Acakki 20 - Acoli Baibul

Abraim ki Abimelek

¹ Abraim ocako wot me cito i lobo me Negeb ma tye i kin Kadec ki Cur, obedo i Gerar, ka ma otiro iye macalo labedo.

² Abraim ocako lok i kom dakone Cara ni, “En lamera.” Ci Abimelek kabaka me Gerar ocwalo jone guomo Cara.

³ Ento’ Lubaŋa obino bote i waŋ lek dyewor, lok kom Cara, dako pa Abraim kun wacce ni, “Nen, in i dano ma lato, pien dako ma in iomo-ni dako ma cware tye.”

⁴ Abimelek onoŋo peya obedo kwede; ci en ogamo ni, “Rwot, in mono ibineko rok mo ma pe obalo?

⁵ Pe en aye gire otitta kun wacca ni, ‘Dako-ni lamera?’ Dako kikome bene owaco ni, ‘En omera.’ Atimo man ma cwinya leŋ, ki ciŋa bene pe obalo gin mo.”

⁶ Lubaŋa dok owacce i waŋ lek ni, “Iyo, aŋeyo ni itimo kumeno ma cwinyi leŋ, ci onoŋo an aye abedo ka ŋeni, oweko pe itimo bal mo i nyima; mumiyo pe aye in igudo kome.

⁷ Doŋ idwok dako-ni bot cware gire; pien en lanebi, en bilego piri, ci ibikwo. Ento ka ikwero dwoko dako-nu bot cware, ber iŋe ni ibito woko ada, in ki jo ma i paconi ducu.”

⁸ Abimelek oa malo odiko con, olwoŋo luticce ducu, otito botgi lok meno ducu, ci gubedo ki lworo madwoŋ.

⁹ Ka Abimelek olwoŋo Abraim bote, owacce ni, “Itimowa kuman piŋo? Aballi gin aŋo, mumiyo in ikelo bal madit i koma ki i kom kerra? In itimo gin ma pe myero atiya i kom dano.”

¹⁰ Ka dok Abimelek owaco bot Abraim ni, “Onoŋo mono itamo niŋo, mumiyo itimo kit man?”

¹¹ Abraim ogamo ni, “Lok mumiyo atiyo, pien onoŋo atamo ni, Lubaŋa pe gilworo i kabedo man, gibineka woko pi dakona.

¹² Ada mere lamera kikome, nya pa wora, ento pe latin pa maa kikome, ci odoko dakona.

¹³ I kare ma Lubaŋa okwanya okwanya woko ki i paco pa wora, ma abedo ka wirre, acako wacce ni, ‘Pi kicani myero itima kit man: i kabedo ducu ma wabio iye, ibinyuta ni, Man omera.’ ”

¹⁴ Ci Abimelek okelo romi ki twoni ki lwak opii ki lwak aŋeca, omiyogi bot Abraim, ci odwoko dakone Cara bote.

¹⁵ Abimelek owacce ni, “Nen, lobona tye i nyimi en; bed ka ma imito.”

¹⁶ Ki tuŋ bot Cara owacci, “Nen, atyeko miyo bot cwari cekel me ryal ma romo alip acel, pi waro kop woko ki i komi i waŋ dano ducu ma ibedo kwedgi, wek ibed laboŋo bal mo i komi.”

¹⁷ Ka Abraim olego Lubaŋa, ci Lubaŋa ocaŋo Abimelek ki dakone bene, ki lwak aŋecane, ci gucako nywalo litino;

¹⁸ pien onoŋo Rwot ogeŋo nyodo woko i ot pa Abimelek pi lok kom Cara, dako pa Abraim.