Acakki 25 - Acoli Baibul

Likwayo pa Abraim ma Ketula onywalo

¹ Abraim dok onyomo dako mukene, ma nyiŋe Ketula,

² En onywalle Jimran, Yokocan, Medan, Midian, Icibak ki Cua.

³ Yokocan onywalo Ceba ki Dedan; litino awobe pa Dedan gin ene: Accurim, Letucim ki Leummim.

⁴ Litino awobe pa Midian gin aye Epa, Eper, Kanok, Abida ki Eldaa. Gin ducu likwayo pa Ketula,

⁵ Abraim omiyo jamine ducu bot Icaka.

⁶ Ento litino awobe pa monne ma aŋeca Abraim opoko botgi mot bene, i kare ma pud en kwo; ci ocwalogi woko cen nia ki ka ŋet wode Icaka. Gudok tuŋ wokceŋ i lobo mudok tuŋ nyaŋo,

Abraim oto, giyike

⁷ Man aye wel nino me kwo pa Abraim; oromo mwaka miya acel ki pyeraryo wiye abic.

⁸ Abraim oomo cwinye me agikkine, ci oto woko, ma mwakane doŋ dit, dano muteggi, ma doŋ oti, ci odok bot lutugi.

⁹ Awobene Icaka ki Icmael guyiko kome i boro lyel ma i Makpela, ma i poto pa Epron wod pa Jokar, ma Lakit, tuŋ wokceŋ me Mamre,

¹⁰ i poto ma yam Abraim owilo ki bot jo Kit. Giyiko Abraim kenyo, kacel ki dakone Cara.

¹¹ Lubaŋa ocako miyo gum ki Icaka ki i ŋe to pa wonne Abraim, Icaka ocako bedo i Beer-lakai-roi,

Likwayo pa Icmael

¹² Man aye likwayo pa Icmael wod pa Abraim, ma Agar aŋeca pa Cara, anyira Ejipt, onywalo ki Abraim.

¹³ Man nyiŋ litino awobe pa Icmael, kun lubo kit ma ginywalogi kwede: Nebayot, en latin kayo pa Icmael; ki Kooar, Adbeel, Mibcam,

¹⁴ Micima, Duma, Maca,

¹⁵ Adad, Tema, Jetur, Napic ki Kedema.

¹⁶ Man, aye awobe pa Icmael, nyiŋgi ene, kun lubo gaŋgi, ki kabedogi; gin luker apar wiye aryo macalo rokgi tye.

¹⁷ Icmael yam ori wi lobo mwaka miya acel ki pyeradek wiye abiro; ci oomo cwinye me agikkine, oto woko, odok bot lutugi.

¹⁸ Kabedogi yam ocakke nia ki Kavila nio wa i Cur mukemo tuŋ Ejipt ma dok tuŋ Aciria; en obedo i kabedone pat kun pyem ki utmegine ducu.

Nywalo Ecau ki Yakobo

¹⁹ Man aye likwayo pa Icaka, wod pa Abraim: Abraim onywalo Icaka,

²⁰ Icaka onyomo dakone Labeka kun onoŋo tye ki mwaka pyeraŋwen; Labeka yam nya pa Becweri ma jo Aram, ma i lobo Paddan-aram, lamin Laban ma jo Aram.

²¹ Icaka ocako lego Lubaŋa pi dakone, pien onoŋo lalur; ci Rwot ocwako kor legane, ka dakone Labeka ogamo ic

²² I kare ma litino gubedo ka twomme ki i iye, en owacci, “Ka ce gitimme kit meno, man nyuto gin aŋo?” Ci ocito ka penyo dog Rwot.

²³ Ka Rwot otitte ni, “Rok aryo aye gitye i ii, jo meno aryo-nu kingi bipokke woko ki i ii; acel bibedo oteka makato lawote, latin matidi aye biloyo latin kayo.”

²⁴ Ka kare me gonnyene oromo, ci litino rudi gunen i iye.

²⁵ Onywalo latin kayo ma kome kwar, kome ducu obedo ki yer calo boŋo yer; omiyo gicako nyiŋe ni Ecau.

²⁶ Lacen dok ginywalo ominne, kun ciŋe omako opuny tyen Ecau, omiyo gicako nyiŋe ni Yakobo. I kare ma ginywalo litino-nu onoŋo Icaka ditte doŋ romo mwaka pyerabicel.

Ecau ocato dit me anywalline woko

²⁷ Awobe meno ka gudoŋo, ci Ecau obedo oken makwiri, ladwar i tim, Yakobo obedo lamwolo, kun bedo mere i kema mot.

²⁸ Icaka yam maro mere Ecau, pien onoŋo bedo ka camo ciŋe; ento Labeka dok onoŋo maro mere Yakobo.

²⁹ I kare ma Yakobo tye ka tedo dek ŋor, ci Ecau oa ki i tim, odwogo ma kec obwoye woko,

³⁰ Ecau olego Yakobo ni, “Miya dek ŋor mubok-ki acam, kec obwoya woko.” Pi lok meno omiyo gilwoŋo nyiŋe ni Edom.

³¹ Yakobo owacce ni, “Koŋ icatta dit me anywallini.”

³² Ecau ogamo ni, “An acok to woko; dit me anywalli kono konnye tye kwene?”

³³ Yakobo ogamo ni; “Koŋ icak ki kwoŋŋa kwoŋ.” Mumiyo en okwoŋŋe kwoŋ, ci ocato dit me anywalline woko bot Yakobo.

³⁴ Ka Yakobo omine kwon ki dek ŋor, ka ocamo, omato pii i wiye, ci oa malo, ocako wot ocito woko. Ecau ocayo dit me anywalline kit meno.