Acakki 44 - Acoli Baibul

Kikopo pa Yucepu orwenyo

¹ Yucepu ociko lakan jami me ot ni, “Pik cam opoŋ kicaa pa jo-nu, mabup, ma gitwero tino; dok iket lim pa ŋat acel acel i dog kicaane,

² ci iket kikopona, kikopo ryal-li, i dog kicaa pa latin matidi-ni, kacel ki limme me wilo kal.” En otimo kit macalo Yucepu owacce.

³ Ka piny doŋ oru maleŋ, ci gicwalo jo-nu gukato woko kacel ki kanagi.

⁴ Ka guwoto manok nia ki i gaŋ, Yucepu owaco ki lakan jamine ni, “Doŋ ilub kor jo-nu; ka imakogi, ci iwac botgi ni, ‘Piŋo wuculo gin maber ki gin marac? Piŋo wukwalo kikopo ryal mera woko?

⁵ Pe rwoda mato ki kikopo meno? Dok pe en aye tyeto kwede bene? Wutimo rac mada.’ ”

⁶ Ka omakogi i yo, ci owacogi lok meno.

⁷ Gugamo doge ni, “Lok aŋo mumiyo in laditwa iloko lakit lok meno? Wan luticci pe myero watim lakit tim macalo meno!

⁸ Nen ba, lim ma nene wanoŋo i dog kicaawa, wadwoko cen boti nia wa ki i lobo Kanaan; dok wan myero wakwal ryal nyo jabu ki i ot pa laditwa niŋniŋ?

⁹ Ka ce gibinoŋo tye bot ŋat mo i kinwa, wek en aye oto, wan bene wabibedo opiini laditwa.”

¹⁰ En ogamo ni, “Wuwek koŋ doŋ obed kit ma wuwaco-ni: ŋat ma gibinoŋo kikopo bote aye bibedo opiina, jo mukene bal bibedo pe i komgi.”

¹¹ Ŋat acel acel ocako cibo yecce piny oyotoyot, ŋat acel acel oyabo dog kicaane,

¹² Ka oyenyo dog kicaa nia ki kom pa ladit nio wa kom latin, ci ginoŋo kikopo i dog kicaa pa Benjamin,

¹³ Gucako yeco boŋŋigi pi cwercwiny, gin ducu gutweyo yec i ŋe kanagi, gudok i gaŋ.

¹⁴ Ka Juda ki omegine gudok i ot pa Yucepu, gunoŋo en pud tye kenyo; gupoto, guryebbe piny i nyime,

¹⁵ Yucepu owacogi ni, “Wun wutimo kit tim macalo man piŋo ce? Wun pe wuŋeyo ni dano macalo an-ni ŋeyo tyet?”

¹⁶ Juda ogamo kun waco ni, “Wan wabidok iye lok aŋo, ladit? Wabigamo lok aŋo kono? Wabikwanyo bal i komwa kekenwa niŋniŋ? Lubaŋa otyeko noŋo bal i komwa; nen, wan wadoko opiini, laditwa, wan ducu kacel ki ŋat ma ginoŋo kikopo bote-ni.’

¹⁷ Ento en ogamo ni, “An pe atwero timo kit eno! Ento ŋat ma ginoŋo kikopo bote-ni, aye bibedo opiina; ento ki tuŋ botwu wun wudok mewu bot wonwu ki kuc.”

Juda opido pi Benjamin

¹⁸ Juda ocako cito bote, owacce ni, “Alegi laditta, wek an alok lok mo kwedi, pe iwek kinigani obed Lyet i koma, pien in irom ki Parao kikome.

¹⁹ Ladit, in yam ipenyowa ni, ‘Wun wutye ki wonwu, onyo omegiwu?

²⁰ Wan wagamo dogi ni, ‘Watye ki wonwa, dano muti doŋ, ki ominwa matidine latin me tiyone. Ominne aye oto woko, en aye odoŋ latin acel i kor minne; wonne bene maro en.’

²¹ Ka dok iwaco botwa ni, ‘Wukel en bota, wek aket waŋa i kome.’

²² Wan watito boti ni, ‘Latin awobi-nu pe twero weko ka ŋet wonne; ka ce opokke woko ki wonne, ci wonne to woko.’

²³ Ento in onoŋo iwaco botwa ni, ‘Ka ominwu matidi-ni pe obino kany kacel kwedwu, pe dok wubineno waŋa.’

²⁴ “Ka wadok paco bot wonwa ladit, ci watitte lokki ducu.

²⁵ Ka wonwa owaco ni, ‘Wuwot dok wuciwil ki wan cam mo manok’,

²⁶ wan wawacce ni, ‘Pe watwero dok Ka ominwa rmatidi-ni bicito kwedwa, ci wabidok kunnu, pien pe wabineno waŋ dano ca, ka ominwa matidi-ne pe i kinwa.’

²⁷ Ci wora owacowa ni, ‘Wun wuŋeyo ni dakona onywalo litino awobe aryo;

²⁸ acel oweka woko, ci yam awacci, Ada ŋuu okide woko, pe dok amedo ki nene matwal.

²⁹ Ka dok wukwanyo man woko ki bota, ce gin marac bipoto i kome, ci wubitero lwar wiya i lyel ki: cwercwiny.’

³⁰ “Mumiyo ka an adok bot wora;: ma latin awobi-ni pe i kinwa, macalo kwone ocuŋ i kom latin awobi-ni,

³¹ ka oneno ni latin awobi-ni pe i kinwa, ci en bito woko. Miyo wabitero lwar wi wonwa i lyel ki cwercwiny.

³² An nene acuŋ pi latin awobi man bot wora, kun awacce ni, ‘Ka pe abidwoko en boti, an abibedo won alii i nyim wora i kare me kwona ducu.’

³³ Mumiyo kombeddi alegi ni ber iye an opiini, adoŋ ma ka latin awobi man, abed opiini, ladit; wek latin man odok paco kacel ki omegine.

³⁴ Pien atwero dok paco bot wora niŋniŋ, ka pe latin-ni tye kweda? Alworo neno gin marac ka poto i kom wora.”