucuŋ ka ŋete, ci odaŋŋe ni, “Wumi dano ducu gua woko ki bota, guciti.” Kit meno ŋatti mo yam pe odoŋ bote i kare ma en nyutte kekene bot omegine.

² Ocako koko matek ma Luejipt bene giwinyo, ki jo ma i gaŋ kal pa Parao bene guwinyo.

³ Yucepu owaco bot omegine ni, “An a Yucepu; wora mono pud tye makwo?” Ento omegine pe gitwero gamo doge, pien tipo komgi oto woko i nyime.

⁴ Yucepu owaco bot omegine ni, “Alegowu, wubin bota cok.” Gucito cok bote. Owacogi ni, “An aye ominwu Yucepu, ma yam wucato i Ejipt.

⁵ Pe doŋ wubed ki cwercwiny, pe cwinywu owaŋ i komwu kekenwu pi cato an kany; pien Lubaŋa aye yam ocwala kany i nyimwu, wek akony kwowu,

⁶ Pien kec doŋ obedo i lobo pi mwaka aryo; pud dok odoŋ mwaka abic ma pur ki kac bibedo pe.

⁷ Lubaŋa ocwalo an i nyimwu wek agwok ki wun jo ma bidoŋ wi lobo, ki pi gwoko ki wun jo mapol ma gibibwot makwo.

⁸ Pien wun aye yam pe wucwala kany, ento Lubaŋa gire; omiyo an adoko won Parao, ki lalo ode ducu ki lalo lobo Ejipt ducu.

⁹ Wutim oyot, wucit bot wora, wuciwacce ni, ‘Latinni Yucepu owaco kuman ni, Lubaŋa oketa abedo laloyo i Ejipt ducu; bin bota kany, pe dok iru.

¹⁰ Ibibedo i lobo Gocen, ibibedo cok kweda, in ki litinoni ki litino pa litinoni ducu, ki dyegini ki dyani-gu ki gin ma itye kwedgi ducu.

¹¹ Abipito in kunnu pien pud dok odoŋ mwaka me kec mukene abic i anyim; wek in ki jo ma i paconi, ki gin ma it ye kwedgi ducu pe wubed lucan.’

¹² Iyo, kombeddi waŋjwu oneno, ki waŋ omera Benjamin bene oneno ni an kikoma aye aloko kwedwu ki doga,

¹³ Myero wun wucitit bot wora kit deyona ducu ma atye kwede i Ejipt, ki gin ducu ma doŋ wuneno. Wucit oyot, wek wukel wora kany.”

¹⁴ Ocako poto i ŋut ominne Benjamin ki koko, ki Benjamin bene okok i ŋute,

¹⁵ Ka onoto lem omegine ducu kun kok; ka doŋ lacen omegine gucako boko lok kwede.

¹⁶ Ka lok owinnye wa ki i ot pa Parao ni, “Omegi Yucepu gubino”, pire oyomo cwiny Parao ki luticce matek.

¹⁷ Parao owaco bot Yucepu ni, “Wac bot omegini ni, ‘Wutim kit man, wutwe yec i ŋe kanawu, wudok cen i lobo Kanaan;

¹⁸ wutiŋ wonwu ki jowu, wek wubin bota; abimiyowu gin mabeco ma tye i lobo Ejipt, wucicamo moo ma i lobo-ni.’

¹⁹ “Dok icikgi ni, ‘Wutim kit man: Wuter gadigadi nia ki i lobo Ejipt kany pi litinowu matino ki pi mon mewu, wek wukel wonwu obin.

²⁰ Pe wupar pi jamiwu, pien gin mabeco ma tye i lobo Ejipt ducu mewu.’ ”

²¹ Awobe pa Icrael gutiyo kit meno; Yucepu omiyogi gadigadi kit macalo Parao ociko, ka dok omiyogi peke me wotgi.

²² Omiyo botgi ducu ŋat acel acel boŋŋi mabeco me aruka i nino madito, ento bot Benjamin omiyo cekel me ryal miya adek ki ruk mabeco abic me nino madito.

²³ Ocwalo bot wonne jami macalo man: Kana apar ma guyene ki jami mabeco ma oa ki i Ejipt, ki megi kana apar ma guyeyo kal, ki cam, ki peke me wot pa wongi.

²⁴ Ka doŋ ocako cwalo omegine gucito. Ka doŋ gia ocikogi ni, “Pe wubed ka da iyo.”

²⁵ Ka gua woko ki i Ejipt, ci gudwogo i lo bo Kanaan bot wongi Yakobo,

²⁶ Ka gutitte ni, “Yucepu pud tye makwo, en aye laloyo i lobo Ejipt ducu”; ci tipo kome oto woko lirut, pien onoŋo peya oye lokgi.

²⁷ Ento ka doŋ gutitte lok kom Yucepu ducu, kit ma ocikogi kwede, ka dok pi neno lwak gadigadi ma Yucepu ocwalo pi tiŋo en, ka tipo kom wongi ocako dwogo.

²⁸ Ka Icrael ocako lok ni, “Doŋ otum, woda Yucepu kara pud tye makwo; abiwot acito ka nene ma pud peya ato.”