Acakki 42 - Acoli Baibul

Omegi Yucepu gucito i Ejipt pi wilo cam

¹ Ka Yakobo owinyo ni kal tye i Ejipt, owaco bot awobene ni, “Piŋo wubedo ka nenne anena?”

² Ka owaco botgi ni, “Nen, an awinyo ni kal tye i Ejipt; wucit wuwilliwa kai kunnu, wek wabedu kwo, pe wato kl kec.”

³ Mumiyo omegi Yucepu apar gucito i Ejipt ka wilo kal.

⁴ Ento Yakobo pe ocwalo Benjamin, omin Yucepu, kacel ki omegine ca, pien obedo ka lworo ni gwok dok gibitime rac bene.

⁵ Kit meno awobe pa Icrael gucito ka wil i kin jo mukene ma gicito kunnu, pien onoŋo kec oromo lobo Kanaan ducu.

⁶ I kare meno onoŋo Yucepu odoko laloyo maber i lobo Ejipt; en obedo ka cato kal bot lwak me lobo meno. Ci omegi Yucepu bene gubino, gupoto piny aryeba cwiny i nyime, kun gukulo wangi i ŋom.

⁷ Ka Yucepu oneno omegine, ci oŋeyogi cut, ento obedo gwa i komgi, macalo gin Lurok ata, kun gerre agera ni, “Wun wua ki kwene?” Gugamo ni, “Waa ki i lobo Kanaan, wabino ka wilo cam.”

⁸ Kit-meno Yucepu oŋeyo omegine, ento gin pe gumedo ki ŋeye,

⁹ Yucepu ocako po lek ma yam oleko i komgi-ni; dok owaccigi ni, “Wun lurot piny do, wun wubino ka neno lobo-ni ka kabedo mo tye noŋo.”

¹⁰ Gugamo ni, “Pe kumeno Laditwa, wan luticci wabino giwa ka wilo cam.

¹¹ Wan ducu awobe pa ŋat acel, wan jo ma iwa leŋ, wan pe lurot piny.”

¹² Owaccigi ni, “Pe ya, wun wubino mewu ka neno kabedo mo ma tye nono.”

¹³ Gugamo dok ni, “Wan ducu wan omego apar wiye aryo, ma awobe pa laco acel ma tye i lobo Kanaan; ci ominwa matidine odoŋ bot wonwa, ki acel aye doŋ pe.”

¹⁴ Yucepu owaco ki gin ni, “Doŋ kara tye kit ma awacowu, ni wun lurot piny.

¹⁵ Pi lok meno, wun doŋ gibinenowu maber kit man: macalo Parao tye makwo-ni, wun pe doŋ wubia woko i kabedo-ni, ka ominwu matidi-ni pe obino kany.

¹⁶ Wucwal ŋat acel i kinwu, wek en ocikel ominwu, kun noŋo wun pud wudoŋ kany i mabuc, wek lokwu koŋ ginen maber, ka wun wutye ki ada i iwu. Ka pe, macalo Parao tye makwo-ni, wun lurot piny i ada.”

¹⁷ Ci oketogi ducu i mabuc pi nino adek.

¹⁸ Ka nino adek oromo, ci Yucepu owaco botgi ni, “Wutim kit man ci wubikwo, pien alworo Lubaŋa:

¹⁹ ka wun jo ma iwu leŋ, wuwek ŋat acel aye gitwe odoŋ i mabuc, wek jo mukene gucit paco guter kal ki jo ma paco pi larogi ki kec,

²⁰ ka wucikel ominwu matidi-ni bota; miyo binen ni lokwu doŋ tye ada, ci pe wubito.” Ci gutimo kit meno.

²¹ Gucako lok gigi kekengi ni, “I adane, wan woroco i kom ominwa, pien waneno cwercwinye, ka yam bako doge botwa, ci pe wamedo ki winyone; mumiyo tin can man opoto i komwa bene.”

²² Reuben owacogi ni, “Yam pe atittiwu ni pe wutim bal mo i kom latin ca? Ento wun pe wumedo ki winyo, en aye mumiyo gipido pi remone i komwa-ni.”

²³ Pe gumedo ki niaŋ ni Yucepu winyo lokgi-ni, pien onoŋo Iadum aye tye i kingi.

²⁴ Ka oa woko ki botgi ci ocako koko; ka odok botgi obedo ka lok kwedgi. Omako Cimeon ki i kingi ci otweyo ki i nyimgi.

Omegi Yucepu gudwogo i Kanaan

²⁵ Yucepu ociko ni doŋ gipik kal opoŋ kicaa megi, ka dok gidwok lim pa dano acel acel gipik i kicaane, dok gumi botgi peke me wotgi. Man ducu gitimo botgi.

²⁶ Ka gutweyo kal i ŋe kanagi, ci gucako wot.

²⁷ Ka ŋat acel oyabo dog kicaane i kabedo ma gibuto iye-ni, wek emi cam ki kanane, ci oneno lim giketo i dog kicaane.

²⁸ Ocako waco ki omegine ni, “Limma gidwoko kakare. Nen, tye i kicaana ene.” Ka guwinyo, ci cwinygi opoto nirim, gubedo ka cabbe kekengi ki myelkom kun giwaco ni, “Lubaŋa timowa kuman piŋo?”

²⁹ Ka gudwogo bot wongi Yakobo i lobo Kanaan, gutitte gin ducu ma otimme i komgi, kun giwaco ni,

³⁰ “Dano ma ladit me lobo-nu obedo ka lok ki gero i komwa, olokowa wadoko lurot piny.

³¹ Ento wan watitte ni, ‘Wan jo ma iwa leŋ, wan pe lurot piny.

³² Wan omego apar wiye aryo ma wonwa acel. Ominwa acel aye doŋ pe, ki acel matidine tye odoŋ bot wonwa i lobo Kanaan.’

³³ Ci dano meno, ladit me lobo-nu, owaco botwa ni, ‘Man aye miyo abinian ni wun jo ma iwu leŋ: wuwek ominwu acel odoŋ bota, wuter kal me laro kec i pacowu, wek wuciti.

³⁴ Wucikel ominwu matidini bota, ci doŋ abiŋeyo ni wun pe lurot piny, ento wun jo ma iwu leŋ, ci doŋ abimiyo ominwu i ciŋwu, dok wubicato wil i lobo-ni.’ ”

³⁵ Ka gitye ka onyo kal ma i kicaa megi, ci dano acel acel onoŋo lim ma nene oboyo tye i kicaane. Ka gin ki wongi guneno lim ma giboyo, ci lworo omakogi matek.

³⁶ Wongi Yakobo owaco ni, “Wutyeko litinona woko do. Yucepu doŋ pe, Cimeon bene doŋ pe, dok wumito tero Benjamin; man ducu canne poto i wiya.”

³⁷ Reuben ocako waco bot wonne ni, “Ibineko litino awobena aryo-ni ducu ka ineno pe adwoko en paco boti. Miya acit kwede, ci abikelo en paco boti.”

³⁸ Ento en ogamo, okwero woko ni, “Woda pe bicito kwedwu kunnu, pien ominne doŋ oto mere woko, en kene aye odoŋ, Ka gin marac dok otimme i kome i wotwu-ni, ci wubitero lwar wiya i lyel ki cwercwiny.”