Acakki 28 - Acoli Baibul

¹ Ka Icaka olwoŋo Yakobo, ci olamme gum, ka ocike ni, “In doŋ pe inyom dako mo ki i kin anyira me Kanaan.

² Ber ia, icit Paddan-aram i ot pa kwaru Becweri ma won meni; en aye inyom iye nya pa Laban ma omin meni kikome.

³ Lubaŋa Matweroducu omiyi gum, omiyi inya mapol, wek ibed lwak rok mapol.

⁴ Dok omi gum pa Abraim opot i komi, ki i kom likwayi, wek icam lobo ma ibedo iye-ni macalo welo, ma yam Lubaŋa omiyo ki Abraim!”

⁵ Kit meno Icaka ocwalo Yakobo, ocito i Paddan-aram bot Laban, wod pa Becweri me Aram, ma omin Labeka ma min Yakobo ki Ecau.

Ecau dok onyomo dako mukene

⁶ Ecau oneno ni Icaka doŋ otyeko lamo gum i kom Yakobo, ka dok ocwale wa i Paddan-aram wek onyom dako ki kunnu, dok i kare ma olamme gum ocike ni, “In pe inyom nyako mo ki i kin Lukanaan,”

⁷ dok Yakobo bene oworo dog wonne ki minne, ci ocito i Paddan-aram.

⁸ Ka Ecau oneno ni kit pa anyira Kanaan pe yomo cwiny wonne Icaka,

⁹ ci ocito bot jo Icmael, onyomo iye dako, omedo i kom mere ma con ca. Onyomo Makalat ma nya pa Icmael wod pa Abraim, ma lamiŋ Nebayot.

Lek obino i wi Yakobo i Betel

¹⁰ Yakobo oa ki, Beer-ceba, ci odok tuŋ Karan.

¹¹ Ka oo i kabedo mo, obuto kenyo i dyewor meno, pien onoŋo ceŋ doŋ opoto woko. Ka otiŋo got acel mo ki i kin wadi, opyelo piny, oteno ki wiye, ci onino woko i kabedo meno,

¹² Lek obino i wiye, oneno rwom ma gijeŋo tere ocuŋ piny i ŋom, kun wiye gijeŋo oo wa i polo; ka oneno lumalaika pa Lubaŋa kun gilor piny, ka dok giito gidok malo.

¹³ Oneno Rwot ocuŋ tuŋ ka wiye malo, kun waco ni, “An a Rwot, Lubaŋa pa kwaru Abraim, ki Lubaŋa pa Icaka; abimiyi lobo ma ibuto iye-ni, abimiyo boti ki bot likwayi;

¹⁴ dok likwayi gibibedo ma rom ki apwa ‘me lobo, dok wubimedde wuromo yo tuŋ potoceŋ ki tuŋ wokceŋ, ki yo tuŋ acam ki tuŋ acuc bene; dok i kom in ki i kom likwayi en aye kaka ducu ma wi lobo bilimo iye gumgi.

¹⁵ Nen, an atye kwedi, abigwoki ka ma ibiwoto iye ducu, dok abidwoki cen wa i lobo man; pe abiweki ata nio waŋ ma acobo gin ma atyeko i okone boti-ni.”

¹⁶ Ka Yakobo oco woko ki i waŋ nino, ci owacci, “Rwot tye i kabedo-ni ada; onoŋo an kara pe aŋeyo.”

¹⁷ Ci lworo ocako make, kun wacci, “Kabedo man kara lik kuman! Man ot pa Lubaŋa kikome, man aye dog gaŋ me polo.”

¹⁸ Yakobo oa malo odiko con, otino got ma oteŋo ki wiye-ni, ci ocibo wek obed wir, ka oonyo moo i wiye.

¹⁹ Ocako nyiŋ kabedo meno ni Betel; ento nia wa con onoŋo nyiŋ kabedo meno gilwoŋo ni Luj.

²⁰ Yakobo ocako kwoŋo kwoŋ kun waco ni, “Ka Lubaŋa bibedo kweda, kun gwoka i yo man ma awoto iye-ni, ka dok bimiya kwon me acama, ki boŋŋi me aruka,

²¹ ka ce abidwogo wa i ot pa wora ki kuc, ci Rwot doŋ bibedo Lubaŋana,

²² ki got man bene, ma acibo me bedo wir, bidoko ot pa Lubaŋa: ki gin ducu ma ibimina, an bene abimini dul acel me aparre.”