Acakki 3 - Acoli Baibul

Acakki bal

¹ Twol yam onoŋo ryek makato lee tim ducu ma Rwot Lubaŋa oketo. En owaco ki dako ni, “Lubaŋa mono owacci, ‘Pe wucam yat ducu ma tye i poto-ni’?”

² Dako otito ki twol ni, “Watwero camo nyig yadi ducu ma tye i poto-ni,

³ ento Lubaŋa ociko ni, ‘Pe wubicamo nyig yat ma tye i dye poto, pe wugud kome bene, wek pe wuto.’ ”

⁴ Ci twol owaco ki dako ni, “Pe wubito.

⁵ Pien Lubaŋa ŋeyo ni, ka wucamo, ci wanwu biyabbe woko, ci wubidoko calo Lubaŋa, miyo wuŋeyo gin maber ki marac.”

⁶ Ka dako oneno ni yat-te ber me acama, dok nen mwonya bene, dok yat meno ber, cwiny dano pyette i kome, pien miyo gidoko ryek, ci opwono nyige, ocamo; omiyo mogo bot cware, ci ocamo.

⁷ Gin aryo ducu wangi oyabbe woko, gucako ŋeyo ni kara gitye munero, ka gukwoyo pot olam guruko i pyergi.

⁸ Ka guwinyo Rwot Lubaŋa woto i poto i kare ma ceŋ okwe, ci dano ki dakone gukanne woko i nyim Rwot Lubaŋa i kin yadi ma tye i poto.

⁹ Ci Rwot Lubaŋa olwoŋo dano kun wacce ni, “In mono it ye kwene, kaa?”

¹⁰ En ogamo ni, “Awinyo ka iwoto i poto, ci lworo omaka, pien atye munero, akanne woko.”

¹¹ Dok openye aye ni, “Aŋa ma doŋ otitti ni it ye munero? Ityeko camo nyig yat ma onoŋo aciki ni pe icam-mi ce?”

¹² Dano ogamo ni, “Dako ma imiya ni obed kweda-ni aye omiya nyig yat meno, ci acamo.”

¹³ Rwot Lubaŋa dok openyo dako ni, “Man kono itimo piŋo?” Dako ogamo ni, “Twol aye obwola, omiya acamo.”

¹⁴ Rwot Lubaŋa owaco bot twol ni, “Pien in aye itimo man, giceno in makato lee ma paco ducu, ki makato lee tim ducu. Ibilak, iywane piny ki ii, dok ibicamo apwa i kare me kwoni ducu.

¹⁵ Abiketo mone i kin in ki dako, ki i kin likwayi ki Likwaye; en bigoyo wii, in ibitoŋo opunye.”

¹⁶ Ki bot dako owacce ni, “Abimeddi arem matek i kare me owacci, nyodo; ibinywalo litino ki arem, cwinyi bipyette i kom cwari dok en aye biloyi.”

¹⁷ Ki bot Adam owacce ni, “Pien in aye iwinyo dog dakoni, ci icamo nyig yat ma aciki iye ni, ‘Pe icam’, giceno lo bo piri: ibicamone ki aroma i kare me kwoni ducu.

¹⁸ Loboni biceko okuto ki ocok, ibicamo pot dek ma i tim.

¹⁹ Ibicamo kwon ki kwok ma cwer ki i tur nyimi, nio ka ibidok i ŋom, kit ma con gikwanyi ki iye; in apwa, dok bene ibidok i apwa.”

²⁰ Dano ocako nyiŋ dakone ni Kawa, pien en aye megi jo ducu makwo.

²¹ Rwot Lubaŋa oyubo laa aruka, ka omiyo Adam ki dakone guruko.

²² Rwot Lubaŋa owacci, “Nen, dano doŋ odoko rom ki ŋat acel i kinwa, doŋ ŋeyo gin maber ki gin marac. Kombeddi pe dok wawek orye cine opwon nyig yat me kwo ocam doki, miyo doŋ bibedo makwo nakanaka.”

²³ Mumiyo Rwot Lubaŋa ocwale woko ki i poto Eden, wek odok opur gire ŋom ma yam gikwanye ki iye-ni.

²⁴ Oryemo dano woko, ci oketo lukerubi yo tuŋ wokceŋ me poto Eden, ki pala lucwan ma lyel mac, ma wirre tuŋŋi ki tuŋŋi, me gwoko yo ma cito i kom yat me kwo.