Acakki 29 - Acoli Baibul

Yakobo otiyo tic bot Laban pi Lakeri ki Lea

¹ Yakobo dok omedde ki wotte, ka oo i lo bo pa jo ma tuŋ wokceŋ,

² Ka obedo ka neno piny, ci oneno waŋ pii i dye bar, lwak romi gubuto piny dul adek ma gicok i ŋet waŋ pii; pien romi gimato pii i waŋ it meno. Got ma giumo ki doge bene dwoŋ:

³ ka romi ducu doŋ gugurre, gucokke kunnu, ka lukwat gitorre, giloro got woko cen ki i dog waŋ pii, ka gimiyo romi gimato, ka dok giloro got, gidwoko cen, giumo ki dog waŋ pii kakare.

⁴ Yakobo openyogi ni, “Utmega, wun wua ki kwene?” Gugamo ni, “Wan waa ki i Karan.”

⁵ Owaco botgi ni, “Wun mono wuŋeyo Laban wod pa Nakor?” Gugamo ni, “Waŋeyo en.”

⁶ Owaco botgi ni, “En tye maber kono?” Gugamo ni, “En tye maber gire. Nen, nyare Lakeri ka bino ki romigi ca!”

⁷ En ogamo ni, “Nen, tipo peya olokke do, man peya kare me guro lim kacel; ber wumi pii ki romi, ci dok wuciti, wukwagi aye,”

⁸ Ento gin gutitte ni, “Wan pe watwero miyogi, waŋ ma lim ducu gucokke, gugurre kacel, ka doŋ gicwalo got woko cen ki i dog waŋ pii, ka doŋ wamiyoromi pii.”

⁹ Ka onoŋo en tye ka lok kwedgi, ci Lakeri ocoro ki romi pa wonne, ma onoŋo kwayogi.

¹⁰ Ka Yakobo oneno Lakeri nya pa Laban, nya pa omin minne, ki romi pa nerone Laban, Yakobo okato ci ocwalo got woko cen ki i dog waŋ pii, ka ocako mi yo romi pa nerone Laban gumato pii.

¹¹ Ci Yakobo onoto lem Lakeri, kun kok matek.

¹² Yakobo otito ki Lakeri ni, en e wat pa wonne kikome, en e wod pa Labeka; ci en oriŋo, ocito otito ki wonne.

¹³ Ka Laban owinyo lok kom Yakobo wod pa laminne, ci oriŋo ocito ka ŋolo wiye; okwako kore, onoto leme bene, ka ocako tere wa i ode. Yakobo oyeko lok magi ducu kikore bot Laban,

¹⁴ ka Laban owacce ni, “In ada i cogona dok i riŋo koma bene!” Ci obedo kwede dwe acel.

¹⁵ Laban ocako waco bot Yakobo ni, “Pien in i watta, doŋ ibitina tic nono bo? Ber ititta, imito aculli gin aŋo?”

¹⁶ Onoŋo Laban tye ki anyirane aryo; nyiŋ nyare maditte Lea, ki nyiŋ matidine Lakeri.

¹⁷ Lea onoŋo wane kiŋiŋic, ento Lakeri nen mwonya muliŋŋe,

¹⁸ Yakobo onoŋo maro Lakeri: ci owacci, “Abitini tic mwaka abiro pi Lakeri, nyari matidi-ni.”

¹⁹ Laban ogamo ni, “Onoŋo bedo ber ka amiyo en boti, kato ma kono amiyo bot dano mukene; bed bota.”

²⁰ Yakobo otiyo pi Lakeri mwaka abiro; kare meno obedo macalo nino manok mo ki bot Yakobo, pien onoŋo iye omaro Lakeri mada.

²¹ Yakobo openyo Laban ni, “Doŋ imiya dakona wek abed kwede, pien kare doŋ oromo.”

²² Laban otedo karama ci olwoŋo iye dano ducu ma gitye i kabedo meno.

²³ Ci okelo nyare Lea bot Yakobo otyeno, ocako bedo kwede.

²⁴ Laban omiyo aŋecane Jilpa bot nyare Lea wek okonye.

²⁵ Ka odiko ma piny oru, Yakobo oneno kara gimiye Lea. Yakobo owaco ki Laban ni, “Itima kuman piŋo? Onoŋo pe abedo ka tic boti pi Lakeri? Ibwola kuman piŋo?”

²⁶ Laban ogamo ni, “Pe gitimo kuman i lobo tuwa kany, pe gimiyo nyako matidi aye kwoŋo ger ki maditte.

²⁷ Koŋ ityek’ cabit pi man acel-li, ci dok wabimiyi giri mukene bene, ka ibitina tic mwaka abiro mukene.”

²⁸ Yakobo otimo kit meno; ocobo cabit pa Lea, ka Laban omiye nyare Lakeri me bedo dakone.

²⁹ Laban dok omiyo aŋecane Bila bot nyare Lakeri wek okonye.

³⁰ Yakobo ocako bedo ki Lakeri bene; cwinye omaro Lakeri makato Lea, dok omedde otiyo tic bot Laban mwaka mukene abiro.

Litino ma ginywalo ki Yakobo

³¹ Ka Rwot oneno ni gidag Lea, ci oyabo iye; ento Lakeri ocuŋ ma pe nywal.

³² Lea ogamo ic, onywalo latin laco, ci ocako nyiŋe Reuben, kun waco ni, “Pien Rwot oneno aromana; koni olo doŋ cwara bimara.”

³³ Dok ogamo ic, ci onywalo latin laco, owacci, “Pien Rwot owinyo ni gidaga, omiyo dok omiya latin man bene”; ci ocako nyiŋe ni Cimeon.

³⁴ Lacen dok ogamo ic, onywalo latin laco, owacci, “Cwara doŋ bidwogo i koma, pien doŋ anywalle awobe adek kulu”; mumiyo gicako nyiŋ latin-nu Levi.

³⁵ Dok ogamo ic, onywalo latin laco, owacci, “Man aye kare ma abipako iye Rwot”; mumiyo ocako nyiŋ latin Juda; ci koŋ ocuŋ woko.