Acakki 23 - Acoli Baibul

Cara oto Abraim owilo kabedo me yik

¹ Cara ori mwaka miya acel ki pyeraryo wiye abiro; meno aye wel mwaka me kwo pa Cara.

² Cara oto i Kiriat-arba, ma en aye Kebron, ma i lobo Kanaan; Abraim odonyo i ot okumo, okoko Cara ki pig waŋe,

³ Lacen Abraim oa woko ki i nyim lato, ocito owaco bot jo Kit ni,

⁴ “An a welo, ma doŋ atyeko bedo i kinwu; wumiya dullobo mo i kinwu ma bibedo kabedo me yiko dano, wek ayik iye dakona-ni, oa woko ki i waŋa.”

⁵ Jo Kit gugamo dog Abraim ni,

⁶ “Winy, laditwa; in laker madit i kinwa kany, Yik kom latoni i lyel maber ma iyero i kin lwak lyel mewa-ni: pe tye ŋatti mo ma i kinwa ma bitwonni lyelle, nyo ma bigeŋi ni pe iyik latoni iye.”

⁷ Abraim oa malo, ci oryebbe i nyim jo Kit, ma wegi lobo-nu,

⁸ kun wacogi ni, “Ka onoŋo wumito ayik latona wek oa woko ki i waŋa, wuwiny lokka, wulegga Epron ma wod pa Jokar,

⁹ wek oye mina boro ma i Makpela, ma mere-ni, ma tye i wi agikki potone. Wek oŋolla welle kikome ma romo wilone, omi bota i nyimwu, obed mera me kabedo me yik.”

¹⁰ I kare meno onoŋo Epron bene tye, obedo i kin jo Kit, ci Epron Lakit ogamo dog Abraim, ma jo Kit ducu giwinyo, kacel ki lwak ducu ma gibedo i gaŋ meno,

¹¹ kun waco ni, “Pe kumeno ladit, winy lokka; amini poto, dok amiyi wa ki boro ma tye iye-ni ki i nyim lutuwa ducu; yik iye kom latoni”

¹² Abraim dok oryebbe i nyim wegi lobo-nu,

¹³ ka owaco ki Epron, ma wegi lobo ducu giwinyo ni, “Ento ka imito, ci winy lokka, Abimiyi wel lawil poto, in ibigamo lim ki i ciŋa, wek ayik iye kom latona.”

¹⁴ Epron owaco bot Abraim ni,

¹⁵ “Laditta, winy lokka ya; wel dul poto-nu romo cekel me ryal miya aŋwen, meno kono gin aŋo ki tuŋ boti ki an bene? Yik iye kom latoni.”

¹⁶ Abraim owinyo dog Epron; ci opimo ki Epron wel ryal ma owaco i nyim jo Kit, ma romo cekel me ryal miya aŋwen kulu, kun pimo ki kidi mijan ma lucat-wil gipimo kwedeni.

¹⁷ Kit meno poto pa Epron ma i Makpela-ni, ma yam tye tuŋe wokceg me Mamre, poto kacel ki boro ma yam tye i poto-nu, ki yadi ducu ma tye i pota-nu, ma gurumo dyere ducu, gimiyogi, gimokogi ducu

¹⁸ me bedo pa Abraim, ki i nyim jo Kit ducu, kacel ki i nyim lwak ducu ma gibedo i gaŋ meno.

¹⁹ Ka lok meno otum, Abraim oyiko dakone Cara i boro ma tye i poto Makpela yo tuŋ wokceŋ me Mamre, ma en aye Kebron, ma i lobo Kanaan.

²⁰ Lukit gumoko ni poto-nu, kacel ki boro ma tye iye, gubed pa Abraim me kabedo me yik.