Acakki 32 - Acoli Baibul

Yakobo oyubbe pi rwatte ki Ecau

¹ Yakobo omedde ki wotte ci lumalaika pa Rwot guromo kwede.

² Ka Yakobo onenogi, owacci, “Man mony pa Lubaŋa!” Mumiyo olwoŋo nyiŋ kabedo-nu ni Makanaim.

³ Yakobo ocwalo lukwena bot ominne Ecau ma tye i lobo Ceir, i lobo pa jo Edom.

⁴ Opwonyogi ni, “Wubiwaco bot laditta Ecau kit man: Laticci Yakobo owacci, ‘Doŋ atyeko bedo bot Laban abedo nio wa i kare-ni,

⁵ Atye ki twoni ki lwak kana, ki lwak lim, ki lwak opii ki lwak aŋeca; acwalo kwena boti laditta wek anoŋ pwoc mo ki tuŋ boti.’ ”

⁶ Ka lukwena gudwogo bot Yakobo, guwacce ni, “Wao bot omeru Ecau, en obebino ka jolo wii i yo, kacel ki jo miya aŋwen.”

⁷ Lworo omako Yakobo matek kome bene oryaŋŋe woko; ci opoko kin jo ma onoŋo gitye kwede, ki dyegi ki dyaŋi, ki kinaga, dul aryo,

⁸ kun tamo ni “Ka Ecau obino olwenyo i kom dul man acel-li otyeko woko, ci dul acel mudoŋ ca bibwot.”

⁹ Yakobo olego ni, “Ai Lubaŋa pa kwara Abraim, Lubaŋa pa wora Icaka, ai Rwot in ma yam iwacca ni, ‘Doŋ idok tuwu bot kakawu, an abitimi maber,’

¹⁰ an pe amyero kadi matidi mo ki mar meri ducu ma pe lokke, ki ada meri ducu ma inyuto i kom an laticci; pien con aŋolo kulu Jordan ma kun atye ki odoona keken, ci kombeddi doŋ apokke dul aryo kulu.

¹¹ Alegi ni ilara ki i ciŋ omera, lara ki i ciŋ Ecau; pien alwore, gwok nyo obebino ka nekowa ducu mon ki litinogi.

¹² Ento yam onoŋo ‘iwaco ni, ‘Abitimi ber, abimiyo likwayi bedo macalo kweyo ma i dog nam, ma pe kwanne pi dwoŋŋe.’ ”

¹³ En obuto kenyo i nino meno, okwanyo dul lim mogo ma yam tye kwede ocwalo bot ominne Ecau,

¹⁴ megi dyegi miya aryo ki nyogi dyegi pyeraryo, megi romi miya aryo ki nyogi romi pyeraryo,

¹⁵ megi kinaga ma ginyeto cakgi pyeradek ki litinogi, megi dyaŋi pyeraŋwen ki twoni apar, megi kana pyeraryo ki twoni kana apar.

¹⁶ Otiŋo man ducu, omiyo i ciŋ luticce, kun gilekogi dul ki dul patpat. Ociko luticce ni, “Wun wukat i nyima, wek kinwu obed mabocoboco ka wutye ka lekogi.”

¹⁷ Ociko latel yo ni, “Ka omera Ecau oromo kwedi, ce openyi ni, ‘Wun jo pa aŋa? Wucito kwene? Lim man ma i nyimwu-ni pa aŋa?’

¹⁸ Ibiwacce ni, ‘Lim pa laticci Yakobo; gin aye mot ma ocwalo bot laditte Ecau; en bene pud odoŋ ceŋ i newa.’ ”

¹⁹ Omedde ki pwonyo dano me aryo ki me adekke, ki gin ducu ma gileko lim, ocikogi ni, “Wubiloko lok ma romrom bot Ecau ka wuromo kwede,

²⁰ ka wubiwacce ni, ‘Dok bene laticci Yakobo aye odoŋ cen i ŋewa.’ ” Onoŋo otamo ni, “Wek akwe cwinye ki mot ma ocito anyim-mi, ci lacen olo abineno waŋe twal, dok en bene gwok doŋ bijola.”

²¹ Kit meno mot okwoŋo nyime, kun en kikome obuto i gony i dyewor meno.

Yakobo olwenyo i Peniel

²² I dyewor meno en oa malo, ci okwanyo monne aryo, aŋecane aryo, kacel ki litinone apar wiye acel, owoto oŋolo kwedgi kulu Jabok i waŋ wat apara.

²³ Okwanyogi, omiyo guŋolo kulu, kacel ki lim ma ‘en tye kwede ducu.

²⁴ Yakobo ka odoŋ kene, laco mo obino, ocako rette kwede nio wa kwarpiny.

²⁵ Ka laco meno oneno ni pe doŋ etwero loyo Yakobo, ci otwomo awaŋ-macce; ci em Yakobo otuk owil woko lacuno ma en rette kwede.

²⁶ Owacce ni, “Weka doŋ aciti, pien piny doŋ mito ru woko.” Ento Yakobo ogamo ni, “Pe abiweki, nio waŋ ma koŋ ilamma gum.”

²⁷ En ogamo ni, “Nyiŋi kono aŋa?” En owacci, “Yakobo.”

²⁸ Ci dok owacce ni, “Nia tin nyiŋi doŋ pe gibilwoŋo ni Yakobo, ento ni Icrael, pien ibedo ka lweny ki Lubaŋa, dok ki dano bene, ci imedo ki loyo.”

²⁹ Yakobo dok openye ni, “Alegi ni itucca nyiŋi do.” En owacce ni, “Ipenyo nyiŋa kono piŋo?” Omiye gum ka kenyo.

³⁰ Ci Yakobo ocako nyiŋ kabedo meno ni, Peniel, kun wacci, “Pien atyeko neno Lubaŋa waŋ ki waŋ, ento pud akwo gira aye.”

³¹ Ceŋ otucce i Peniel kun doŋ woto ma komo akoma pi eme ma otuk owil woko-ni.

³² Omiyo wa i kare man Luicrael gikwero riŋo puc me bam ma tye i awaŋ-mac, pien Lubaŋa otwomo me Yakobo i ler awaŋ-mac,