Acakki 17 - Acoli Baibul

Lanyut me gicikke aye lirre

¹ Ka Abram onoŋo tye ki mwaka me ditte pyeraboŋwen wiye aboŋwen ci Rwot onen bot Abram kun wacce ni, “An Lubaŋa Matwero-ducu, bed i nyima laboŋo bal mo,

² ci abiketo gicikkena i kin an ki in, dok abimiyi inya mapol twatwal.”

³ Abram oryebbe piny i nyime; Lubaŋa owacce ni,

⁴ “Nen, gicikkena amini eno, in ibibedo kwaro rok mapol.

⁵ Nia tin nyiŋi pe dok bibedo Abram, ento nyiŋi bibedo Abraim, pien aketo in wek ibed kwaro rok mapol.

⁶ Abimiyi inya twatwal; abimiyi idoko rok mapol, ki luker bene gibia ki i komi.

⁷ Dok abimoko gicikkena i kin an ki in ki likwayi ma bilubi, ki i yalwakgi ducu, me bedo gicikke ma bedo matwal, wek abed Lubaŋani, ki Lubaŋa pa likwayi ma bilubi bene.

⁸ Dok abimiyo boti ki bot likwayi ma bilubi lobo ma ibedo iye-ni macalo welo, en aye lobo ducu me Kanaan, wek obed mewu matwal; dok an aye abibedo Lubaŋagi.”

⁹ Ka Lubaŋa dok owaco bot Abraim ni, “Ki tuŋ boti, in ibigwoko gicikkena, in ki likwayi ducu ma bilubi, ki yalwakgi ducu.

¹⁰ Man aye gicikkena, ma wubi gwoko, i kin an ki in ki likwayi ma bilubi: Gibiliro litino awobe ducu ma i kinwu.

¹¹ Wubiliro del kom nyimwu me co woko, wek obed gin ma nyuto gicikkena i kin an ki wun,

¹² Latin laco ma romo nino aboro gibiliro del kom nyime; co ducu gibilirogi i yalwak ki yalwakgi ducu, nia i kom litino ma ginywalogi i pacowu, nio kom litino ma wuwilo awila ki limwu ki bot lurok bene, ma pe wunywalogi anywala.

¹³ Gin ducu ma ginywalogi i pacowu, ki ma giwilogi awila ki limwu, ducu gibilirogi, wek gicikkena obed i del kom nyimwu, wek obed gicikke ma bedo matwal.

¹⁴ Ka laco mo onen ma pe giliro del kom nyime me co, waŋe birwenyo woko ki i kin lutugi, pien oturo gicikkena.”

¹⁵ Ka Lubaŋa dok owaco ki Abraim ni, “Lok ma dok tuŋ bot Carai, dakoni, pe dok gibilwoŋo nyiŋe ni Carai, ento nyiŋe doŋ bibedo Cara.”

¹⁶ Abimiye gum, dok makato ducu abimiyo en nywalli latin laco; abimiye gum, en bibedo min rok mapol, ki luker pa rok mapol gibia ki i kome.”

¹⁷ Ci Abraim opoto piny aryeba ic ki nyero, kun tamo gire kekene ni, “Dano ma ditte doŋ romo mwaka miya kulu aye dok binywalo latin? Ki Cara bene ma ditte doŋ romo mwaka pyeraboŋwen ku lu dok binywalo latin?”

¹⁸ Abraim ocako waco bot Lubaŋa ni, “Myero Icmael aye doŋ obed makwo i nyimi!”

¹⁹ Lubaŋa owacce ni, “Pe gire, ento dakoni Cara aye binywalli latin laco, dok ibicako nyiŋe Icaka, dok abimoko gicikkena kwede wek obed gicikke ma bedo matwal bot Likwaye ducu ma bilube.

²⁰ Ki ma dok tuŋ bot Icmael bene, atyeko winyo in, ci nen, abimiye gum, abimiyo en binywal dok nya mapol twatwal; en bibedo kwaro luker apar wiye aryo, abimiye bedo rok madit.

²¹ Ento abimoko gicikkena ki Icaka, latin ma Cara aye binywalli i kare macalo man i mwaka ma bino.”

²² Ka Lubaŋa doŋ otyeko lok ki Abraim, ci oa woko ki bote, odok malo.

²³ Abraim otero Icmael ki lwak opii ducu ma ginywalogi i ode, nyo ma giwilogi ki lim, co ducu ma gitye i kin litino ma i ot pa Abraim, ci oliro del kom nyimgi me co woko i nino meno kikome, kit macalo Lubaŋa ocike kwede.

²⁴ Ka Abraim onoŋo tye ki mwaka me ditte pyeraboŋwen wiye aboŋwen en aye gicako Liro iye del kom nyime.

²⁵ Ki wode Icmael onoŋo doŋ tye ki mwaka me ditte apar wiye adek ka gicako Liro del kom nyime.

²⁶ I nino meno kikome en aye Abraim ki wode Icmael giliro iye del kom nyimgi,

²⁷ kacel ki jo ducu ma gitye i ode, litino ma ginywalo i ode, ki jo ma giwilogi ki lim ki bot lurok; gin bene gilirogi kacel kwede.