Acakki 21 - Acoli Baibul

Nywalo Icaka

¹ Rwot dok olimo Cara kit ma con owaco, ci otime kit ma yam ociko kwede.

² Cara ogamo ic, ci onywalo latin laco ki Abraim, ma kun en doŋ oti woko, i kare ma yam Lubaŋa otitte pire-ni,

³ Abraim ocako nyiŋ latin ma ginywalle, ma Cara aye onywalo-ni, ni Icaka.

⁴ Abraim oliro wode Icaka ka doŋ otyeko nino aboro me ditte, kit ma yam Lubaŋa ocike kwede.

⁵ Abraim onoŋo doŋ mwaka me ditte romo miya acel, ka doŋ wode Icaka ginywalo.

⁶ Cara owacci, “Lubaŋa doŋ omiya anyero; wa ŋat ma biwinyo bene binyera.’

⁷ Ci owacci, “Aŋa ma kono ceŋ owaco ki Abraim ni waŋ mo Cara bidoto latin? Nen ka doŋ anywalle awobi ma doŋ en oti, oloc woko.”

Giryemo Agar ki Icmael woko

⁸ Latin odoŋo, ci gijuke dot woko; Abraim otedo karama madit i nino ma gijuko iye Icaka dot-ti.

⁹ Ento ka Cara oneno wod pa Agar ma anyira Ejipt, ma yam onywal ki Abraim, ka tuko ki latinne Icaka,

¹⁰ en owaco bot Abraim ni, “Ryem aŋeca man ki wode, gucit woko, pien wod pa aneca-ni pe bibedo laleyo kacel ki woda Icaka.”

¹¹ Lok meno cwiny Abraim ocwer iye matek, en pi wode.

¹² Ento Lubaŋa owaco ki Abraim ni, “Pe cwinyi ocwer pi latin ki pi aŋecani; gin ducu ma Cara owacci, tim kit ma en otitti, pien litino pa icaka aye gibilwonogi ni likwayu.

¹³ Dok abimiyo wod pa aŋeca bene doko rok, pien en latinni.”

¹⁴ Abraim opuk odiko con, okwanyo kwon ki opiro pii, omiyo Agar, olwoke otere i yo, ci oŋabo jami ki latinne i wi gwoke, ocwale kwede woko. Dako meno ocito gire, obedo ka lak ata i tim me Beer-ceba.

¹⁵ Ka pii ma i opiro otum woko, ci opyelo latinne piny i te yat buŋa mo.

¹⁶ Ka oweko latinne, ocito cen ka ma borre rom ki ka ma ka gibayo atero gik iye; pien owacci, “Pe myero anen to pa latinna.’ En obedo i anyim kuca, ci latin odaŋŋe ki koko.

¹⁷ Lubaŋa owinyo koko pa latin, lamalaika pa Rwot ocako lwoŋo Agar ki i polo, kun wacce ni, “Man lok aŋo Agar? Pe doŋ i lwor, pien Lubaŋa doŋ otyeko winyo dwan koko pa latin ki ka ma ipyele iye-ni.

¹⁸ Doŋ ia malo, itiŋ latin, ci ikwake matek, pien abimiyo en doko rok madit.”

¹⁹ Ka Lubaŋa oyabo waŋe, ocako neno waŋ pii; ci ocito otwomo, opiko i opirone poŋ, ka omiyo wode omato.

²⁰ Lubaŋa obedo ki latin meno; odoŋo, obedo i tim, odoko ladwar matek ki atero.

²¹ Obedo i tim Paran; minne onyomme nya jo Ejipt.

Abraim ki Abimelek gucikke

²² I kare meno Abimelek ki ladit wi monnye Pikol guwaco bot Abraim ni, “Lubaŋa tye kwedi i gin ducu ma itiyo;

²³ kombeddi doŋ ikwoŋ kwoŋ kweda i nyiŋ Lubaŋa ni, pe ibiumo waŋa, kadi wa litinona ki likwaya bene; macalo an bene atimi ber-ri, in bene ibitima ber, ki lobona ma koni in labedo iye-ni.”

²⁴ Abraim ogamo ni, “Abikwoŋo.”

²⁵ Abraim ocako kok bot Abimelek pi waŋ pii mo ma onoŋo luticce gucerre woko kome.

²⁶ Abimelek ogamo ni, “An pe amedo ki ŋeyo ŋatti mo mutimo lakit lok-ku; in bene pe imedo ki titta lokke. Pe amedo ki winyo lokke nio wa tin!”

²⁷ Lacen Abraim okwanyo romi ki twoni, omiyogi bot Abimelek, ci gin jo aryo guketo gicikke i kingi.

²⁸ Abraim oyero bwoŋi romi abiro, oketogi pat.

²⁹ Abimelek owaco ki Abraim ni, “Bwoŋi romi abiro ma iketo pat-ti kono piŋo?”

³⁰ Ogamo ni, “Bwoŋi romi magi abiro ma ibigamogi ki i ciŋa-ni, ibiketogi pi bedo cadenna ma nyuto ni, an aye yam akwinyo waŋ pii man.”

³¹ Mumiyo kabedo meno gilwoŋo ni Beer-ceba, pien onoŋo gin aryo ducu gukwoŋŋe iye ki kwoŋ,

³² Kit meno guketo gicikke i Beer-ceba. Ka doŋ Abimelek ki Pikol ladit lawi monnye gua, gudok i lobo pa jo Piliciti.

³³ Abraim opito yat anaŋa i Beer-ceba, ci olwoŋo iye nyiŋ Rwot, Lubaŋa Mabedo Nakanaka.

³⁴ Abraim ori i lobo pa jo Piliciti kare malac.