Acakki 26 - Acoli Baibul

Icaka i Gerar ki i Beer-ceba

¹ Kec dok opoto i lobo aye, ma pat ki kec ma yam koŋ opoto i kare pa Abraim ca. Ka Icaka ocitoi -Gerar, bot Abimelek kabaka Piliciti.

² Ci Rwot onen bote kun wacce ni, “Pe icit i lobo Ejipt; ber ibed i lobo ma abititti.

³ Koŋ ibed i lobo man, an bene abibedo kwedi, abimiyi gum; pien lobo man ducu abimiyo boti ki bot likwayi, dok abicobo kwoŋ ma yam akwoŋo bot woru Abraim.

⁴ Abimiyo likwayi nya mapol macalo lwak lakalatwe me polo, abimiyo likwayi lobo man ducu; dok rok ducu ma wi lobo gibilimo gumgi ki i komgi;

⁵ pien yam Abraim oworo doga, kun cobo cikka ki gin ma aciko ducu.”

⁶ Icaka obedo i Gerar.

⁷ Ka jo kunnu gupenye lok kom dakone, en ogamo ni, “En lamera”; pien olworo waco ni, “Dakona”, kun tamo ni, “Wek wegi lobo pe guneka woko pi Labeka”; pien onoŋo nen mwonya mada.

⁸ Ka doŋ odikke kunnu kare malac, ci Abimelek kabaka pa jo Piliciti oneno Icaka ki i waŋ dirica ka obedo ka tuko ki dakone Labeka.

⁹ Abimelek ocako lwoŋo Icaka owacce ni, “Nen, man dakoni; piŋo in kono nene iwacci, ‘En lamera’?” Icaka odokke iye ni, “Pien onoŋo atamo ni, Wek pe guneka woko pire.

¹⁰ Abimelek ogamo ni, “Itimowa kuman piŋo? Ka nene dano mo obuto ki dakoni, kono ikelo bal i komwa nono.”

¹¹ Abimelek ocako juko lwakke ducu, kun waco ni, “Dano mo ka ogudo kom laco man, nyo dakone, gibineke woko.”

¹² Icaka ocoyo poto i lobo meno; ci okayo cam ma dodo tyen miya i mwakanu. Rwot aye omiye gum,

¹³ dano-nu odoko lalonyo, obedo ka medde ki limo jami, nio ka odoko twon lalonyo.

¹⁴ Olimo lim madwoŋ makwo, dyaŋi ki dyegi, ci gaŋŋe opoŋ ki lwak dano, omiyo nyeko omako jo Piliciti i kome.

¹⁵ Onoŋo jo Piliciti gujuko waŋ it guculo woko ducu ki lobo, ma con lutic pa wonne aye yam gukwinyo i kare pa wonne Abraim.

¹⁶ Abimelek ocako waco ki Icaka ni, “Doŋ koŋ ia woko ki botwa, pien itek ikatowa woko.”

¹⁷ Ci Icaka oa woko ki botgi, ocito, ogony otiro i nota me Gerar, ci obedo iye.

¹⁸ Icaka dok ocako golo waŋ pii ma yam gikwinyo i kare pa wonne Abraim; pien yam koŋ jo Piliciti guju kogi woko i kare ma doŋ wonne Abraim oto woko-ni; ci dok ocako ‘lwoŋo nyiŋgi kit ma yam wonne, olwoŋogi’ kwede,

¹⁹ Ento lutic pa Icaka gutyeko kwinyo waŋ it i nota-nu, ci gunoŋo iye waŋ it maloŋo,

²⁰ Lukwat pa jo Gerar gucako da ki lukwat pa Icaka, kun giwaco ni, “Pii man mewa.” Mumiyo en ocako nyiŋ waŋ pii meno ni. Ecek,” ni pien gubedo ka da iye kwede.

²¹ Ka doŋ okwinyo waŋ it mukene, dok gucako da pi eno bene; mumiyo olwoŋo ni Citna.

²² Dok oa woko ki kunnu, okwinyo dok waŋ it mukene aye. Pe doŋ daa obedo tye pi meno; mumiyo olwoŋo nyiŋe ni Rekobot, kun waco ni, “Pien tin doŋ Rwot oyabowa kabedo malac, doŋ wabinya i lobe-ni.”

²³ Ka oa woko ki kunnu odak i Beer-ceba.

²⁴ Rwot dok oen bote i dyewor meno, ma wacce ni “An Lubaŋa pa woru Abraim; pe ilwor, pien atye kwedi, abimiyi gum, dok abimiyo likwayi nya mapol pi laticca Abraim.’

²⁵ Omiyo ocano keno tyer pi Rwot kunnu, ci olwoŋo iye nyiŋ Rwot; ci oguro kemane kunnu. Luticpa Icaka dok gukwinyo waŋ it kunnu.

Icaka ki Abimelek gucikke

²⁶ Abimelek ocito bote, oa ki i Gerar, kacel ki Akujat lamiye tam, ki Pikol ladit lawimony mere,

²⁷ Ci Icaka owaco botgi ni, “Wunwubino bota pi lok aŋo, ma wun kono wudaga, dok yam doŋ wuryema ki i lobowu?”

²⁸ Gin gugamo ni, “Wan waneno atir ni Lubaŋa tye kwedi, mumiyo wawacci, wek kwoŋ obed i kin in ki wan, wek waket gicikke ki in,

²⁹ wek pe ibitimwa marac, macalo wan bene yam pe wagudo komi, pe bene watimo gin mo marac i komi, ento tim maberre keken, dok bene waryemi woko ia ki i kinwa ki kuc. Kombeddi in aye ŋat ma Rwot omiyo gum.”

³⁰ Ci otedogi karama, ka gucamo, gumato.

³¹ Gua malo odiko con, ci gukwoŋo kwoŋ ŋat man ki lawote; ka doŋ Icaka olwokogi i yo tugi, gua, gupokke kwede ki kuc.

³² I nino meno bene kikome en aye lutic pa Icaka gubino bote, gutitte lok kom waŋ it ma gityeko kwinyone, kun giwacce ni, “Watyeko noŋo pii.”

³³ Ocako nyiŋe ni Ciba, mumiyo nyiŋ gaŋ meno gilwoŋo ni Beer-ceba nio wa onyoo.

³⁴ Ka Ecau doŋ ditte romo mwaka pyeraŋwen, onyomo monne, Judit nya pa Beeri, jo Kit, ki Bacemat nya pa Elon, jo Kit bene.

³⁵ Gumiyo cwercwiny madwoŋ bot Icaka ki Labeka.