Acakki 27 - Acoli Baibul

Yakobo obuyo gum pa Ecau

¹ Ka Icaka doŋ oti, ki waŋe bene doŋ ocido woko ma doŋ pe neno piny, ci olwoŋo latin kayone Ecau, owacce ni, “Latinna.” En ogamo ni, “Ana ene.”

² Ci owacce ni, “Nen, an doŋ ati woko, pe aŋeyo nino ma abito iye.

³ Doŋ ikwany jami dwarri, ki jurani ki atummi, kat doŋ i tim, wek icidwarra lee,

⁴ wek icella riŋo makur, kit ma amaro-ni, ci ikella, wek doŋ acam ciŋi, ka doŋ alammi gum ma peya ato.”

⁵ I kare ma Icaka tye ka lok ki wode Ecau-ni, onoŋo Labeka bene winyo. Ka Ecau okato ocito ka dwaro lee i tim, wek ekel riŋo,

⁶ Labeka owaco ki wode Yakobo ni, “Abedo ka winyo woru ka loko ki omeru ni,

⁷ ‘Cikella riŋo, wek icella riŋo makur, wek doŋ acam ciŋi, ka doŋ alammi gum i nyim Rwot ma peya ato.’

⁸ Mumiyo latinna, worra doga i lok ma aciki-ni,

⁹ Wot icit i kin dyegi, icikella litino dyegi aryo ma komgi bulubulu. Wek an ayub riŋone makur ki woru, kit ma en maroni,

¹⁰ wek iter ki woru ocam ciŋi, wek olammi gum ma peya oto.”

¹¹ Ento Yakobo ogamo dog minne kun wacce ni “Nen ba, omera Ecau kome ki yer, an: koma pe ki yer.

¹² Gwok nyo ka wora biboŋa, ci abinen macalo acito ka nyware, miyo bicena, pe bilamma gum.”

¹³ Minne ogamo doge kun waco ni, “Wek cenni opot i koma, latinna; worra doga keken, Ber iwot, icikelgi bota.”

¹⁴ En ocito, okelogi bot minne, ka minne ocelo riŋo makur, kit ma wonne maro-ni.

¹⁵ Ka Labeka okwanyo ginaruka pa wode Ecau, ma en yam ruko maberre-ni, ma noŋo tye i ot bot minne, ci oruko ki Yakobo wode matidi-ni.

¹⁶ Ocako boyo laa litino dyegi-nu ki bade ducu, ki ŋute bene ka ma yer pe iye;

¹⁷ ka otiŋo riŋo me ocelo makur-ri, ki kwon ma omyeno, omiyo i ciŋ wode Yakobo.

¹⁸ En odonyo kwede bot wonne, owacce ni, “Aba”; en oye ni, “An atye en do; in aŋa ce, latinna?”

¹⁹ Yakobo ogamo dog wonne ni, “An Ecau, latin kayoni. Atyeko timo kit ma nakanen ititta-ni; doŋ i cukke, ia malo wek icam ciŋa, ka doŋ ilamma gum.”

²⁰ Icaka owaco ki wode ni, “In onoŋo riŋo oyotoyot ma rom man niŋniŋ, latinna?” En ogamo ni, “Pien Rwot Lubaŋani omiyo gum okaya oyot.”

²¹ Dok Icaka owaco bot Yakobo ni, “Koŋ inyik cok bota kany, wek aboŋ komi, latinna, wek aŋe ka in latinna Ecau kikome ada nyo pe.”

²² Ka Yakobo ocako nyiko cok bot wonne Icaka; oboŋo kome, ci owacci, “Dwani dwan Yakobo, ento badi en aye bad Ecau.”

²³ Ci doŋ pe omedo ki ŋene, pien onoŋo bade ki yer macalo bad ominne Ecau. Ka ocako lamme gum kun waco ni,

²⁴ “In ada latinna Ecau kikome?” En odok iye ni, “An kikoma.”

²⁵ Ka dok owacce ni, “Kel cam bota cok, wek doŋ acam ciŋ latinna, ka doŋ alammi gum.” Ci oketo cam i nyime, ka ocamo; dok okelle koŋo vino, omato bene.

²⁶ Ka dok wonne Icaka owacce ni, “Bin cok, wek inot lema, latinna.”

