Acakki 35 - Acoli Baibul

Lubaŋa omiyo Yakobo gum i Betel

¹ Lubaŋa owaco bot Yakobo ni, “A woko icit i Betel, wek ibed kunnu; dok ican keno tyer kunnu ka ma yam an anen iye boti i kare ma iriŋo ilwi woko ki bot omeru Ecau.”

² Omiyo Yakobo owaco bot jo ma i ode ki jo ducu ma gibedo bote ni, “Wubol lwak cal lubaŋa pa lurok ma wutye kwedgi i kinwu-ni, wulonnye kenwu, wulok ginarukawu;

³ ka doŋ waayu, wacitu woko wa i Betel, wek acit acan keno tyer pi Lubaŋa ma yam ogamo doga i nino ma yam can odiŋani, ma obedo kweda i kabedo ducu ma awoto iye.”

⁴ Gumiyo ki Yakobo cal ducu, ki agit ma noŋo tye i itgi bene; ci cal lubaŋa pa lurok ma gitye kwede Yakobo oyikogi piny i te yat kworo ma yam tye cok ki Cekem.

⁵ Ka gitye ka wot, lworo ma oa ki bot Lubaŋa opoto i kom wegi gaŋi ma tye cok kwedgi, omiyo pe gulubo kor awobe pa Yakobo.

⁶ Yakobo otiro i Luj ma en aye Betel, ma tye i lobo Kanaan, en kacel ki lwak dano ducu ma yam gitye kwede.

⁷ Ocano keno tyer kunnu, olwoŋo nyiŋ kabedo meno ni El-betel pien onoŋo Lubaŋa yam onen iye bote i kare ma olwi oriŋo woko ki bot ominne.

⁸ Debola lapidi pa Labeka oto woko, ci giyike i te yat kworo ma i ŋet Betel; mumiyo nyiŋ kabedo meno gilwoŋo ni Alon-bakut.

⁹ Lubaŋa dok onyutte bot Yakobo i kare ma en oa ki i Paddan-aram, ci omiye gum.

¹⁰ Lubaŋa owacce ni, “Nyiŋi Yakobo; pe dok gibilwoŋo nyiŋi ni Yakobo, ento nyiŋi doŋ bibedo Icrael.” Omiyo nyiŋe odoko Icrael.

¹¹ Lubaŋa dok owacce ni, “An Lubaŋa Matwero-ducu; nywal, inya; rok ki lwak rok mapol bia i komi, ki luker bene gibia ki i komi.

¹² Lobo ma yam amiyo ki Abraim ki Icaka abimiyo boti, ka dok abimiyo lobo bot likwayi ma gibilubi.”

¹³ Lubaŋa ocako a ki i kabedo ka ma yam oloko iye kwede-ni odok malo.

¹⁴ Ci Yakobo ocibo wii i kabedo ka ma oloko iye kwede-ni, ocibo iye wir got; oonyo gityer amata i keme, ka oliyo moo i kome.

¹⁵ Yakobo ocako nyiŋ kabedo ma Lubaŋa oloko iye kwede-ni ni Betel.

To pa Lakeri

¹⁶ Gumedde ki wot nia ki i Betel: i kare ma pud Eprat kiborbor, mwoc Ogoyo Lakeri, ci nyodone obedo tek,

¹⁷ Ka doŋ nyodone obedo tek, dako lacolo owacce ni, “Pe ilwor; tin doki ibinywalo latin laco mukene.”

¹⁸ I kare ma en to ma cwinye cok ka tum, ocako nyiŋ latinne ni. Benoni; ento wonne ocako nyiŋe ni Benjamin.

¹⁹ Lakeri oto woko kit meno, ci giyike i yo ma cito Eprat, ma en aye Beterekem.

²⁰ Yakobo ocibo wir got i wi lyel pa Lakeri; meno wir lyel pa Lakeri ma pud tye ocuŋ kunnu nio wa i kare man.

²¹ Icrael omedde ki wotte, ogony i ŋe lubele me Eder ma wiye ocudo malo.

Awobe pa Yakobo

²² I kare ma Icrael tye i lobo meno, ci wode Reuben otimo caro, obuto ki ci-wonne Bila ma aŋeca; ci wonne owinyo pire bene. Yakobo yam tye ki awobene apar wiye aryo,

²³ Litino awobe pa Lea gin aye Reuben, latin kayo pa Yakobo, Cimeon, Levi, Juda, Icakar ki Jabulon.

²⁴ Litino awobe pa Lakeri gin aye Yucepu ki Benjamin.

²⁵ Litino awobe pa Bila, aŋeca: pa Lakeri, gin aye Dan ki Naputali.

²⁶ Litino awobe pa Jilpa, aŋeca pa Lea, gin aye Gad ki Acer. Meno gin aye litino awobe pa Yakobo ma ginywalogi i Paddan-aram.

To pa Icaka

²⁷ Yakobo obino bot wonne Icaka i Mamre, i Kiriat-arba, en aye Kebron ka ma yam Abraim ki Icaka gubedo iye.

²⁸ Icaka yam ori wi lobo mwaka miya acel ki pyeraboro,

²⁹ Icaka oomo cwinye me agikkine, oto woko ci odok oto, lutugi, dano muteggi, ma doŋ oti; ci awobene Ecau ki Yakobo guyiko kome.