Acakki 4 - Acoli Baibul

Kain ki Abel

¹ Adam oŋeyo dakone Kawa, ci dakone ogamo ic, onywalo Kain, “Doŋ atyeko noŋo latin laco ma Rwot okonya kwede.”

² Ka dok onywalo ominne Abel. Abel obedo lakwat romi, Kain obedo lapur poto.

³ Ka kare mo okato, Kain okelo cam ma oceko i potone, otyero bot Rwot.

⁴ Abel okelo mere litino kayo romi ki dwologi. Ci Rwot ojolo Abel ki motte,

⁵ ento pe ojolo Kain ki motte; omiyo Kain okeco, waŋe oballe.

⁶ Rwot owaco bot Kain ni, “Ikeco piŋo? Waŋi oballe piŋo?

⁷ Ka itimo maber pe giye? Ka pe itimo maber, ci bal buto i doggola macalo ŋuu ma cwinye pyette i komi; ento myero iloye.”

⁸ Kain owaco bot ominne Abel ni, “Wacit i poto.” Ka gitye i poto, Kain ocako lweny kom ominne Abel, ci oneko woko.

⁹ Ci Lubaŋa owaco bot Kain ni, “Omeru Abel tye kwene?” En ogamo ni, “Pe aŋeyo; an aye lagwok omera bo?”

¹⁰ Rwot owacce ni, “Man doŋ itimo piŋo? Nen, remo pa omeru tye ka koko i nyima, winnye a ki i nom.

¹¹ Koni doŋ giceni woko ki i lobo, ma oŋamo doge me mato remo pa omeru ma ioyo-ni,

¹² Ka ipuro poto, pe bicekki cam ki tekke ducu; ibibedo lamal-gaŋ kun imal ata i lobo.”

¹³ Kain owaco bot Rwot ni, “Twon can ma imiya-ni obwoyo koma woko do.

¹⁴ Nen, doŋ iryema woko tin ki i poto, abikanne woko ki i waŋi; abibedo lamal-gaŋ kun amal ata i lobo, jo ducu ma binoŋa, bi neka woko.”

¹⁵ Rwot owacce ni, “Pe kumeno! Ka ŋatti mo bineko Kain, gibiculo kwor i kome tyen abiro kulu.” Rwot oketo lanyut mo i kom Kain, wek jo ma binoŋe pe guneke.

¹⁶ Kain ocako a woko ki i nyim Rwot, ocito obedo i lobo Nod, tuŋ wokceŋ me Eden.

Likwayo pa Kain

¹⁷ Kain onene ki dakone, ci dakone ogamo ic, onywalo Enoka. Ocako gero gaŋ madit, ocako nyiŋ gaŋ meno macalo nyiŋ wode, ni Enoka.

¹⁸ Enoka onywalo Irad, Irad onywalo Mekujael, Mekujael onywalo Metucael, Metucael onywalo Lamek.

¹⁹ Lamek onyomo mon aryo; nyiŋ dako acel Ada, ki nyiŋ mukene Jilla.

²⁰ Ada onywalo Jabal; en aye nene won jo ma gibedo i kema, ki wegi lim makwo.

²¹ Nyiŋ ominne Jubal, en aye nene won jo ma gigoyo opuk ki lukut nyamulere.

²² Jilla onywalo Tubalkain; en aye nene latet kit kwa jami tic ducu me mola ki nyonyo. Lamin Tubal-kain nyiŋe Naama.

²³ Lamek owaco bot monne ni, “Ada ki Jilla, wuwiny; wun mon pa Lamek, wuwiny lok ma awacciwu: Atyeko neko dano ma omiya ret, aneko awobi mo ma ogoya-ni.

²⁴ Ka Kain gibiculo kwor i kome tyen abiro, Lamek gibiculo kwor i kome tyen pyerabiro wiye abiro kulu.”

Likwayo pa Ceji

²⁵ Adam dok oŋene ki dakone, ci dakone onywalo latin laco, ocako nyiŋe Ceji, pien owacci, “Lubaŋa dok omiya latin mukene muleyo ka Abel, ma yam Kain oneko-ni.”

²⁶ Ceji bene onywalo latin awobi, ocako nyiŋe Enoci. I kare meno en aye dano gucako lwoŋo iye nyiŋ Rwot.