²⁷ Ci onyiko cok bote, ka onoto leme; ka ocako ŋweyo ŋwec ginarukane, ka olamme gum, kun wacce ni, “Nen, ŋwec kom woda kur macalo poto ma Rwot omiyo gum kome!

²⁸ Lubaŋa omiyi toyo ma luk a ki i polo, ki lobo ma ceko cam mapek.

²⁹ Lwak jo mapol obed luticci, ki rok mapol bene giryebbe piny i nyimi. In aye ibed ladit ma loyo omegi, litino pa meni ducu giryebbe piny i nyimi. Cen obed i kom dano ducu ma biceni, dok gum obed i kom jo ducu ma bilammi gum!”

³⁰ Ka doŋ Icaka otyeko lamo gum ki Yakobo okato woko manok nia ki i nyim wonne Icaka, ominne Ecau ocako dwogo nia ki ka dwarre.

³¹ En bene ocelo riŋo makur, okelo bot wonne. Owaco ki wonne ni, “Wore, doŋ icukke, ia malo, wek icam ciŋ latinni, ka wek doŋ ilamma gum.”

³² Wonne Icaka owacce ni, “In aŋa doki?” Ogamo ni, “An a wodi do, latin kayoni, Ecau do.”

³³ Kom Icaka ocako myel matek twatwal, kun waco ni, “Aŋa ma nakanen koŋ odwaro lee, okella-ni, ma doŋ atyeko camone woko ducu, ma onoŋo peya idwogo-ni, dok atyeko lamma gum woko do, gum doŋ bidebo gire i kome.”

³⁴ Ka Ecau owinyo lok pa wonne, ocako tokke ki cwar koko madit, magwa bene, kun waco bot wonne ni, “Lamme gum bene do, aya abana!”

³⁵ En dok owacce ni, “Omeru obino, obwola, ci doŋ otyeko buyo gummi woko.”

³⁶ Ecau owacce ni, “Pe gicako nyiŋe Yakobo atir? Nen, en doŋ oridde ka laro jamina kiryo kulu. Okwoŋo buyo dit anywillina, doki nen, in bene dok otyeko buyo gumma woko.” Dok omedde ki waco lok ni, “In nene pe igwoko gum pira ce?”

³⁷ Icaka ogamo dog Ecau ni, “Nen, doŋ atyeko keto en me bedo rwodi otum, ki omege ducu atyeko miyogi me bedo luticce; amiye wa kal ki koŋo vino ducu gubed me pito en. Gin aŋo ma dok abimiyi ba, latinna?”

³⁸ Ecau dok owaco bot wonne ni, “Onoŋo itye ki gum acel keken bo, wora? Lamma gum, lamma gom mo bene do, aya abana.” Ecau otiŋo wiye malo ka koko.

³⁹ Wonne Icaka ocako gamo lokke ni, “Nen, ibibedo bor ki lobo ma ceko cam mapek, dok ibibedo bor ki toyo ma luk a ki malo i polo.

⁴⁰ Ibikwo meri ki lak pala lucwanni, ibibedo latic pa omeru; ento i kare ma ibijemo i kome, ci ibituro rii okol ma oriyo i ŋutini.”

Icaka ocwalo Yakobo i Karan

⁴¹ Ecau ocako kwero ominne pi gum ma wonne olamo i kome-ni. Ecau opiro lok i cwinye ni, “Kare me to pa wora doŋ onyiko cok; en aye abineko iye omera Yakobo bene.”

⁴² Ento ka gitito ki Labeka lok pa latin kayone Ecau, en ocwalo dano, olwoŋo Yakobo wode matidine, owacce ni, “Nen, omeru Ecau obedo ma cwinye yom kun oyubbe me neki.

⁴³ Mumiyo in iwor doga, latinna; a malo, ilwi, iriŋ woko bot omera Laban i Karan.

⁴⁴ Koŋ icibed kuunu, nio waŋ ma kiniga pa omeru opye;

⁴⁵ wek wiye koŋ owil i gin ma yam itimo i keme-ni; ka doŋ abicwalo dano ka omi ki kunnu. Piŋo wun aryo ducu myero wurweny woko ki i waŋa lawaŋacel?”

⁴⁶ Ka Labeka dok owaco bot Icaka ni, “An doŋ kwona ool woko ki kit kwo pa mon Kit. Ka dok Yakobo bene binyomo anyira Kit ma rom ki mon ma gitye i lobo-ni, ci doŋ kwona konyo aŋo?”