Acakki 30 - Acoli Baibul

¹ Ka Lakeri oneno ni pe enywalo latin mo ki Yakobo, ci nyeko omake kom laminne. Ka owaco bot Yakobo ni, “Miya litino; ka pe, ci adene woko.”

² Kiniga omako Yakobo i kom Lakeri, kun wacce ni, “Iketa adoko Lubaŋa bo, ma en ogeni nywalli?”

³ Lakeri ogamo ni, “Aŋecana Bila en do, doŋ ibed kwede, wek onywal latin mo ma kakara, wek an bene anoŋ litino mogo ki tuŋ bote.”

⁴ Ci omiyo aŋecane obedo dakone, Yakobo ocako bedo kwede,

⁵ Bila ogamo ic, onywalo latin laco ki Yakobo.

⁶ Lakeri owaco ni, “Lubaŋa otyeko ŋolla kop, owinyo ki dwana bene, ci omiya gira latin laco”; omiyo ocako nyiŋe Dan.

⁷ Bila aŋeca pa Lakeri dok ogamo ic, onywalo latin laco ki Yakobo me aryone.

⁸ Lakeri dok owacci, “Ka me lweny doŋ alwenyo matek wan ki lamera, ci aloye”; mumiyo ocako nyiŋ latin Naputali.

⁹ Ka Lea bene oneno ni doŋ ecun woko, ma pe enywalo litino, ci otiŋo aŋecane Jilpa, omiyo ki Yakobo wek obed dakone.

¹⁰ Aŋeca pa Lea bene onywalo latin laco ki Yakobo.

¹¹ Lea owacci, “Gum maber!” Mumiyo ocako nyiŋe Gad.

¹² Jilpa aŋeca pa Lea dok onywalo latin laco ki Yakobo me aryone,

¹³ Lea owacci, “An koma gum! Pien mon gibilwoŋa ni lagumkom”; mumiyo en ocako nyiŋ latin ni Acer.

¹⁴ I kare me kayo ŋano, Reuben ocito i poto, ci onoŋo iye yat nyodo, ci okelogi wa bot minne Lea. Ka Lakeri olego Lea ni, “Alegi, imiya yat nyodo pa wodi mogo do.”

¹⁵ Ento en ogamo ni, “In imayo cwara woko ki bota, itamo ni lokke tidi ce? Man dok imito ni ikwany yat nyodo pa woda woko bene?” Lakeri ogamo ni, “En tin obut kwedi dyewor ma ka yat nyodo pa wodi.”

¹⁶ Ka Yakobo odwogo nia ki i tim otyeno, Lea okato ocito ka ŋolo wiye iyo, owacce ni, “Myero tin idony i oda; pien atyeko wilo in ki yat nyodo pa woda.” Ci ocito obuto ki Lea i dyewor meno.

¹⁷ Lubaŋa owinyo lega pa Lea, ci ogamo ic, onywalo latin laco me abicce ki Yakobo.

¹⁸ Lea owacci, “Lubaŋa doŋ oculo waŋ miyo aŋecana bot cwara”; mumiyo ocako nyiŋe Icakar.

¹⁹ Lea dok ogamo, oyac, onywalo latin me abicelle ki Yakobo.

²⁰ Lea dok owacci, “Lubaŋa doŋ omiya mot me lim keny mabeco; cwara doŋ biketta deyo, pien doŋ atyeko nywalle litino co abicel kulu”; mumiyo ocako nyiŋe Jabulon.

²¹ Lacen dok onywalo nyare, ci ocako nyiŋe Dina.

²² Lubaŋa doŋ ocako po i kom Lakeri, dok owinyo legane bene, ka oyabo iye.

²³ Ci ogamo, onywalo latin laco, kun wacci, “Lubaŋa otyeko kwanyo lewic woko ki i’ koma”;

²⁴ ci ocako nyiŋe Yucepu, kun wacci, “Myero Rwot dok omedda latin laco mo acel!”

Lok ma Yakobo oyubo ki Laban kom mucarane

²⁵ Ka Lakeri otyeko nywalo Yucepu, ci Yakobo owaco bot Laban ni, “Doŋ icwala wek adok paco i lobo tuwa.

²⁶ Miya monna ki litinona ma yam atiyo pigi boti-ni, wek doŋ aciti; in bene iŋeyo gin ma atiyo boti do.”

²⁷ Laban ogamo ni, “Ka iye, ci koŋ alokki gin mo; pien atyeto ci aniaŋ ni Rwot omiya gum pi in.

²⁸ Ber ititta gin ma imito amini me mucarani, ci abimini.”

²⁹ Yakobo owacce ni, “In kikomi iŋeyo kit ma atiyo ki ticci, ki kit ma agwoko kwede limmi.

³⁰ Pien yam ma peya abino onoŋo limmi nok mo, nen doŋ gumedde madwoŋ mukato; Rwot obedo ka mini gum ka ma adok iye ducu. Ento an abinoŋo lim ma tuŋ bota awene?”

³¹ En ogamo ni, “Gin aŋo ma abimini?” Yakobo ogamo ni, “In pe ibimiya gin mo wacel. Ka ibiye, tima gin macalo man, an abimedde ka kwayo limmi, ki gwokogi bene.

³² Wek tin acit awot i kin limmi ducu, wek ayer ki i kingi romi ma gubedo aciri aciri ki ma abacabac, ki litino romi macol ducu, kacel ki dyegi ma gubedo abacabac ki ma aciri aciri; meno gin aye gibibedo mucarana.

³³ Kit meno leŋ cwinya binen lacen, ka ibibino ka ŋiyo kom mucarana. Ka ibinoŋ o dyegi ma komgi pe aciri aciri ki abacabac, ki litino romi ma pe gicol gitye i kin mega, meno gibikwano ni ma gikwalo.”

³⁴ Ci Laban ogamo ni, “Ber, wek obed kit ma iwaco-ni.”

³⁵ Ento i nino meno Laban okoyo nyogi dyegi ma gubedo kitana kitana, ki ma abacabac, ki megi dyegi ma gubedo aciri aciri ki abacabac, ma kitartar ducu, ki litino romi ducu macol, oketo i cin awobene.

³⁶ Opoko kingi woko ki Yakobo ma borre romo wot me nino adek kulu; Yakobo odoŋ ka kwayo lim pa Laban mudoŋŋe,

³⁷ Yakobo ocako jako jaŋ pobo madyak ki yaa ki ogali, ci oŋweko pokgi, wek kom kedi onen ŋwalaŋwala.

³⁸ Oketo kedi ma onweko komgi, opyelogi i nyim romi i weer pii, ka ma gionyo iye pii, ka ma lim cito iye ka mato pii, pien nyogine giyito megine ka gibino ka mato pii.

³⁹ Ka giyitogi i nyim kedi, omiyo ginywalo litino ma akolakol, ki ma aciri aciri ki ma abacabac.

⁴⁰ Yakobo dok opoko litino romi pat, oloko waŋ lim ka neno gin ma akolakol ki lwak lim pa Laban macolle ducu, ka opoko dul limme pat kun pe dok ribogi ki pa Laban.

⁴¹ I kare ma nyogi yito megine matego, ci Yakobo pyelo kedi i weer pii i nyim romi, wek oyitte i nyim kedi,

⁴² ento ka megine magorogoro aye giyitogi, en pe pyelo kedi i nyimgi; pienno lim magoro ducu pa Laban, mategone ducu pa Yakobo.

⁴³ Kit meno laco meno odoko lalonyo madwoŋ, ma tye ki lwak lim, ki lwak aŋeca ki lwak opiine, ki lwak kinaga ki kana.